Read dhopadhola Cik 10 Bible Online

Cik 10 - dhopadhola bible

Cik 10

¹I hongo no Rwoth owaco ran ni, “Pay telin mapando ario paka marapena, ibin bongan malo wi got, aka tim sanduku ma mbawo.

²Alandiko i telin wac m'oyido nitie i marapena, m'iŋinyo, aka ilaketho jo i sanduku.”

³Ameno atimo sanduku gi mbawo ma gasia, apayo telin mapando ario paka marapena, aka aidho malo wi got, gi telin mapando ario i cingan.

⁴Aka Rwoth ondiko i telin wac acel paka i marapena, or apar ma Rwoth oluwo gi win wi got wok i mac i ndelo ma cokirok. Rwoth omiyan,

⁵aka aloro piny wok wi got, t'aketho i sanduku m'oyido atimo, aka eno jo, paka Rwoth omiyan or.

⁶ (Joisiraili jowotho wok i Beroth Bene Jakan tundo kiri i Mosera. Kenyo Aron otho, t'iyiko go; aka wode Eliazar olunjo go paka jacway ri Were i wi migam.

⁷Wok kenyo jowotho kiri i Gudgoda, aka wok i Gudgoda kiri i Yotbatha, lowo ma mol gi waŋ pi kweth.

⁸I hongo no Rwoth oketho gicen nono pa Jolevi tiŋo sanduku pa Rwoth, cungo ruwaŋ Rwoth tiyo rigo, kodi miyo silwany i nyingi go, kiri konon.

⁹Riameno nono pa Jolevi ongoye gi kibaba kosa alunja, Rwoth obedo alunja pajo, paka Rwoth Were mewin ociko go.)

¹⁰Abedo wi got odieceŋ piero aŋwen kodi wor piero aŋwen paka marapena. Rwoth owinjan kendo aka k'onyalo reyo woko win.

¹¹Rwoth owaco ran ni, “Ay malo, kadhi itel ji, ŋey jowokadhi jowolunji lowo m'akwoŋere ri kwarere pajo ni alamiyo jo.”

¹²Onyo pama, Awi Isiraili, aŋo ma Rwoth Were mewin rango kwoŋ win? Nyaka lworo Rwoth Were perin, wotho i yo pere je, maro go, tiyo ri Rwoth Were perin gi cunyin je kodi adundo perin je,

¹³kuro or pa Rwoth Were perin kodi cik pere m'amiyin konon, ri bero perin.

¹⁴Makada nende polo malo obedo apa Rwoth Were mewin, piny kodi gima nitie iye je,

¹⁵kucel Rwoth oketho cunye i maro kendo to yero kwarere mewin, nyikway jo, kwoŋ ji je, paka nitie konon.

¹⁶Riameno dhum win cuny win, aka wikiri wibedi gi wictek kendo.

¹⁷Kole Rwoth Were mewin obedo Were pa werin, Rwoth pa rwodhe, Were madwoŋ, jameni aka kelo lworo, go kitim nyakucel aka kijol nyew.

¹⁸Go timo tiro ri nyithindho kic kodi citho, omaro jopath, miyo jo cemo kodi gir'aruka.

¹⁹Wiripo maro japath, kole oyido wibedo jopath i lowo ma Misir.

²⁰Wiripo lworo Rwoth Were mewin, go kende ama wiripo lamo, wiripo ketho go marapena, to wikwoŋere i nyinge.

²¹Go ama wiripo pako, go obedo Were mewin, m'otieko timo riwin gigipiny madongo me aka ma kelo lworo ma witieko neno gi waŋ win.

²²Kwarere mewin jokadho piny i Misir, ji piero abirio, aka pama Rwoth Were mewin otieko loko win mathoth paka micalin ma i polo.