Read dhopadhola Luka 15 Bible Online

Luka 15 - dhopadhola bible

Luka 15

¹Ndelo moro jocoki misolo kodi joreco moro jobino bongi Yesu winjo go.

²Gikenyo Jofarisayo kodi Jondiko jocako kigeŋisa ni, “Ŋati me jolo joreco aka cemo kiri gi jo!”

³Am'omiyo, Yesu oluwo rijo iy'ageca ama:

⁴“Ŋa kwoŋ win ma ka nitie gi rombo miya acel, aka acel rwenyi, kiwey piero abuŋwen g'abuŋwen i sa to kidho rango m'orwenyo ca cuka onwaŋ?

⁵Aka ka otieko nwaŋo rombo no, tiŋo i goke gi kisangala.

⁶Gikenyo ka otundo peco lwoŋo merin gi joger pere munyo waco ni, ‘Biye sangala win kodan, rupiri atieko nwaŋo rombo paran m'oyido orwenyo.’

⁷Ameno bende awaco riwin, kisangala bino asirok i polo maloyo ro ŋat'acel ma ŋuto reco pere loyo ji m'otire piero abuŋwen g'abuŋwen ma kiyenyere rijo ŋuto kendo.”

⁸“Kosa dhako mene ma ka nitie gi nusu pesa ma siringi apar to rwenyo acel, kicwiny tala, to yweyo ot, to rango maber swa iye je cuka nwaŋo?

⁹Aka k'onwaŋo pesa no, lwoŋo merin gi joger pere kanyacel munyo waco rijo ni, ‘Biye sangala win kodan, rupiri anwaŋo pesa paran m'oyido orwenyo.’

¹⁰Ameno bende awaco riwin, kisangala nitie ri jomalaika pa Were ka jagimarac acel oŋuto reco pere.”

¹¹Yesu omedo waco ni, “Jal moro oyido nitie gi wote ario;

¹²wode mathin owaco ri bamere ni, ‘Baba, miyan pama lim je m'aripo lunjo.’ Gikenyo bajo opoko go lim pere.

¹³Ndelo okadho manok, to wode mathin no coko lim pere je m'onwaŋo go nitie gine, to kadho wiloka mabor, to nyeko woko lim pere no i kwo marac.

¹⁴Aka munyo ocowo nyeko woko gimoro je, kec madwoŋ odonjo i piny no to go bedo ma bu gimoro.

¹⁵Gikenyo go okidho bedo paka misemeli pa nyatoro i piny no to miyo go tic kwayo mbiji.

¹⁶Aka go d'osangala camo amola majanjal ma mbiji camo, to moro ongoye m'omiyo go gimoro.

¹⁷To munyo oparo i cunye, owaco ni, ‘Kole jotic pa baba je jonigi cemo ma jocamo denge to doŋ; to raŋo m'akidho tho kec ama!

¹⁸Alaay mayot t'adok bongi baba t'awaco rigo ni, baba, atieko nyeko ruwaŋ Were kodi i waŋin.

¹⁹Pama akiripi kad'alwoŋa ni wodin kendo; teran paka acel kwoŋ jotic perin.’

²⁰Gikenyo go oay mayot to cako woth ma dok bongi bamere.” “To munyo fodi go nitie bor ye gi peco, bamere oneno go; wor opoŋ i cunye to ringo, to podho i kor wode to cwiyo lembe.

²¹Gikenyo wode owaco ni, ‘Baba, atieko timo gimarac i nyim Were kodi i nyimin. Pama akiripi kad'alwoŋa ni wodin.’

²²To bamere olwoŋo jotic pere munyo waco ni, ‘Redi win! Keli win ruk mabeyo je wirwaki rigo. Rwaki win rigo peta i lwet cinge gi war i tiende;

²³aka kidhi wikel rwath dhiaŋ ma cwe no wineki, aka weyi konon wacam kalima.

²⁴Kole wodan me oyido otieko tho to pama onyo kwo; onwaŋo otieko rwenyo to pama onyo onwaŋere.’ Gikenyo to kalima cakere.”

²⁵“I hongo no wode madwoŋ oyido nitie i ndelo. To munyo dwoko aka oyido cegin riko peco, owinjo wer gi miel.

²⁶Gikenyo olwoŋo jatic acel to penjo go ni, ‘Aŋo ma timere?’

²⁷Jatic odwoko ni, ‘Omerin am'odwoko peco, aka benin oneko rwath ma cwe ca, rupiri wode odwoko maber, kendo m'olama.’

²⁸Omin madwoŋ nge omako to kwero kiri donjo i ot; gikenyo bamere owok woko to temo naŋo go ni wodonji.

²⁹To go odwoko bamere ni, ‘Neni! Atieko tic rin kweth oro me je, ma kicayin kada dicel, to kole ongoye kada nyathi diel m'imiyan nike bende atimi ye gine kalima ri merin paran.

³⁰Aka wodin m'onyeko lim perin gi mon ma jotana delkwoŋ jo i timo giwickwot me, am'onyo odwoko peco t'ineko rigo rwath dhiaŋ ma cwe!’

³¹Bamere odwoko go ni, ‘Wodan, kole ndelo je in kodan peco ka, aka gimoro je man gine meno aperin.

³²Aka oyido ripo ni watim kalima wasangala ye; kole omin in me onwaŋo otieko tho, to pama onyo kwo; onwaŋo otieko rwenyo, to pama onyo onwaŋere.’ ”