Read dhopadhola Cik 12 Bible Online

Cik 12 - dhopadhola bible

Cik 12

¹Me fonji kodi cik ma wiripo kuro gi kinen i lowo ma Rwoth, Were pa kwarere mewin, omiyo win lunjo ma ndelo je ma winobedi makwo i piny.

²Wiripo reyo kicutho kabedo je m'oyido nonin ma wikadho lunjo jolam'iye werin pajo, wi gote, i wi tendere, kodi i tiendi yen.

³Tur win piny migame pajo, ŋiny win sirin pajo, waŋ win Asera pajo gi mac, aka witur piny cal ma jotimo ri werin pajo, to wirwenyo woko nyingi jo i kabedo pajo.

⁴Wikiri wilam Rwoth Were mewin i nger no.

⁵To wilalamo go i kabedo ma Rwoth Were mewin oyer wok kwoŋ nonin mewin paka kabedo ri nyingi go koro. Wiripo kadho kenyo,

⁶tero mic mewin awaŋa kodi cowirok, acel wiy apar, kodi mic mewin, mic mewin ma wiciko, mic ma dhano won miyo kodi okayin ma dhok mewin kodi mwendi mewin.

⁷Aka wiripo camo koro ruwaŋ Rwoth Were mewin, win kanyacel gi pecin mewin, ka wifore i tic mewin je ma Rwoth Were mewin omiyo win silwany.

⁸Wikiripi timo paka watimo ka konon, kisi dhano gim'otire ruwaŋe,

⁹kole fodi wikitundo i ywomirok kodi i lim ma Rwoth Were mewin miyo win.

¹⁰Ka wiŋado Yordan, to wibedo i lowo ma Rwoth Were mewin miyo win, aka ka go otieko miyo win ywomirok kwoŋ jokwor mewin je, thoko, ŋey wibedi i siem,

¹¹wiripo kelo i kabedo ma Rwoth Were mewin oyer paka kabedo ri nyinge gigipiny je m'amiyo win or kwoŋe: Mic awaŋa kodi cowirok mewin, acel wiy apar, kodi mic mewin je ma wiciko Rwoth.

¹²Aka wiripo forok ruwaŋ Rwoth, win, nyithindho mewin, ŋecin mewin, kodi Jolevi ma jobedo i tindin mewin paka jo jongoye g'adec kosa gir'alunja kodi win.

¹³Kure win ŋey wikiri wimiy mic mewin awaŋa i kabedo moro je ma wineno.

¹⁴To kende i kabedo ma Rwoth layero wok iy'acel kwoŋ nonin mewin; kenyo ama wilamiy'iye mic mewin awaŋa kodi timo kisi gimoro m'amiyo win or kwoŋe je.

¹⁵Kucel ka cuny win ogomba, winyalo thumo ogwaŋe mewin to wicamo i tindin mewin, cungo kwoŋ silwany ma Rwoth Were mewin omiyo win. Ŋat'olony kodi ma k'olony je nyalo camo paka jocamo kol kodi apol.

¹⁶To wikiripi camo remo mere, wiripo konjo woko i lowo paka pi.

¹⁷Wikiripi camo gi tindin mewin, acel wiy apar ma ŋano mewin, vini mewin, mo mewin, okayin ma dhok mewin kodi mwendi mewin, mic je ma wiciko, mic ma dhano won miyo, kodi mic mewin.

¹⁸Kole wiripo camo ruwaŋ Rwoth Were mewin i kabedo ma Rwoth Were mewin layero, win kanyacel gi nyithindho mewin, ŋecin mewin, kodi Jolevi ma jobedo i tindin mewin, ka wifore ruwaŋ Rwoth i kisi gimoro je ma witimo.

¹⁹Kure win, ŋey wikiri wijwangi Jolevi paka wibedo i lowo mewin.

²⁰Ka Rwoth Were mewin oloki malac kew mewin, paka ociko win, to wiwaco nike wimito camo riŋo, winyalo camo riŋo kisi ka wiyenyo.

²¹Ka kabedo ma Rwoth Were mewin oyer ketho nyinge bor swa gi win, winyalo thumo dhok mewin kosa mwendi mewin ma Rwoth omiyo win, cungo kwoŋ or m'amiyo to wicamo i tindin mewin kisi ka wiyenyo.

²²I nger m'icam'iye apol kosa amudhe, ameno winyalo camo, ŋat'olony kodi ma k'olony je.

²³Kende neni win nike wikicamo remo; kole remo obedo kwo, aka wikiripi camo kwo gi riŋo.

²⁴Wikiri wicam, wiripo konjo piny i lowo paka pi.

²⁵Wikiri wicam, ŋey winwaŋ bero kodi nyithindho mewin ma joluw win, kwoŋbedo witimo gim'otire ruwaŋ Rwoth.

²⁶To kende gigipiny mewin maleŋ, kodi mic ma wiciko, wiripo kelo i kabedo ma Rwoth layero.

²⁷Wiripo kelo mic mewin awaŋa, riŋo kiri gi remo, i wi migam pa Rwoth Were mewin; remo ma cowirok mewin man ilakonjo i thengi migam pa Rwoth Were mewin, to riŋo mere winyalo camo.

²⁸Kure win winjo wac me je, m'amiyo win or kwoŋe konon, ŋey winwaŋ bero kodi nyithindho mewin ma joluw win cil gi cil, kwoŋbedo wilatimo gim'otire ruwaŋ Rwoth Were mewin.

²⁹Ka Rwoth Were mewin otiek riemo woko ruwaŋ win nonin ma wicegin lunjo jo, ka witieko bedo i lowo pajo,

³⁰kure win ŋey wikiri wimok i bwo timo paka jo, ka otiek reyo woko jo ruwaŋ win. Wikiri wipenji kwoŋ werin pajo ka wiwaco ni, “Nonin me oyido jolamo werin pajo nedi? An bende amito timo amanago.”

³¹Wikiripi timo ameno ri Rwoth Were mewin, kwoŋbedo kisi amien je ma Rwoth odak, jotieko timo ri werin pajo. Jowaŋo kiri nyithindho pajo mayac gi manyir i mac ri werin pajo.

³²Wac me je m'amiyo win or kwoŋe, kur win gi kinen; wikiri wimedi kosa wikwany woko gimoro kwoŋe.