Read dhopadhola Luka 21 Bible Online

Luka 21 - dhopadhola bible

Luka 21

¹Yesu otiŋo waŋe malo to neno munyo ji jobolo mic pajo i kakan ma Ot pa Were.

²Aka oneno citho moro ma jacandi tektek bende bol'iye dome ario.

³Gikenyo owaco ni, “Adieri awaco riwin, citho ma jacandi me obolo mic maloyo apa joman je.

⁴Ato joman jokelo mic ma wok kwoŋ ŋaŋo pajo ma jokano; to go, kada jacandi rigo, omiyo gimoro je ma d'okwo gine.”

⁵Joman kwoŋ jo oyido joluwo kwoŋ Ot pa Were, paka neno maŋon gi telin mere kodi mic m'icwayo ri Were manitie i iye. Yesu owaco ni,

⁶“Kwoŋ gima wineno me je, hongo bino tundo m'ongoye tele kad'acel ka m'ibino weyo wi nyawote ma k'okedhi woko.”

⁷Gikenyo jopenjo Yesu ni, “Jafonji, gime bino timere keraŋo? Kendo aŋo m'onyuth ni ndir otundo ri gino ma timirok?”

⁸Yesu owaco ni, “Kure win moro wokiri wowondi win; kwoŋbedo ji mathoth jolabino i nyingan ka jowaco ni, ‘An ago!’ Kendo ni, ‘Ndiri ago otundo!’ Wikiri wiluw jo.

⁹Lworo wokiri womaki win ka wiwinjo ji luwo kwoŋ lweny kodi gwenyirok pa ji kwoŋ adhum; gigipiny ma pameno ripo kutho timirok, to meno kinyuthi ni gigipiny bino mayot.”

¹⁰Go omedo waco ni, “Piny acel bino lwenyo gi man, ker acel gi man, yengirok pa piny madongo bino bedo, kec kodi tho bino bedo kisi kamoro je.

¹¹Musisi madongo, kec kodi two nundu i kabedo m'opokere, aka bino bedo gigipiny ma bwoko ji tektek kodi ranyuth madongo ma wok i polo bino timere.”

¹²“Mafodi gigipiny me je k'otimere, ibino mako win to icando win; ibino tero win i kalamo pa Joyuda kodi i jiera; ibino tero win i waŋ kerin kodi jodhum ro nyingan.

¹³Me bino bedo hongo mewin ma tito Wac Manyen Maber ri jono.

¹⁴Kethi win paro me i cuny win, ni wikiri wikwakere rango radwok mewin wegi.

¹⁵Kole abino miyo win wac kodi rieko ma ongoye jakwor mewin ma bino ciro kosa kwero gima wiwaco.

¹⁶Kiri jonywol mewin, wutmin win, wade mewin, gi merin mewin je jobino kwedo win; jobino neko jomegi kwoŋ win.

¹⁷Dhano je bino mon kodi win ro wac paran.

¹⁸To ongoye kada ye wiy win acel ma bino rwenyo.

¹⁹Ciri win matek, kole me apaka wibino botho kwo mewin.”

²⁰“Ka wineno lwak jolweny jothoko Yerusalem, gikenyo wibino ŋeyo nike ilareyo woko go mayot.

²¹Gikenyo joma nitie i Yuda joworingi wi gote; joma nitie i tindi no jowoeye woko, aka joma nitie woko ma tindi kiri jowodonji i tindi.

²²Kole me obedo, ndelo ma gir'acula m'amiyo gimoro je ma Ndiko Maleŋ oluwo kwoŋe wotimere.

²³Kidamba madwoŋ bino bedo ri mon ma joyac kodi megi nyithindho maŋic i hongo no! Litho madwoŋ swa bino bedo i piny me, aka Were bino kigaga tektek gi ji me.

²⁴Ibino neko jo g'abor, t'itero jo paka ŋecin i piny moro je, aka Jopath jobino wotho wi Yerusalem cuka ndir ma dhum pajo orum kicutho.”

²⁵“Ranyuth bino bedo i waŋceŋ, i dwe, i micalin i piny, aka piny je jobino rem m'ongoye geno, munyo jolworo kitula gi derino ma mor pa wakawaka.

²⁶Ji jobino bwok to cuny gin tho gi lworo munyo jokuro gima bino i piny gipi: Rupiri meni man polo bino yengere.

²⁷Gikenyo nyaka ji jobino neno Wod Dhano munyo loro wi pondeponde gi meni kodi dwoŋ m'oasere.

²⁸Ka gigipiny me cako timirok, cungi win, witiŋ waŋ win malo rupiri both mewin ocore cegin.”

²⁹Gikenyo Yesu oluwo iy'ageca ni, “Poyi win makuyu kodi yen man je.

³⁰Ka wineno boke mere ocako lothi, wiŋeyo ni ceŋ cegin liel.

³¹Am'omiyo bende ka wineno gigipiny me timere, ŋey win ni Ker pa Were cegin bino.”

³²“Adieri awaco riwin, luse ji ma ndir me jok'otho jorum mafodi gigipiny me je k'otimere.

³³Polo gi piny bino rumo woko to wac paran kilarumo.”

³⁴“To gwokere win, cuny win wokiri wopoŋ awanya ma piny gi mero gi rembo ma kwo me, rupiri ndelo no nyalo coro win pa bwo m'ociki gine win.

³⁵Kole Ndelo no bino tundo ri ji je man piny gipi p'apormalo.

³⁶Kendo kure win aka wikway noknok nike wibedi gi meni ma ciro gigipiny ma bino timere me je to wicungo i nyim Wod Dhano.”

³⁷Yesu ocowo ndelo moro munyo fonjo i Ot pa Were, to i dier wor go oyido omaro wok woko to bedo wi Got Oliv.

³⁸Aka odikin maŋic, ji je oyido jokidho bonge i Ot pa Were winjo fonji pere.