Read dhopadhola Luka 5 Bible Online

Luka 5 - dhopadhola bible

Luka 5

¹Yesu ocungo dho wakawaka ma Genesaret to lwak ji ma joyenyo winjo wac pa Were jodire kwoŋe.

²Yesu oneno ye moro ario dho thengi wakawaka; kareno jokitoga ma wegi mere onwaŋo jongoye kenyo oyido jokidho lwoko bwo pajo

³Gikenyo Yesu odonjo i ye acel, mapa Simon Petero, to kwayo go ni wodhire i pi gi ye no nyaka mathin wok kwoŋ geŋin.

⁴Aka munyo obedo i ye, ofonjo lwak ji no gi i ye. To munyo ocowo luwo, owaco ri Simon ni, “Cori ye i wakawaka milelo wiboli bwo mewin wimaki rec.”

⁵To Simon odwoko go ni, “Jadwoŋ, kole watieko kifamba wor gipi m'ongoye gima wamako! To rupiri iwaco, akidho bolo bwo.”

⁶Munyo jotieko timo ameno, jomako rec mathoth swa ma bwo onwaŋo cegin kiri gi yec woko.

⁷Aka jolwoŋo jowoti jo m'oyido jonitie i ye man gi cingi gin ni jobin jowokony jo. To jono jobino to jopoŋo ye ario je mapa jokidho munyirok i pi.

⁸Munyo Simon Petero oneno ameno, opodho ka tiendi Yesu munyo waco ni, “Eye bongan, Rwoth, rupiri ajareco.”

⁹Ato go kodi jowote je, oyido jobwok tektek ro kweth rec ma jomako.

¹⁰Yakobo kodi Yohana, wot Zebedayo, ma jobedo jowoti Simon, je bende jobwok. Aka Yesu owaco ri Simon ni, “Ikir'ibedi gi lworo! Wok gunyo ni, ibino kitoga ji.”

¹¹Aka munyo jotieko cewo ye kiri dho geŋin, joywayo jowodho woko, to joweyo gimoro je to joluwo Yesu.

¹²Munyo Yesu oyido nitie i tindi moro, jadhowo moro ma kwoŋe gipi odhole obino. Munyo go oneno Yesu, opodho piny gi nyime to ywakere rigo ni, “Rwoth, k'iyenyo inyalo lonyan.”

¹³Yesu ocwayo cinge, ogeyo go munyo waco ni: “Ayenyo, riameno lony.” Gikenyo won, dhowo oware kwoŋe.

¹⁴Aka Yesu ociko go teltel ni, “Ikir'iwaci ri nyatoro; to kidhi inyuthere ri jacway ri Were i wi migam, aka iter mic paka Musa ooro, ma nyutho gine ji ni onyo ilony.”

¹⁵To wac omedo nyay ayino, aka lwak ji jocokere winjo fonji pere gi limo both kwoŋ two pajo.

¹⁶To Yesu okidho i thim kwayo paka oyido omaro timo.

¹⁷Ndelo moro munyo Yesu fonjo ji, Jofarisayo moro kodi Jondiko ma jowok iy'adec ma Galili kodi Yuda kodi Yerusalem bende jobino kenyo; aka go oyido opoŋ gi meni pa Rwoth ma cango two.

¹⁸Gikenyo cwo moro jokelo rigo nyatoro ma two nyaŋinya wi kitanda. Jono jodwaro yo ma kelo go bongi Yesu.

¹⁹To paka royo odhiero jo ma rwako go ro lwak ji, joidho wi ot aka jocwayo go bongi Yesu gi kitanda pere gi i hola ma jomwomo wi kisul ot.

²⁰Munyo Yesu oneno yeyo pajo owaci ni, “Jal me, reco perin ocwaki rin.”

²¹To Jondiko kodi Jofarisayo jocako kigeŋisa munyo wegi jopenjere ni, “Ŋatin ŋa ma luwo gima k'otire kwoŋ Were ama? Ŋata bende nyalo cwako reco kwanyo woko Were won?”

²²Munyo Yesu oniaŋ ni jogesa ameno, odwoko ni, “Raŋo ma widaŋin gi i cuny win?

²³Aŋo mayot waco? Ni, ‘Reco perin ocwaki rin, kosa ni, ay malo iwothi?’

²⁴Ere me ma miyo win ŋeyo ni Wod Dhano nitie gi meni i piny ka ma cwako reco.” Go owaco ri ŋata two nyaŋinya ni, “Awaco rin, ay malo ikwany kitanda perin idok peco.”

²⁵Piyo piyo no ŋato oay ruwaŋ jo, okwanyo kitanda m'oyido go onind'iye, to dok peco munyo miyo Were dwoŋ.

²⁶Aka ji je jouro swa, to jopako Were gi lworo, munyo jowaco ni, “Konon waneno gigipiny ma yado fodi wakineno.”

²⁷Gikenyo Yesu owok to neno jacoki misolo ma nyinge Levi, obedo piny dho cegin gi ot misolo; to waco rigo ni, “Luwan.”

²⁸Levi oweyo gimoro je, oay, to luwo go.

²⁹Levi oyiko rigo kalima madwoŋ peco pere; aka kweth pa jocoki misolo kodi joman jobedo gi Yesu dhower.

³⁰To Jofarisayo kodi Jondiko, jogesa gi jofonjirok pa Yesu munyo jopenjo ni, “Raŋo ma wicemo aka wimedho gi jocoki misolo kodi joreco?”

³¹To Yesu odwoko jo ni, “Jom'olama ama jokiyeny jamilerwa, to joma two ayino ama joyenyo;

³²kole akibino lwoŋo jomabeyo, to joreco ayino ni jowoŋuti reco pajo.”

³³Aka jowaco ri Yesu ni, “Jofonjirok pa Yohana kodi apa Jofarisayo joriyo kec adhik, to kole joperin jocemo aka jooro gir'amadha.”

³⁴To Yesu owaco rijo ni, “Inyalo miyo jom'olwoŋ i kalima ma nywomirok riyo kec nedi ma to jamweha fodi nitie gi jo?

³⁵Kole ndelo bino tundo m'ilakwany'iye woko jamweha bongi jo, aka nyaka jobino riyo kec.”

³⁶Yesu oluwo rijo iy'ageca bende ni, “Ongoye ŋata yeco kiremo nanga manyen to kwoyo wi nanga m'oti; k'otimo ameno, go nyalo yeco woko nanga manyen no, odoko kiremo manyen bende kilaripo gi macon.

³⁷Aka ongoye ŋata kako medho ma vini manyen i mugowa piendere m'oti rupiri medho no bino yeco woko piendere no to oy, gikenyo to piendere nyekere woko.

³⁸Be! Medho ma vini manyen ripo kako i mugowa piendere mere manyen.

³⁹Aka ongoye ŋat'otieko madho vini ma ndoto m'odoko mito manyen. Go waco ni ndoto amaber.”