Read dhopadhola Cik 1 Bible Online

Cik 1 - dhopadhola bible

Cik 1

¹Me wac ma Musa oluwo ri Joisiraili je kalo Yordan i thim, kam'obipere m'oŋiyere gi Suf, i dier Paran kodi Tofel, Laban, Hazeroth, kodi Dizahab.

²(Wok i Horeb tundo i Kades Barineya obedo woth ma ndelo apar g'acel, luwo gi royo ma Got Edom).

³K'acel ma dwe mar'apar g'acel i oro ma piero aŋwen, Musa oluwo gi Joisiraili cungo kwoŋ or ma Rwoth omiyo go rijo.

⁴Gime obedo rumacen munyo go otieko kikengila Kere Sihon pa Joamor, m'oyido dhumo i Hesibon, kodi Kere Og ma Basan m'oyido dhumo i Asiteroth kodi Edirey.

⁵Kalo Yordan i lowo ma Mowab, Musa ocako fonjo cik me ka waco ama:

⁶Rwoth Were mawan oluwo gi wan i Got Horeb ka waco ni, “Witieko bedo i got me ma hongo malac.

⁷Wire win wimedere gi woth mewin, aka wikadhi i piny matendere pa Joamor kodi iy'adec mager i Araba, piny matendere, Sefela, yupiny, kodi i thengi nam. Lowo pa Jokanan, kodi i Lebanon, tundo kiri i malawa madwoŋ, Yufrete.

⁸Neni atieko miyo win lowo ma ruwaŋ win, donji win aka wilunji lowo no, ma an Rwoth, aciko kwarere mewin: Abraham, Isaka, kodi Yakobo, miyo jo kodi nyikway jo.”

⁹Awaco riwin i hongo ca ni, neni, withoth, aka akinyali bielo wijoje.

¹⁰Rwoth Were mewin otieko loko win mathoth, aka neni konon withoth paka micalin ma i polo.

¹¹Weyi Rwoth, Were pa kwarere mewin womedi welo mewin digana aka womiy win silwany paka ociko win.

¹²T'anonyal nedi ciro peko ma teko ma banjin mewin kendan?

¹³Yer win cwo ma joriek, ma jonitie gi niaŋ, aka joŋeyere i nonin mewin ŋey akethi jo bedo jotel mewin.

¹⁴Widwokan ka wiwaco ni, “Wac perin m'iwaco riwan ber riwan.”

¹⁵Ameno akwanyo cwo mariek, ma jonitie giŋeyo aka aketho jo bedo jotel mewin, paka jomituka ma ganin, miyin, piero abic, kodi apar i nonin mewin je.

¹⁶Aka amiyo cik ri jothum banja mewin i hongo ca ni, “Winji win to withumo banjin gi tiro i dier dhano gi nyawote, obedi nike ji mewin kosa jopath ma jobedo i dier win.

¹⁷Wikiripi bedo nyakucel i thumo banja; winji win jomathindho kodi jodongo i nger acel; aka wongoye ŋata wobwoki win, kole thumo banja obedo apa Were. Banja je matek riwin, keli win bongan, aka alawinjo.”

¹⁸Amiyo win or i hongo ca gi gigipiny je ma wiripo timo.

¹⁹Waay wok i Horeb to wakadho luwo gi royo ma thim madwoŋ aka ma kelo lworo ma wineno, i royo ma kadho i piny matendere pa Joamor paka Rwoth Were mawan omiyo wan or, cuka watundo i Kades Barineya.

²⁰Awaco riwin ni, “Witieko tundo i piny matendere pa Joamor ma Rwoth Were mawan miyo wan.

²¹Neni, Rwoth Were mewin otieko ketho lowo me ruwaŋ win, kadhi win malo wilunji, paka Rwoth Were pa kwarere mewin ociko win, wikiri wilwor kosa wibwoki.”

²²Kenyo wijoje wicore cegin bongan aka wiwaco ni, “Weyi waori cwo yuwiy wan menyo lowo riwan aka jowokeli riwan radwok kwoŋ royo mene ma wiripo luwo kodi tindin madongo ma walakidh'iye.”

²³Luwo mewin ober ran, aka ayero cwo apar g'ario, acel wok i kisi nono.

²⁴Jowotho kadho malo i piny matendere, aka jotundo i milelo Esikol to jorango tiendi gigipiny nyaliŋliŋ.

²⁵Jofono olemo moro ma lowo, ma jokelo piny riwan. Jo bende jokelo riwan radwok ka jowaco ni, “Lowo ma Rwoth Were mawan miyo wan ber.”

²⁶To oyido wikimito kadho malo. Wigwenyere kwoŋ or pa Rwoth Were mewin.

²⁷Wiŋunyaŋunya i wemin mewin aka wiwaco ni, “Kwoŋbedo Rwoth odak wan, okelo wan wok i lowo ma Misir, miyo wan i cingi Joamor reyo woko wan.

²⁸Wanodonji kune? Wutmin wan jobwoko cuny wan gi waco nike ji ca jotek aka joboyo loyo wan, tindin madongo pajo otinda kiri malo i polo! Waneno nyikway Anakim kenyo.”

²⁹Awaco riwin ni, “Wikiri wibwok kosa wibedi gi lworo rijo.

³⁰Rwoth Were mewin, ma telo yuwiy win, ama lalwenyo riwin, paka otimo riwin i Misir ma wineno gi waŋ win,

³¹kodi i thim, kama wineno paka Rwoth Were mewin otiŋo win paka dhano tiŋo nyathi pere, i royo je ma wiluw'iye cuka witundo i kabedo me.

³²To kucel, i gime je, wikinyalo bedo gi yeyo i Rwoth Were mewin,

³³go ma wotho yuwiy win, rango riwin kaketho kambi, i mac wor, kodi i pondeponde odieceŋ, nyutho win royo ma wiripo luwo.”

³⁴Rwoth owinjo wac mewin je, aka omako nge to kwoŋere ka waco ni:

³⁵“Ongoye kwoŋ cwo me, luse pa ji mareco me ma laneno lowo maber m'aciko miyo kwarere mewin,

³⁶kwanyowoko, Kaleb wod pa Yefune. Go laneno, aka rigo kodi nyikwaye alamiyo lowo ma go otieko nyono gi tiende, kwoŋbedo owinjo Rwoth gi cunye je.”

³⁷Kwoŋbedo win, Rwoth omako kodan nge to waco ni, “Kiri gi in je, ikilatundo koro.

³⁸Yosuwa wod pa Nun, jakony perin, latundo koro. Miy go meni, kole go ama latelo Isiraili lunjo lowo no.

³⁹Paka ri nyithindho mewin, m'oyido wiparo nike ilakinyaga jo, jo ma konon jokuya gim'otire kodi gim'okom, ama joladonjo koro; alamiyo jo lowo no, aka jolalunjo.

⁴⁰To paka riwin, woth win wigik i thim, i royo ma Nam M'obokere.”

⁴¹Widwokan ka wiwaco ran ni, “Watieko timo reco kwoŋ Rwoth! Walakadho malo lweny paka Rwoth Were mawan omiyo wan or.” Ameno wijoje witwere ma lweny, ka wiparo nike labedo mayot kadho malo monjo piny matendere.

⁴²Rwoth owaco ran ni, “Waci rijo jokiri jowokadhi malo lweny, kole angoye i dier win; ka k'obedo ameno jokwor mewin jolakikengila win.”

⁴³Awaco riwin, to wikinyalo winjo. Wigwenyere kwoŋ or pa Rwoth aka wikadho malo i piny matendere gi mbaka mewin.

⁴⁴Joamor m'oyido jobedo i piny matendere jowok monjo win aka joriemo win paka kic timo. Jogoyo win kiri piny i Edom tundo kiri i Horima.

⁴⁵Munyo wigik to wiywak ruwaŋ Rwoth, Rwoth k'owinjo dwondi win kosa k'odewo be.

⁴⁶Widoŋ i Kades ma ndelo kweth paka witimo.