Read dhopadhola Cik 17 Bible Online

Cik 17 - dhopadhola bible

Cik 17

¹Wikiripi miyo Rwoth Were mewin cowirok ma merikwa, kosa rombo, m'oŋol, kole meno obedo amien ri Rwoth Were mewin.

²K'onwaŋere i dier win, iy'acel kwoŋ tindin mewin ma Rwoth Were mewin miyo win, jacwo kosa dhako, m'otur cikirok pere,

³gi tiyo ri werin man kodi lamo jo, kosa obedi waŋceŋ kosa dwe, kosa micalin, m'atieko kwero,

⁴aka k'owaci riwin kosa wiwinjo kwoŋe, to widwaro maber, aka onwaŋere nike obedo adieri nger amien no otimere i Isiraili,

⁵kenyo wodhi win jacwo kosa dhako no m'otimo gino i waŋkace mewin aka wigoy go gi telin cuka tho.

⁶Ka wac owok i dhok j'ario kosa ji adek paka jokony, ŋato iripo neko; to dhano kiripi neko cungo i wiwaci pa dhano acel paka jakony ma luwo adieri.

⁷Cingi ji ma jomiyo jakony ma luwo adieri ama ripo telo i neko ŋato, aka rumacen cingi ji je. Ameno apaka wilakwanyo woko raco no i dier win.

⁸K'obedi banja matek riwin thumo i dier oyo remo kodi neki, turo cik, kodi gorok, nger banjin no moro je i tindin mewin, kenyo wilakadho malo piyo i kabedo ma Rwoth Were mewin oyer.

⁹Wilapenjo jocway ri Were i wi migam ma Jolevi kodi jothum banja ma jonitie i tic i hongo no, jolathumo riwin banja no.

¹⁰Wiripo timo gima jowaci riwin wok i kabedo ma Rwoth Were mewin oyer, aka wiripo neno ni witimo kisi gima jofonji win.

¹¹Wiripo luwo fonji ma jomiy win je kosa thumo banja ma jomiy, wikiri wiwire kwoŋ gima jotieko yere timo ma jolanga riwin obedi racuc kosa racam.

¹²Paka ri ŋat'otim paka paro mito kwero winjo jacway ri Were i wi migam m'oyer kenyo tiyo ri Rwoth Were mewin, kosa jathum banja, ŋato latho. Ameno wilakwanyo woko raco no i Isiraili.

¹³Ji je jolawinjo aka jolabwok, to joweyo luwo paro pajo kendo.

¹⁴Ka witieko tundo i lowo ma Rwoth Were mewin miyo win to wilunjo to wibed'iye, to wiwaco ni, “Walayero kere dhumo wan, paka nonin ma jothoko wan.”

¹⁵Winyalo adieri yero kere ma Rwoth Were mewin layero. Dhano m'obedo acel kwoŋ win, to wikiripi yero japath ma kiwoki i dier win, dhumo win.

¹⁶To kere kiripi bedo gi kayinin kweth, kosa dwoko ji i Misir ŋey wolimi kayinin man, paka Rwoth otieko waco riwin, wikiripi gik koro kendo.

¹⁷Kere no kiripi nywomo mon kweth, ka k'obedo ameno cunye nyalo cile woko kwoŋ Rwoth, kosa coko feza kodi zahabu kweth.

¹⁸Aka ka otiek ketho go i kom ma dhum paka kere, go ripo bedo gi kitawo ma cik me m'okopila wok i kitawo ma cik ma jocway ri Were i wi migam, nyikway Jolevi jonigine.

¹⁹Go ripo doŋ gine to bedo ka soma i ndelo ma kwo pere je, ŋey wofonjere lworo Rwoth Were pere, kuro gi kinen wac je m'ondiki i cik me kodi fonji me je,

²⁰ŋey go wokiri womiyere dwoŋ loyo joman kosa wowire woko kwoŋ or, racuc kosa racam; ŋey go kodi nyikwaye jowodhum ker pere i Isiraili hongo malac.