Read dhopadhola Luka 2 Bible Online

Luka 2 - dhopadhola bible

Luka 2

¹I ndir no, Kayisar Agusto owodho cik ma ndiko ji ŋey wokwan ji ma piny pere gipi.

²Me oyido obedo ndiko ji marapena, aka obedo i ndir pa Kwirino jadhum ma Siria.

³Dhano je okidho i tindi ma thugin ndikirok.

⁴Riameno Yozefu bende oay i tindi ma Nazareth, i Galili to kidho Yuda i tindi pa Daudi m'ilwoŋo ni Bethelehem, paka go oyido obedo ja ot pa Daudi.

⁵Yozefu okidho ni wondiki go gi Maria m'onwaŋo yiko nywomirok gine. Maria oyido yac.

⁶Munyo jonitie kenyo, hongo pa Maria otundo ma nywol.

⁷Go onywolo wode makayo to umo gi nangin pa nyithindho, to pielo i wer ma dhok cem'iye rupiri kabedo k'onwaŋere rigo i ot wendo.

⁸Cegin kenyo onwaŋo nitie jokwath moro m'oyido jo ni sa jokuro mwendi pajo wor gi weso.

⁹Malaika pa Rwoth omenyere rijo, aka dwoŋ pa Were omenyo jo, to jobwok swa.

¹⁰Malaika owaco rijo ni, “Wikiri wibedi gi lworo; kole akelo riwin wac kwoŋ kisangala madwoŋ ma bino bedo ri ji je.

¹¹Konon i tindi pa Daudi onywol riwin Jaboth, m'obedo Kristo Rwoth.

¹²Aka me a ranyuth riwin, wibino nwaŋo nyathi maŋic m'oboy i nangin pa nyithindho t'ipielo i wer ma cemo dhok.”

¹³Gikenyo ma piyo piyo, kweth jomalaika ma polo joriwere gi malaika no to jofoyo Were munyo jowero ni,

¹⁴“Dwoŋ wobedi ri Were malo i polo, aka i piny siem wobedi ri ji ma silwany pere nigi jo.”

¹⁵Munyo jomalaika jotieko weyo jo jogik i polo, jokwath jowaco wegi kendi gin ni, “Weyi wakidhi Bethelehem wanen gim'otimere ma Rwoth onyutho wan me.”

¹⁶Gikenyo joredo to jonwaŋo Maria gi Yozefu kodi nyathi m'opiel i wer ma cemo dhok.

¹⁷Munyo joneno nyathi no, jowaco ri ji gima malaika owaco rijo kwoŋ nyathi no.

¹⁸Jom'owinjo wac me jouro swa gima jokwath no jowaco.

¹⁹Maria opoyo gigipiny me je to paro kwoŋe swa.

²⁰Jokwath jodok munyo jofoyo Rwoth to jopako Were ro gigipiny je ma jowinjo aka joneno ni obedo paka owaci rijo won.

²¹Munyo ndelo mar'aboro ma thumo Nyathi otundo, ocwoki nyinge ni Yesu, nyinge ma malaika omiyo go mafodi k'ogam go i iy min.

²²Munyo ndelo otundo ri Yozefu kodi Maria ma tero cowirok ma lonyirok paka Cik pa Musa waco, jotero Nyathi no i Yerusalem ketho go i cingi Rwoth.

²³ (Me a gim'ondiki i cik pa Rwoth ni, “Nyathi ma jacwo je m'obedo okayo pa min, ibino miyo Rwoth.”)

²⁴Aka jotero kiri mic bende paka ondiki i cik pa Rwoth: Akurin ario kosa nyithindhi njiwa ario.

²⁵I Yerusalem kenyo onwaŋo nitie jal moro ma nyinge Simeo. Go oyido obedo dhano maber m'olworo Were, aka onwaŋo kiyo neno both pa Isiraili, kendo Cuny Maleŋ onwaŋo nigi go.

²⁶Cuny Maleŋ onwaŋo otieko nyutho go ni go kilatho mafodi waŋe k'oneno Kristo pa Rwoth.

²⁷Munyo Cuny Maleŋ owaco rigo, Simeo oay to kidho i Ot pa Were. Aka munyo jonywol jokelo Nyathi Yesu timo rigo gima Cik waco,

²⁸Simeo otiŋo Nyathi no i cinge to foyo Were ka waco ni,

²⁹“Rwoth, onyo pama sewila ŋeca perin i siem paka cango iciko;

³⁰Kole waŋan otieko neno both

³¹m'iyiko ni ji je jowoneni.

³²Lero ma bino menyo ri Jopath royo pa Were, to kelo dwoŋ ri ji perin Isiraili.”

³³Ba nyathi gi yokimere jocungo kenyo munyo jodhier kwoŋ gima Simeo oyido waco kwoŋ Nyathi no.

³⁴Simeo omiyo jo silwany to waco ri Maria min Nyathi ni, “Nyathi me othuy gine ji wokel podho ri joman kodi both ri ji mathoth i Isiraili; go bino bedo ranyuth ma ji mathoth jobino piemo gine.

³⁵To paro pa ji mathoth m'opanere bino wok kamaler, aka abor bino roko adundo nin won.”

³⁶Kenyo onwaŋo nitie dhakodwoŋ moro ma jatuci wac Were ma nyinge Ana, nyar Fanuel, ma janono pa Aser. Go oyido oti swa aka otieko oro abirio i nywomirok pere to cwore tho,

³⁷to doŋ citho cuka oro pere oromo piero aboro g'aŋwen. Go k'oweyo Ot pa Were, to otiyo ri Were wor g'odieceŋ munyo riyo kec gi kwayo.

³⁸I hongo no won ama go bende odonj'iye i Ot pa Were to cako foyo Were; aka oluwo kwoŋ Nyathi no ri ji je m'onwaŋo jokuro both pa Yerusalem.

³⁹Tekin jotieko timo gimoro je ma Cik pa Rwoth waco, jodok Galili i tindi pajo ma Nazareth.

⁴⁰Nyathi no odongo gi meni, gi rieko, kendo silwany pa Were obedo gine.

⁴¹Kisi oro jonywol pa Yesu bin jokidho Yerusalem i ndelo ma Kalima ma Kadho.

⁴²Munyo Yesu oromo oro apar g'ario, jokidho korago i kalima paka oyido jotimo ndir je.

⁴³Munyo kalima no orumo, jomako royo ma dok peco, to jayac Yesu odoŋ Yerusalem. Jonywol pere oyido jok'oŋeyo ameno.

⁴⁴Paka oyido joparo nike go nitie i kitipa ji ma jowotho gi jo, jowotho awotha ndelo gipi, to nyaka jocako rango go bongi wade pajo gi merin pajo.

⁴⁵To munyo jok'onwaŋo go, jogik Yerusalem munyo jorango go malomalo.

⁴⁶I ndelo mar'adek aka jonwaŋo go i Ot pa Were obedo i dier jofonji, munyo winjo fonji pajo aka penjo jo penji moro.

⁴⁷Ji je ma jowinjo go jouro swa rieko gi radwok pere.

⁴⁸Jonywol pere jodhier munyo joneno go; aka yokimere owaco rigo ni, “Nyathi paran, itimo riwan ama raŋo? Panen, benin kodi an wabedo gi rembo ma kiwacere munyo warangin.”

⁴⁹Odwoko jo ni, “Raŋo ma wirangan? Wikuya nike oyido aripo bedo i ot pa Baba?”

⁵⁰To jok'oŋeyo dwoŋ gima go owaco rijo.

⁵¹Gikenyo Yesu odok gi jo Nazareth to winjo or pajo. Yokimere okano gigipiny me je iy'adundo.

⁵²Yesu odongo i delkwoŋe aka rieko pere omedere, munyo Were gi ji jofoyo go.