Read dhopadhola Cik 13 Bible Online

Cik 13 - dhopadhola bible

Cik 13

¹ Ka jotuci wac were kosa jothieth jomenyere i dier win to jociko win gir'aura kosa ranyuth,

²k'otimere, to jowaco riwin ni, “Weyi walam win werin man ma fodi wikiŋeyo, aka weyi watiy rijo.”

³Wikiri wiwinji wac pa jotuci wac were kodi jothieth no; kole ameno Rwoth Were mewin temo win ŋeyo, k'adieri wimaro Rwoth Were mewin gi cuny win je kodi adundo mewin je.

⁴Wiripo luwo Rwoth Were mewin, lworo go kende, kuro or pere, winjo dwonde, tiyo rigo, kodi ketho go marapena.

⁵To jotuci wac were kodi jothieth no, wiripo neko jo kwoŋbedo joluwo marac kwoŋ Rwoth Were mewin m'owodho win wok i lowo ma Misir to botho win wok i ot ma twec wiro win wok i royo ma Rwoth Were mewin omiyo win or ni wiluw. Ameno wiripo kwanyo woko raco no i dier win.

⁶K'omin in, wodin, nyarin, dhako perin, kosa mere perin odwoŋin manyaliŋliŋ, ka waco ni: “Weyi walam werin man.” Werin ma win kosa kwarere mewin fodi wikiŋeyo,

⁷werin pa ji ma jothoko win, kosa cegin kosa bor gi win, wok i gike piny acel tundo i meca,

⁸ikir'iyere kosa iwinji nger ŋato. Ikir'inyuthi jo wor kosa kisa aka ikir'ikwonga jo.

⁹To iripo neko jo; cingin won ama ripo telo neko jo, aka rumacen cingi ji je.

¹⁰Cadhi jo gi telin cuka jotho kwoŋbedo jotemo kwanyin woko kwoŋ Rwoth Were perin, m'owodhin wok i lowo ma Misir, wok i ot ma twec.

¹¹Kenyo Joisiraili je jolawinjo to jobedo gi bwok, aka ongoye ŋata latimo nger kidakana no kendo i dier win.

¹²Ka wiwinjo iwaco iy'acel kwoŋ tindin ma Rwoth Were mewin miyo win bed'iye,

¹³nike ji ma bukony jowok i dier win to jokadho wiro ji ma tindi ka jowaco ni, “Weyi wakadhi walam werin man.” Werin ma fodi wikiŋeyo,

¹⁴wiripo penjo maber to widwaro tiende wac no. K'onwaŋere nike nger mienirok no otimere i dier win,

¹⁵wiripo neko ji ma tindi no g'abor, kicutho to wireyo woko kisi gimoro iye, kiri g'ogwaŋe mere.

¹⁶Wiripo coko gigipiny je to widhuro i kacokirok, to wiwaŋo tindi kodi gigipiny mere je gi mac, paka mic awaŋa ma gikululu ri Rwoth Were mewin. Kole ladoŋ gunda ma kilageto kendo.

¹⁷Wikiri wiwey kisi gimoro m'otiek yere reyo woko womok i cingin, ŋey Rwoth wowire kwoŋ mako nge pere aka wonyuthi wor, to nyayo win, paka ociko kwarere mewin.

¹⁸Kole winji win dwondi Rwoth Were mewin, kuro or pere m'amiyo win konon, timo gim'otire ruwaŋ Rwoth Were mewin.