Read dhopadhola Luka 17 Bible Online

Luka 17 - dhopadhola bible

Luka 17

¹Yesu owaco ri jofonjirok pere ni, “Gigipiny ma miyo ji podho i gimarac ripo bino; to kidamba bino bedo ri ŋat'omiy gigipiny no timirok!

²D'ober rigo bedi tweyi kidi m'ombo i ŋute t'ibolo go i wakawaka, loyo go kidho miyo acel kwoŋ nyaka jomathindho me timo gimarac.

³Kure win! Ka omerin timo gimarac, kwer rigo, aka ka oŋuti, cwaki go.

⁴K'otimo rin marac dibirio ndelo acel, aka hongo je go bino bongin ka waco ni aŋuto, iripo cwako go.”

⁵Jomoor jowaco ri Rwoth ni, “Medi riwan yeyo mawan.”

⁶Rwoth odwoko ni, “Bedi winitie gi yeyo kada mathin paka nyingi kalantus di wiwaco ri yath madwoŋ me ni, ‘Fudhere woko gi tiendin ikidhi ipidhere i dier wakawaka, d'owinjo win.’ ”

⁷“Bedi moro kwoŋ win nitie gi jatic ma furo, kosa ma kwayo rombo, iparo ni ka jatic no odwoko wok i ndelo, d'owaco rigo ni, ‘Redi mayot ibedi piny ikutho icem?’

⁸K'ameno be! Kucel d'owaco rigo ni, ‘Kutho iyiki ran cemo m'othieno, itwey nanga i korin, ikuran k'acemo aka amadho gir'amadha, ŋey nyaka inocem rumacen.

⁹Odoko, i paro ni di go ofoyo jatic no k'otimo gim'oro go?’

¹⁰Ameno win bende ka witieko timo gimoro je m'owaci riwin, wiripo waco ni, ‘Wabedo riwan nyaka jotic atica, aka wacowo timo nyaka tic m'onwaŋo ripo watim kende.’ ”

¹¹Munyo Yesu oyido kidho Yerusalem, oluwo gi i kew ma poko Samaria kodi Galili.

¹²Aka munyo go oyido nyaka donjo loka moro, jodhowo moro japar joromo gine. Jocungo gi bor bor

¹³to jokoko rigo ni, “Yesu, Jadwoŋ! Maki wor gi wan.”

¹⁴Munyo Yesu oneno jo, owaco rijo ni, “Kidhi winyuthere i waŋ jocway ri Were i wi migam.” Gikenyo munyo fodi jowotho jokadho to delkwoŋ gin lokere m'olony.

¹⁵Ŋat'acel kwoŋ jo, munyo oneno ni kwoŋe ocango, ogik cen munyo pako Were gi derino madwoŋ swa,

¹⁶to podho piny dho ka tiendi Yesu to foyo go. Jalo oyido obedo Jasamaria.

¹⁷Gino omiyo Yesu openjo ni, “Alwoŋo ni ji apar je jolony; to jabuŋwen man jonikune?

¹⁸Ongoye ŋat'onyalo gik bino foyo Were kwanyo woko japath me kende?”

¹⁹Aka owaco ri jalo ni, “Ay malo imaki royo perin; yeyo perin otieko bothin.”

²⁰Jofarisayo megi jopenjo Yesu ndir ma Ker pa Were obin'iye. Go odwoko ni, “Ker pa Were kilabino i royo ma nenere.

²¹Ongoye ŋata bino waco ni, ‘Neni, ee ni ka, kosa ni kaca.’ Kole Ker pa Were nitie i dier win won ka.”

²²Aka owaco ri jofonjirok pere ni, “Hongo bino tundo ma wibino yenyo neno kada nyaka ndelo acel kwoŋ ndir pa Wod Dhano, to wikibino neno.

²³Nitie joma jobino waco riwin ni, ‘Neni, go dica!’ Kosa ni ‘Neni, go ee ka!’ To wikiri wiay ni wikidho rango go.

²⁴Kole paka lithkoth pilin i pondeponde aka menyo thenge gi thenge, apaka Wod Dhano bende obedi i ndelo pere.

²⁵To go ripo kutho candirok tektek, ji ma ndir me jowokwer go.

²⁶Paka cango obedo i ndir pa Nowa apaka bende bino bedo i ndir pa Wod Dhano.

²⁷Dhano je onwaŋo cemo, medho, aka cwo gi mon jonywomere cuka ndelo otundo ma Nowa odonj'iye i ye, aka mikula obino to neko woko ji je ma piny.

²⁸Odoko bino bedo paka i ndir pa Loti bende. Dhano je oyido cemo, medho, nyewere kendo tana, furo cemo aka geto.

²⁹To ndelo ma Loti owok'iye Sodom, mac maliel ocwe piny wok i polo to neko woko ji je ma kenyo.

³⁰Meno apaka bende labedo i ndelo ma Wod Dhano bino nyuther'iye.”

³¹ “I ndelo no, ŋata nitie malo wi ot wokiri wolori ni donjo i ot kwanyo gigipiny pere man kenyo; ameno bende, ŋata nitie i ndelo wokiri wodwoki peco.

³²Poyi win cipa Loti!

³³Ŋata temo botho kwo pere bino rwenyo woko; ŋata rwenyo woko kwo pere ama bino botho.

³⁴Wor no, awaco riwin, j'ario jobino nindo i kanindo acel; ŋat'acel ibino kwanyo t'iweyo ŋatiman kenyo.

³⁵Mon ario jobino rego kanyacel; acel ibino kwanyo t'iweyo nyawote kenyo.

³⁶[Cwo ario jobino bedo i ndelo: Ŋat'acel ibino kwanyo, t'iweyo nyawote kenyo].”

³⁷Gikenyo jofonjirok jopenjo go ni, “Yokune, Rwoth?” Yesu odwoko ni, “Kama gim'otho nitie iye, am'acut jocoker'iye.”