Read dhopadhola Luka 19 Bible Online

Luka 19 - dhopadhola bible

Luka 19

¹Yesu odonjo Yeriko aka oyido wotho i dier tindi.

²Nyatoro ma nyinge Zakayo oyido nikenyo; go oyido obedo acel kwoŋ jocoki misolo madongo kendo ŋat'oŋaŋ.

³Onwaŋo go yenyo swa ŋeyo Yesu ni obedo dhano ma nedi, to onwaŋo oasa ceko ma k'onyalo neno go ro lwak ji.

⁴Riameno go oyombere yumalo to idho musikamol ni wonyali neno Yesu m'oyido kidho luwo kenyo.

⁵Munyo Yesu otundo kanyago oŋiyo malo to luwo gine; owaco ni, “Zakayo, lori, kwakere rupiri aripo bedo i ot perin konon.”

⁶Go oloro mayot to jolo Yesu gi kisangala.

⁷To ji jocako kiŋunyaŋunya munyo joneno gima timere. Jowaco ni, “Jame okidho wendo ri jagimarac.”

⁸To Zakayo oay ocungo to waco ri Rwoth ni, “Jadwoŋ, akidho miyo jocandi adec ma lim paran, odoko ka nitie nyatoro m'atieko diyo kwoŋe gipere akidho dwoko rigo ma kalo meno diŋwen.”

⁹Aka Yesu owaco rigo ni, “Konon both otieko bino i ot me, paka jame bende obedo nyakwar Abraham;

¹⁰kole Wod Dhano obino dwaro gi botho jom'orwenyo.”

¹¹Munyo fodi jowinjo wac no, Yesu omedo luwo rijo iy'ageca rupiri go oyido oriko Yerusalem, aka ji oyido joparo ni Ker pa Were kidho tundo piyo no won.

¹²Riameno Yesu owaco ni, “Cango obedo jadwoŋ moro m'okidho i piny mabor ni woloki go kere aka nyaka wodwoki peco.

¹³Mafodi go koay, olwoŋo jotic pere apar bonge to miyo dhano je kwoŋ jo siringi gana acel acele, to waco ni, ‘Tiyi win gine wonywol magowa cuka anodwoki.’

¹⁴To paka anywola ma piny no oyido jodak ŋato, jodhiro jomikwenda pajo kidho waco ni, ‘Wakimiti jalo wobedi kere mawan.’ ”

¹⁵“Jadwoŋ no oloki go kere to ay dwoko. Piyo piyo olwoŋo jotic pere m'omiyo pesa bino bonge ka mito ŋeyo magowa ma jolimo.

¹⁶Jatic marapena obino to waco ni, ‘Jadwoŋ, alimo gana apar kwoŋ gana acel m'imiyan.’

¹⁷Go owaco ni, ‘Itimo maber, ijatic maber! Paka inyutho genirok i gimathin, onyo abino kethin kuro tindi apar.’

¹⁸Jatic mar'ario obino to waco ni, ‘Jadwoŋ, alimo magowa ma siringi gana abic kwoŋ pesa m'imiyan.’

¹⁹Go owaco ri ŋati me ni, ‘Ibino kuro tindi abic.’

²⁰Gikenyo jatic macowe obino to waco ni, ‘Jadwoŋ, siringi gana acel perin ee; akano m'opanere i kitambala.

²¹Ato onwaŋo alworin, rupiri in idhano ma jamahembi. Ikwanyo gim'iŋat'ikiketho, aka ikeco gim'iŋat'ikicwoyo.’

²²Jalo owaco ri ŋato ni, ‘Ijatic marac, abino thumo rin banja cungo kwoŋ wac perin won! Kere iŋeyo nike abedo jamahembi; ni akwanyo gim'akiketho, aka akeco gim'akicwoyo;

²³to raŋo ma ikiketho pesa paran i kakan, di ka adwoko d'anwaŋo omedere?’

²⁴Gikenyo go owaco ri jom'onwaŋo jocungo kenyo ni, ‘Kwany win woko pesa no kwoŋe aka wimiy jatic manitie gi gana apar ca!’

²⁵To jowaco rigo ni, ‘Jadwoŋ kole go nigi siringi gana apar.’

²⁶To go odwoko ni, ‘Awaco riwin, moro je manitie gi gimoro ibino medo go; to ŋat'ongoye gine, kada nyaka mathin ma go nitie gine ibino kwanyo kwoŋe.

²⁷Aka jokwor paran ma jokweran bedo kere pajo no keli win ka wineki jo ruwaŋan!’ ”

²⁸Munyo Yesu otieko waco gime, otelo kadho rijo Yerusalem.

²⁹Munyo go oriko Bethfage gi Bethania, dho got Oliv, odhiro jofonjirok ario yuwiye

³⁰munyo waco ni, “Kidhi win loka ma yuwiy win; ka widonjo loka no wibino nwaŋo nyathi punda m'otwey ma fodi dhano k'obedo i wiye, wigony to wikelo ka.

³¹Ka dhano openjo win ni, ‘Wigonyo punda no raŋo?’ Wiwaci rigo ni, ‘Rwoth ama mito.’ ”

³²Jokadho to jonwaŋo gimoro je paka Yesu owaco rijo.

³³Munyo jogonyo nyathi punda no, wegi mere jopenjo jo ni, “Wigonyo punda no raŋo?”

³⁴Jodwoko ni, “Rwoth ama mito.”

³⁵Jotero nyathi punda no ri Yesu. Gikenyo jobolo nangin pajo wi kayina no to joketho Yesu i wiye.

³⁶Munyo Yesu kadho, jopedho nangin pajo i royo malomalo.

³⁷Aka munyo Yesu oriko Yerusalem dho kama royo lor'iye yu Got ma Oliv, jofonjirok pere mathoth jocako foyo Were gi pako go gi dwondi gin ma malo ro gigipiny madongo ma jotieko neno.

³⁸Jowaco ni, “Silwany wobedi ri Kere ma bino i nyingi Rwoth! Siem wobedi i polo, aka dwoŋ wobedi ri Were!”

³⁹Gikenyo Jofarisayo moro i dier lwak ji jowaco ri Yesu ni, “Jafonji, waci ri jofonjirok perin jowoliŋ!”

⁴⁰Yesu odwoko ni, “Ka joliŋ, awaco riwin, telin ama jobino koko.”

⁴¹Yesu otundo cegin gi tindi madwoŋ aka munyo oneno tindi no, oywako

⁴²munyo waco ni, “Bedi kada konon won iŋey gima d'okelo rin siem! To gino opanere ri waŋin.

⁴³Kole ndelo bino tundo ma jokwor perin jobino kuny'iye bur wugo thokin to jocegin iye je.

⁴⁴Jobino reyin woko kicutho gi ji manitie i cel perin; ongoye tele kad'acel ma jowey i wiy nyawote, rupiri ikinyalo ŋeyo ndir ma Were owend'iye rin.”

⁴⁵Yesu odonjo i Ot pa Were to cako riemo woko jomitan

⁴⁶munyo waco rijo ni, “Ondiki ni, ‘Ot paran ibino lwoŋo ni Ot ma kwayo.’ Am'onyo wiloko ŋungu ma pondo pa jokwo ayin.”

⁴⁷Yesu ofonjo i Ot pa Were kisi ndelo. Jotel pa jocway ri Were i wi migam, Jondiko, kodi jotel pa ji oyido joyenyo neko go,

⁴⁸to jok'onwaŋo yo ma timo ameno, rupiri ji je oyido jociko ithi gin winjo go gi maro madit.