Read dhopadhola Luka 14 Bible Online

Luka 14 - dhopadhola bible

Luka 14

¹I ndelo ma Sabato moro, Yesu okidho cemo i ot pa acel kwoŋ Jofarisayo madongo; aka ji jorieko waŋ gin kwoŋe tektek.

²Gikenyo jal moro ma tiende gi cinge oyido obumbere obino bonge,

³to Yesu luwo malo munyo penjo Jondiko kodi Jofarisayo ni, “Cik mawan yeyo botho dhano i ndelo ma Sabato, kosa be?”

⁴To joliŋaliŋa. Yesu okwanyo ŋato, obotho go to sewila go.

⁵Kenyo to Yesu penjo jo ni, “Ŋa kwoŋ win ma ka punda pere kosa thwon pere opodho i dago maluth i ndelo ma Sabato, di kinyal ywayo to wodho woko mayot?”

⁶To jok'onyalo dwoko go wac no.

⁷Munyo Yesu oneno paka wendo joyero kabedo ma malo, oluwo rijo iy'ageca ni,

⁸ “K'olwoŋin i kalima ma nywomirok, ikir'iyer kabedo ma malo, ipoyo ŋatiman ma loyin gi dwoŋ bende olwoŋi;

⁹ameno ŋat'olwoŋo win nyalo bino to waco rin ni, ‘Weyi kabedo no ri ŋati me.’ Gikenyo, ibino ay giwickwot madwoŋ, t'ikowere i kabedo ma piny loyo.

¹⁰Kucel, k'ibedo wendo, comi yu kabedo ma piny t'ibedo kenyo, aka ka ŋat'olwoŋo win obino, ama wowaci rin ni, ‘Jawodhan, core ye yumalo kaca.’ Ameno dhano je ma nikodin i dhower kenyo bino miyin dwoŋ.

¹¹Ato ŋata won miyere dwoŋ ibino dwoko piny, aka ŋata won bwonere am'ibino miyo dwoŋ.”

¹²Gikenyo Yesu owaco ri jadwoŋ m'olwoŋo go ni, “K'iyiko kalima ri ji, ikir'ilwoŋ merin perin kosa wutmin in kosa wade perin kosa joger perin ma joŋaŋ kende, rupiri jono jonyalo culin kemba munyo bende jolwoŋin.

¹³To ka iyiko kalima madwoŋ, lwoŋ jocandi, jom'ogiyagiya, jom'oŋol kodi joma waŋ gin otho bende,

¹⁴aka inolimi silwany, rupiri jono mere jok'onyal culin kemba moro, to Were won ama bino culin i ndelo ma jomaleŋ jobino cerino iye.”

¹⁵Munyo acel kwoŋ jom'obedo dhower gi Yesu owinjo gime, owaco ri Yesu ni, “Jasilwany a ŋat'ocam mugat i Ker pa Were.”

¹⁶To Yesu owaco rigo ni, “Dhano moro cango otimo kalima madwoŋ, to lwoŋo ji mathoth.

¹⁷Aka i hongo ma cemo, go odhiro jotic pere waco ri joma go olwoŋo ni, ‘Biye win, kole gimoro je otieko yikere.’

¹⁸To joje jocako kwayo cwaki ayino. Ŋati marapena owaco ni, ‘Atieko nyewo lowo, aka aripo kidho neno; akwayin icwaki ran.’

¹⁹Ŋati man owaco ni, ‘Atieko nyewo megikwe abic, aka onyo akidho temo jo; akwayin icwaki ran.’

²⁰Ŋati man owaco ni, ‘Kole nyaka anywomo manyen, riameno akinyali bino.’

²¹Gikenyo jatic no ogik to dwoko wac ri rwoth pere. Won peco owaco ri jatic pere no gi nge ni, ‘Kidhi i royo madwoŋ kodi i royo je m'okare i tindi, idwoki kodi jocandi gi jom'omienere gi joma waŋ gin otho kodi jom'oŋol.’

²²To jatic no owaco ni, ‘Jadwoŋ gim'iwaco no je otieko timere, to fodi kabedo nitie m'odoŋ.’

²³Aka won peco odoko owaco ri jatic no ni, ‘Kidhi i royo man woko ma tindi kodi i thengi royo moro je, ilwoŋ ji jowobin i ot paran, ot wopoŋ.

²⁴Awaco riwin ni ongoye moro kwoŋ jom'onwaŋo otel lwoŋo jo m'obil cemo paran.’ ”

²⁵Gikenyo lwak ji m'oasere oyido jokwaŋo Yesu; aka Yesu owire oŋiyo yucen to waco rijo ni,

²⁶ “Moro je ma bino bongan kinyal bedo jafonjirok paran ma k'okutho okwero bamere gi yokimere, kodi cege, kodi nyithindho pere gi wutmin gi nyimin, kiri gi kwo pere won.

²⁷Ŋata won kitiŋi musalaba pere aka luwan, kinyal bedo jafonjirok paran.

²⁸Ere ŋa kwoŋ win ma ka mito gero ot acurcur, kikuthi bedi piny to kwano welo pesa ma mitere, to neno ka nyalo cowo tic no kosa be?

²⁹Kak'ameno, ka go otieko gero tiendi ot, to cowo mere dhiero go, ji je ma joneno geto no jobino cako nyero go,

³⁰ka jowaco ni, ‘Neni win, ŋatin orikin cako geto gima go k'onyalo cowo.’

³¹Kosa, kere mene ma ka kidho romo gi kere man i lweny, kikuthi bedi piny to rango rieko paka go nyalo kwanyo jolweny gana apar kidho romo gi ŋati ca ma nitie gi jolweny gana piero ario?

³²Aka k'oneno ni kinyal, ka kere man ca fodi nibor ye, to dhiro rigo jamikwenda wokway winjirok ma siem i dier jo ayin.

³³Am'omiyo, i dier win ŋata kimaran loyo gimoro je ma go nitie gine, meno kinyal bedo jafonjirok paran.”

³⁴“Cumbi ber, to ka cwe mere orumo woko, bero no odoko ogik nedi?

³⁵Cumbi no ngoye kony ri lowo kosa ri kidhur yuk ma topo lowo; ikonjo woko ayin. Ŋata nitie gi ithe ma winjo wowinji.”