Read dhopadhola Luka 22 Bible Online

Luka 22 - dhopadhola bible

Luka 22

¹Gikenyo kalima ma mugat ma buthow, m'ilwoŋo ni ma Kadho, oyido ocore cegin.

²Jotel pa jocway ri Were i wi migam kodi Jondiko onwaŋo jotemo rango royo ma neko Yesu, to oyido jolworo ji.

³Gikenyo Sitan odonjo i Yuda, m'ilwoŋo ni Iskariot, m'onwaŋo obedo acel kwoŋ jofonjirok apar g'ario.

⁴Ameno Yuda okadho to luwo kodi jotel pa jocway ri Were i wi migam kodi jotel pa jolweny ma Ot pa Were kwoŋ yo ma go d'onyalo ketho gine Yesu i cingi jo.

⁵Josangala to joyeyo miyo go pesa.

⁶Yuda oyeyo to cako rango hongo maber ma ketho Yesu i cingi jo ma ji madit jongoye cegin.

⁷Ndelo ma camo mugat ma buthow, m'inek'iye rombo ma wote ma nyaka ay m'icowere gine i kalima ma Kadho otundo.

⁸Riameno Yesu ooro Petero gi Yohana gi wac me: “Kidhi wiyiki cemo mawan m'othieno ma kalima ma Kadho wacam.”

⁹Jopenjo ni, “Iyenyo wayiki yukune?”

¹⁰Go odwoko ni, “Panen win, ka witieko donjo i tindi, ŋatimoro m'otiŋo dak pi bino romo gi win. Wiluw go kiri i ot ma go odonj'iye.

¹¹Aka wiwaci ri won ot no ni, jafonji penjin ni nikune ot wendo ma an kodi jofonjirok paran wanocam'iye Kalima ma Kadho?

¹²Go bino nyutho win ot malac man malo, kama winoyik'iye gimoro je.”

¹³Jokidho aka jonwaŋo gimoro je paka Yesu owaco rijo, to joyiko cemo m'othieno ma kalima ma Kadho kenyo.

¹⁴Munyo hongo otundo, Yesu obedo dhower gi jomoor pere.

¹⁵Aka owaco rijo ni, “Onwaŋo awanya camo gi win Kalima ma Kadho me mafodi akicandere.

¹⁶Ato awaco riwin, ak'odoko acami cemo kendo cuka gigipiny otimere paka ripo i Ker pa Were.”

¹⁷Gikenyo okwanyo kikopo, oketho Were walwa, to waco ni, “Joli win gime wimadhi giman'iye wijoje,

¹⁸rupiri awaco riwin, wok gunyo ni akibino madho vini kendo cuka Ker pa Were obin.”

¹⁹Gikenyo okwanyo mugat, oketho Were walwa, oturo, to miyo jo jowocami, munyo waco ni, [“Me delkwoŋan m'omiy win. Tim win ameno noknok ma poyan”].

²⁰I yo acel no bende, omiyo jo kikopo, munyo cemo m'othieno orumo, ka waco ni, “Kikopo me obedo cikirok manyen m'oridhi gi remo paran ma bino oy riwin.

²¹To neni win, ŋata camo ran sereko nitie dhower ka kodan!

²²Kole Wod Dhano bino tho paka Were oyiko; to kidamba madwoŋ bino bedo ri ŋat'osita go!”

²³To jocako penjirok wegi kendi gin ni ŋa kwoŋ jo ma d'otimo gino.

²⁴Piem owok i dier jofonjirok ni ŋa kwoŋ jo ama woter paka nigi dwoŋ loyo wadi.

²⁵Yesu owaco rijo ni, “Kerin ma piny ka jodhumo ji pajo gi mbaka, aka joma jodhum joyenyo ni woker jo ni jokony pa ji.

²⁶ To me k'apaka nitie gi win; kucel, ŋata loyo dwoŋ i dier win ripo lokere pa ŋatathin loyo, aka jatel ripo bedo paka jatic ri wadi.

²⁷Kere ŋa maloyo dwoŋ; ŋata bedo piny cemo, kosa ŋata poko cemo? Ki ŋata bedo piny be? To kole an abedo i dier win paka jatic mewin.

²⁸Witieko bedo kodan i hongo ma teko paran je,

²⁹to paka Baba omiyan Ker, abende abino timo riwin ameno.

³⁰Wibino cemo gi oro gir'amadha dhower paran i Ker paran, to wibedo wi kombere ma Ker munyo withumo banjin ri nonin apar g'ario ma Isiraili.”

³¹“Simon, Simon, panen! Sitan oridho ri Were ni yenyo win, ŋey woyeki win pa nyingi kal.

³²To atieko kwayo riwin, nike yeyo mewin wokiri worum woko. Aka k'itieko gik bongan, imiy wutmin in meni.”

³³Petero odwoko ni, “Rwoth, ayere kidho i twec kendo kada tho kodin!”

³⁴Yesu odwoko go ni, “Awaco rin, Petero, wod gweno k'okoki konon, cuka munyo icowo kwedirok kwoŋan didek ni ikuya an.”

³⁵Gikenyo Yesu owaco rijo ni, “Munyo adhiro win woko i ndir ca ma wikitiŋo mugowa pesa, mugowa moro je kosa war, wicando ye gimoro?” Jodwoko ni: “Ongoye gima wacando.”

³⁶Yesu omedo waco ni, “To pama ŋata nitie gi mugowa pesa kosa mugowa moro wokwany; aka ŋat'ongoye g'abor wotana kot pere wonyewi gine.

³⁷Kole awaco riwin gime: Ndiko maleŋ waco ni, ‘Okwan go kwoŋ joreco.’ Apaka bino timere kwoŋan; ato gim'ondiki kwoŋan onyo kidho timirok.”

³⁸Jofonjirok jowaco ni, “Panen, Rwoth, abor ario ee!” Go odwoko ni, “Meno romo.”

³⁹Yesu oay okadho wi Got olivet, paka yado oyido omaro timo, aka jofonjirok joluwo go korago.

⁴⁰Munyo go otundo kenyo, owaco rijo ni, “Kway win aka ŋey wik'odonji i karatem.”

⁴¹Aka oeye bongi jo to core kama romo boro ma lowo abola, to guro conge piny to kwayo.

⁴²Owaco ni, “Baba, ka imito, kwany woko agwata me kwoŋan. Kad'ameno, wokiri wobedi paka aŋat'amito, to gim'imito ama wotimere.”

⁴³[Gikenyo malaika owok i polo, omenyere rigo, to miyo go meni.

⁴⁴G'arama cuny madwoŋ, go omedo kwayo gi geregere; i hongo no kwok pere onwaŋo cale remo ma thon piny].

⁴⁵Munyo oay i kwayo pere, ogik bongi jofonjirok pere to nwaŋo jonindo, rupiri oyido jonyocere gi rem.

⁴⁶Aka owaco rijo ni, “Raŋo winindo? Ay win wikway aka nyaka wik'odonji i karatem.”

⁴⁷Munyo Yesu fodi luwo, lwak ji otundo; Yuda, acel kwoŋ jofonjirok apar g'ario, otelo jo, aka obino bongi Yesu to podho i kore to cwiyo lembe.

⁴⁸To Yesu owaco ni, “Yuda, icamo sereko ri Wod Dhano gi rendirok ni icwiyo lembe?”

⁴⁹Munyo jofonjirok m'onwaŋo jonitie gi Yesu joneno gim'onwaŋo kidho timirok, jowaco ni, “Rwoth, watoŋ jo g'abor mawan?”

⁵⁰Aka ŋat'acel kwoŋ jo otoŋo ŋeca pa jadwoŋ pa jocway ri Were i wi migam to codo woko ithe maracuc.

⁵¹To Yesu odwoko ni, “Gime wokiri womedere!” Aka ogeyo ithi jalo to cango.

⁵²Gikenyo Yesu owaco ri jotel pa jocway ri Were i wi migam kodi jokur ma Ot pa Were kodi jotel pa ji m'onwaŋo jobino kenyo mako go ni, “Wibino ran g'abor g'abirin paŋini abedo jakwo?

⁵³Munyo abedo gi win ndelo je i Ot pa Were, wikitemo makan, to me onyo a hongo mewin kodi apa jameni ma mudho ma timo ameno.”

⁵⁴Gikenyo jomako Yesu to jotero go i ot pa jadwoŋ pa jocway ri Were i wi migam; aka Petero oluwo jo gi bor bor.

⁵⁵Onwaŋo omoki mac moro i diedipo kenyo, to Petero bende mako oyo mac no gi jom'onwaŋo jooyo.

⁵⁶Munyo acel kwoŋ jotic manyir oneno go obedo piny dho mac, oŋiyo go swa to waco ni, “Ŋatin oyido bende ni bonge!”

⁵⁷To Petero kwedere ni, “Dhako me, akuya ran go!”

⁵⁸Hongo macek okadho to ŋatiman neno Petero to waco ni, “In acel kwoŋ jonago!” To Petero odwoko ni, “Ojame, ki an!”

⁵⁹Aka munyo sawa acel okadho, jal moro omedo waco g'amen ni, “Ongoye kiganagana ni ŋati me bende oyido nitie bonge, rupiri go bende Jagalili!”

⁶⁰To Petero odwoko ni, “Ojame, akuya gim'iluwo kwoŋe!” Gikenyo won, munyo fodi go luwo, wod gweno okoko.

⁶¹Rwoth owire oŋiyo Petero, aka Petero opoyo wac pa Rwoth, paka owaco ni, “Mafodi wod gweno k'okoko konon, ibino kwedere kwoŋan didek.”

⁶²Gikenyo Petero owok to ywak malith.

⁶³Ji m'onwaŋo jokuro Yesu joyeto go to jocwado go.

⁶⁴Joboyo waŋe gi nanga aka jopenjo go ni, “Ŋat'ogoyin ŋa? Tuci riwan!”

⁶⁵Aka jowaco gigipiny man madit ma yeto go.

⁶⁶Munyo piny oyawere, kitipa pa jotel pa Joyuda kodi jotel pa jocway ri Were i wi migam kodi Jondiko joromo kanyacel, t'itero Yesu i kapido pajo.

⁶⁷Ana jo ni, “Waci riwan, in a Kristo?” Go odwoko jo ni, “K'awaco riwin, wik'oyey;

⁶⁸aka k'apenjo win penji, wik'odwokan.

⁶⁹To wok pama kadho yuwaŋe, Wod Dhano bino bedo yuracuc pa Were Majameni je.”

⁷⁰Joje jopenjo ni, “Kere in i Wod Were?” Go odwoko jo ni, “Kole eno wiwaco.”

⁷¹Jowaco ni, “Odoko wayenyo wac mene kendo ma ridho gime! Kole ee wawegi watieko winjo wac m'owok i dhoke won!”