Read dhopadhola Cik 11 Bible Online

Cik 11 - dhopadhola bible

Cik 11

¹Riameno wiripo maro Rwoth Were mewin, to wikuro cik pere, fonji pere kodi or pere noknok.

²Ŋey win konon nike k'obedo nyithindho mewin ma fodi jokuya kosa jok'oneno ragwok pa Rwoth Were mewin, dwoŋ pere, cinge ma meni kodi bade m'oyare,

³ranyuth pere kodi tim pere m'otimo i Misir ri Farawo, kere ma Misir, kodi lowo pere je.

⁴Gima go otimo ri jolweny ma Misir, kayinin pajo, cawilin, kodi nger m'omiyo pi ma Nam M'obokere mol kwoŋ jo munyo joriemo win, to Rwoth reyo woko jo kiri gunyo ni;

⁵Gima go otimo riwin i thim, cuka witundo i kabedo me,

⁶kodi gima go otimo ri Dathan kodi Abiram, wot Eliab wod pa Ruben, nger ma i dier Joisiraili je piny oyawo dhoke to mwonyo woko jo, gi pecin pajo, wemin, kodi lim pajo je.

⁷Kole witieko neno gi waŋ win tim madongo je ma Rwoth otimo.

⁸Kur win or me je m'amiyo win konon, ŋey winyal bedo gi meni ma kadho donjo mako lowo ma wiŋado kidho bed'iye.

⁹Aka ŋey winyal bedo gi kwo mabor i lowo ma Rwoth okwoŋere ri kwarere mewin miyo jo kodi nyikway jo, lowo ma mol gi cak kodi mo kic.

¹⁰Kole lowo ma wicegin donjo mako kicale lowo ma Misir, ma wiwok'iye, kama wicwoyo kodhi to wikonj'iye pi atiendi, paka ndelo fufa.

¹¹To lowo ma wiŋado kadho lunjo obedo lowo matendere kodi milelo, ma koth cwe iye wok i polo,

¹²lowo ma Rwoth Were mewin kuro. Waŋ Rwoth Were mewin noknok nitie kwoŋe, wok i cakirok ma oro tundo i cowe.

¹³Ka winowinji kisi or pa Rwoth, m'amiyo win konon, maro Rwoth Were mewin, tiyo rigo gi cuny win je kodi adundo mewin je,

¹⁴kenyo go lamiyo win koth ri lowo mewin i hongo mere, koth ma cwir kodi ma oro, ŋey winyal coko ŋano, vini, kodi mo mewin.

¹⁵Go lamiyo win lum i sa mewin ri mwendi mewin, aka wilacemo to wiyeŋ.

¹⁶Gwokere win, cuny win wokiri owondi win wirok, tiyo ri werin man kodi lamo jo.

¹⁷Nge pa Rwoth laliel kwoŋ win to cego polo, ŋey koth wongoye to ngoye ranyak i lowo; wilarere woko piyo wok i lowo maber ma Rwoth miyo win.

¹⁸Wiripo ketho wac paran me i cuny win kodi iy'adundo mewin, tweyo i cingi win paka ranyuth, kodi i nyim win paka rapoy.

¹⁹Fonji win nyithindho mewin, luw win kwoŋe ka winitie peco kodi ka wiwotho, ka winindo piny kodi ka wicew.

²⁰Ndiki win ruwaŋ dhiot ma udi mewin kodi i waŋkace mewin,

²¹ŋey ndelin ma kwo mewin kodi apa nyithindho mewin womedere i lowo ma Rwoth okwoŋere ri kwarere mewin miyo jo, paka polo nitie malo ma piny.

²²Ka winokur or me je m'amiyo win konon gi kinen, maro Rwoth Were mewin, wotho i yo pere je, kodi ketho go marapena,

²³kenyo Rwoth lariemo woko nonin me je ruwaŋ win, aka wilalunjo nonin malac aka ma jotek loyo win.

²⁴I kisi kabedo je ma winonyon gi tiendi win labedo mewin; adec mewin layare wok i thim tundo i Lebanon kodi wok i malawa Yufrete, kiri i Nam ma yupodho ceŋ.

²⁵Ongoye ŋata lanyalo ciro win, Rwoth Were mewin lakelo lworo kodi bwok ro win i lowo je ma winonyon, paka go ociko win.

²⁶Neni, aketho ruwaŋ win konon silwany kodi lam.

²⁷Silwany, ka winowinji or pa Rwoth Were mewin m'amiyo win konon.

²⁸Aka lam, ka wikwero winjo or pa Rwoth Were mewin, to wiwire kwoŋ yo m'amiyo win or konon, to wiluwo werin ma fodi wikuya.

²⁹Ka Rwoth otieko kelo win i lowo ma wikidho donjo lunjo, wilaketho silwany wi Got Gerizim kodi lam wi Got Ebal.

³⁰Paka wiŋeyo, jonitie kalo Yordan, yupodho ceŋ, i lowo pa Jokanan ma jobedo i Araba, ma ŋiyere gi Gilgal, i thengi olwa ma More.

³¹Ka wiŋado Yordan kadho lunjo lowo ma Rwoth Were mewin miyo win, ka witieko bed'iye,

³²wiripo kuro gi kinen, cik je kodi or je m'aketho ruwaŋ win konon.