Read dhopadhola Cik 15 Bible Online

Cik 15 - dhopadhola bible

Cik 15

¹Kisi oro mar'abirio wiripo reyo woko banja pa jono ma jonitie gi pesa mewin.

²Aka me apaka wiripo timo: Kisi dhano ripo reyo woko banja pa jager pere, ma k'obanja kendo, kwoŋbedo Rwoth won ama reyo woko banja.

³Inyalo kibanja japath, to ikiripi kibanja jager perin.

⁴Ongoye ŋata lacando gimoro i dier win, kole Rwoth lamiyo win silwany adieri i lowo ma Rwoth Were mewin miyo win paka gir'alunja ma bed'iye,

⁵nyaka ka wiwinjo dwondi Rwoth Were perin gi kinen, kuro or pere je m'amiyin konon.

⁶Ka Rwoth Were perin otieko miyin silwany, paka go ociko, ilakikopa nonin kweth, to ongoye ma lakikopa in, iladhumo nonin kweth, to jokiladhumin.

⁷K'obedi jacandi i diere perin i tindin mewin i lowo mewin ma Rwoth Were perin miyin, ikir'itwey cunyin kosa cingin rigo,

⁸to yaw cingin, kikopa go gima mito je.

⁹Gwokere bedo gi paro ma bukony i cunyin, t'iparo ni, “Oro mar'abirio, oro ma reyo woko banja nicegin.” T'itero jager perin gi gwayo, t'ibedo m'ikimiyo go gimoro. Jager perin nyalo ywak ri Rwoth to bedo reco rin.

¹⁰Miy m'ongoye arom kendo m'ongoye kiŋunyaŋunya, aka ro gime Rwoth Were perin lamiyin silwany i tic perin je kodi i gimoro je m'itimo.

¹¹Kole jocandi jokilarumo i piny, riameno amiyin cik, yawo cingin ri jacandi kodi jager manitie i dinyo i lowo mewin.

¹²Ka Jayuda madhako kosa ma jacwo otanere rin to tiyo ma oro aucel, iripo gonyo go i oro mar'abirio wokadhi.

¹³Aka k'igonyo ŋeca ma jacwo, ikir'iwey go wokadhi gi cinge nono.

¹⁴Miy go m'ongoye arom wok i mwendi perin, ŋano perin, kodi vini perin, k'imiyo go wok kwoŋ silwany ma Rwoth Were perin otieko miyin.

¹⁵Poyi nike oyido ibedo ŋeca i lowo ma Misir, to Rwoth Were perin bothin; R'atoŋa me amiyin or me konon.

¹⁶To ka go owaci nike k'omaro kadho, kwoŋbedo omaro peco perin, paka go winjo maber kodin,

¹⁷kenyo ilatero go i dhiot perin, t'ituco ithe gi nyweny, aka go labedo ŋeca i kwo pere je. Ilatimo gimoro acel ri ŋeca madhako bende.

¹⁸Ikir'iter paka gimatek k'igonyo jo kadho, kwoŋbedo ma oro aucel jotiyo rin ma romo cul paka ŋata tiyo ma cul, aka Rwoth Were perin lamiyin silwany i gimoro je m'itimo.

¹⁹Kisi okayo pa mwendi kodi dhok perin, iripo miyo Rwoth Were perin, Ikir'itim tic g'okayo pa dhok perin aka ikir'iliel okayo pa mwendi perin.

²⁰Iripo camo, in kodi peco perin, ruwaŋ Rwoth Were perin kisi oro i kabedo ma Rwoth layero.

²¹To, ka onwaŋere nike nitie gi raco moro, paka ŋolo, kosa waŋ'otho, ikiripi miyo Rwoth Were perin.

²²Winyalo camo gi tindin mewin, ŋata koc kodi ŋat'olony je, paka wicamo rudina kosa amudhe.

²³To kad'ameno, wikiripi camo remo mere, wiripo konjo piny paka pi.