Read dhopadhola Luka 8 Bible Online

Luka 8 - dhopadhola bible

Luka 8

¹Rumacen Yesu owotho i tindin kodi loka m'omore munyo tito aka fonjo Wac Manyen Maber kwoŋ Ker pa Were. Japar g'ario onwaŋo jo ni bonge,

²kanyacel gi mon moro m'obothi jo kwoŋ cuny m'ocido kodi i two pajo; Maria m'oyido ilwoŋo ni Magadalina, m'oriem kwoŋe jwogi abirio.

³Yoana cipa Kuza, jatic madwoŋ i ot pa Herode, kodi Susana, kodi joman kweth m'onwaŋo jokonyo wendo gi gigipiny ma wegi jokelo.

⁴Ji jowok i tindin m'opokere opokere jobino bongi Yesu; aka munyo lwak ji ocokere, Yesu oluwo rijo iy'ageca ama:

⁵“Dhano moro okidho cwoyo kodhi pere, aka munyo go bayo kodhi, megi opodho i dier royo, to ji nyono gi tiendi gin, to winyin bino dimo woko.

⁶Kodhi megi opodho wi tele kama lowo rep'iye; aka munyo kodhi no otwi, okwako ner, rupiri lowo oyido rep, to munyo odongo, othwo woko, rupiri lowo oyido othwo.

⁷Kodhi megi opodho i kudhin; aka kudhin odongo gi jo to diyo jo woko.

⁸Aka megi opodho i lowo ma diwa; odongo to nyak, nyingi gin miya acel kisi tiende acel.” Munyo otieko waco ama, okoko malo ni, “Ŋata nigi ithe ma winjo wowinji.”

⁹Aka munyo jofonjirok pere jopenjo go dwoŋ ageca me,

¹⁰Yesu odwoko ni, “Win omiy win niaŋ kwoŋ nyaliŋliŋ ma Ker pa Were; to joman ifonjo jo g'agecin, makada joŋiyi, jokinen, kada jowinji jokiniaŋ dwoŋ gima jowinjo.”

¹¹“Me a dwoŋ ageca no: Kodhi meno wac pa Were.

¹²Kodhi m'opodho i dier royo, meno a joma jowinjo, to jwogi bino to kwanyo woko wac i cuny jo, ŋey jokiri jowoyey to joboth.

¹³Kodhi m'opodho wi tele kama lowo rep'iye, meno a joma jowinjo wac gi kisangala, to wac kirwaki tiende i cuny jo; joyeyo nyaka ma hongo manok, to jopodho ka karatem obino.

¹⁴Aka kodhi m'opodho i kudhin, meno a joma jowinjo, to rumacen rembo kodi ŋaŋo ma piny kodi kisangala ma kwo diyo jo piny, aka gima jonyak kitegino.

¹⁵To kodhi m'opodho i lowo ma diwa, meno a joma, munyo jotieko winjo wac, jomako maber i cuny jo, aka jonyak maber ro diyo cuny jo.”

¹⁶ “Ongoye ŋata cwinyo tala to umo g'agono, kosa ketho i tiendi kitanda; kucel go ripo ŋawo tala no wi akare mere aka joma donjo i ot jowoneni lero.

¹⁷Kole ongoye gim'opanere ma k'othangi kamaler, kosa gima nyaliŋliŋ ma k'oŋeyere kamaler.”

¹⁸ “Ciki win ithi win maber, ato ŋata nitie gi gimoro am'ibino medo go man, to ŋat'ongoye gi gimoro, kada ma go paro nike nitie gine no, ibino mayo go woko.”

¹⁹Gikenyo min Yesu gi wutmin jobino bonge, to jok'onyalo tundo bonge ro thotho pa ji.

²⁰Aka owaci rigo ni, “Yokin kodi wutmin in icade jocungo woko, jodwaro nenin.”

²¹To Yesu owaco ni, “Mama kodi wutmera meno a joma winjo wac pa Were aka joketho i tim.”

²²Ndelo moro Yesu odonjo i ye gi jofonjirok pere, to waco rijo ni, “Weyi wacewere win yu loka ma wakawaka ma koca.” To jocako cewirok.

²³Munyo jocewere, Yesu opodho gi nindo, aka koyo madwoŋ obino to kudho wakawaka, to pi cako poŋ i ye, ma ye onwaŋo cegin munyirok i pi.

²⁴Gikenyo jofonjirok jokidho to jocewo Yesu munyo jowaco ni, “Jafonji, Jafonji, watho!” Yesu ocew to ay malo, to oro koyo kodi pi ma tula kwe; gimoro je oliŋ to piny kwe.

²⁵Aka owaco rijo ni, “Nikune yeyo mewin?” Aka jodhier to lworo mako jo, to jowaco wegi kendi gin ni, “Me ŋa ma oro kiri koyo gi pi je to jowinjo go?”

²⁶Jocewere jotundo i piny pa Jogerasa m'ocimere gi Galili.

²⁷Aka munyo Yesu otieko wok dho thengi pi, dhano moro m'owok i tindi m'onwaŋo nigi jwogi kweth kwoŋe oromo gine. Ŋat'oyido ocowo hongo malac ma kiruki gimoro, aka kibedi i ot, to bedo i kaliele ma ŋungu ayino.

²⁸Munyo go oneno Yesu, okoko to podho dho tiende to waco gi derino ni, “Yesu, Wod pa Were Madwoŋ Maloyo! Imito aŋo kwoŋan? Akwayin, ikir'itiman marac.”

²⁹Go owaco ameno, rupiri Yesu oyido ooro cuny m'ocido no wok kwoŋ ŋato. (Ato ndir madit cuny m'ocido no oyido monjo go, aka kada tweyi ŋato i cinge kodi tiende gi lijegere, codo woko lijegere no to cuny m'ocido no tero go i thim.)

³⁰Yesu openjo go ni, “Nyingin ŋa?” Odwoko ni, “Nyingan Lwak.” Kwoŋbedo jwogi kweth oyido jodonjo kwoŋe.

³¹Jwogi no jokwayo Yesu ni wokiri wodhiri jo i mwombe maluth.

³²Kenyo onwaŋo nitie sidwol mbiji madwoŋ ma cemo dho thengi tendere; jwogi jokwayo Yesu nike wowey jowodonji i mbiji no, to yeyo jo.

³³Gikenyo jwogi jowok kwoŋ ŋato to jodonjo i sidwol mbiji; aka sidwol no gibe joloro wi tendere to jomunyere i wakawaka.

³⁴Munyo jokwath mbiji joneno gim'otimere, joringo to jonyayo wac i tindi kodi loka no je.

³⁵Ji bende jokidho neno gim'otimere. Jobino bongi Yesu to jonwaŋo dhano ma jwogi jowok kwoŋe obedo piny dho tiendi Yesu, m'oruko nanga aka wiye ber, to lworo mako joje.

³⁶Jom'oneno gim'otimere jotito ri joman paka Yesu obotho ŋato.

³⁷Gikenyo ji je ma iy'adec ma Gerasa jokwayo Yesu nike woeye kenyo, rupiri lworo oyido opoŋ kwoŋ jo. Gikenyo Yesu odonjo i ye to dok.

³⁸Dhano ma jwogi owok kwoŋe okwayo Yesu ni, “Yeyan aluwin.” To Yesu okwero rigo ni,

³⁹“Dok peco ititi ri ji gima Were otieko timo rin.” Jalo owotho i tindi parom munyo tito ri ji gima Yesu otimo rigo.

⁴⁰Gikenyo munyo Yesu odwoko yu loka ma Galili, lwak ji jojolo go rupiri oyido ji je jokuro go.

⁴¹Aka nyatoro obino m'ilwoŋo ni Yayiro, m'obedo jadwoŋ ma dhumo kalamo pa Joyuda; go opodho dho ka tiendi Yesu to kwayo go ni wokidhi peco pere,

⁴²rupiri nyare acel g'acel won, m'onwaŋo romo oro apar g'ario, oyido cegin tho. Aka munyo Yesu kidho korago, lwak ji jodire kwoŋe to jothoko go.

⁴³Gikenyo dhako moro m'oyido remo oy kwoŋe tieko oro apar g'ario gipi, aka ongoye ŋat'onyalo cango rigo two no, kada go oyido otieko wotho bongi jomilerwa mathoth gi nyeko lim pere,

⁴⁴obino yuŋey Yesu, to geyo dhok nanga pere; gikenyo no won to remo coki.

⁴⁵Yesu openjo ni, “Ŋat'ogeyan?” Dhano je okwedere, to Petero waco ni, “Jafonji, kole lwak ji othokin aka ji dire kwoŋin.”

⁴⁶To Yesu owaco ni, “Nyatoro ogeyan, kwoŋbedo awinjo meni owok kwoŋan.”

⁴⁷Munyo dheno oneno ni onwaŋ go, obino gi kirin, opodho piny dho ka tiendi Yesu, to tito ruwaŋ ji je gim'omiyo ogeyo Yesu, kendo paka olimo both gi kenyo no won.

⁴⁸Yesu owaco rigo ni, “Nyaran, yeyo perin obothin, kadhi i siem.”

⁴⁹Munyo Yesu fodi luwo, jamikwenda moro owok peco pa jadwoŋ ca. Ŋato owaco rigo ni, “Nyarin otieko tho, ikir'imedi cando Jafonji nono.”

⁵⁰Yesu kere oyido owinjo, to waco ri Yayiro ni, “Ikir'ilwor; yey ayino, go bino bedo maber.”

⁵¹Munyo Yesu otundo peco no, k'oyeyo moro donjo gi go i ot kwanyo woko Petero, Yohana kodi Yakobo, kodi ba nyathi gi yokimere kende.

⁵²Dhano je oyido ywako nyako no gi ndur. To Yesu owaco ni, “Wikiri wiywak; nyathi me k'otho, nindo ayino.”

⁵³Jono jonyero go rupiri joŋeyo ni nyako no oyido otieko tho.

⁵⁴To Yesu omako cinge to lwoŋo ni, “Nyathi, ay malo.”

⁵⁵Gikenyo cuny nyathi no odwoko kwoŋe to ay ni rwat, to Yesu oro jo miyo go gir'acama.

⁵⁶Jonywol pere jouro swa, to Yesu ciko jo ni jokiri jowowaci ri moro je gim'otimere.