Read dhopadhola Cik 18 Bible Online

Cik 18 - dhopadhola bible

Cik 18

¹Jocway ri Were i wi migam ma Jolevi, meno, jonono pa Jolevi je, jolangoye g'adec kosa gir'alunja gi Joisiraili; jolacamo mic m'iwaŋo ri Rwoth, m'obedo adec pa Rwoth.

²Riameno jongoye g'alunja i dier wutmin jo; Rwoth am'obedo gir'alunja pajo, paka go ociko jo.

³Aka me ama labedo lim pa jocway ri Were i wi migam wok bongi ji, wok bongi jono ma jomiyo cowirok, obedi merikwa kosa rombo, joripo miyo jocway ri Were i wi migam wibac, lembe mere ario, kodi ic mere.

⁴Ranyak marapena mar'olemo ma vini gi mo mewin kodi pien rombo, wiripo miyo go.

⁵Kwoŋbedo Rwoth Were mewin otieko yero go kwoŋ nonin mewin je, cungo kodi tiyo i nyingi Rwoth, go kodi wote cil gi cil.

⁶Ka Jalevi oeye wok i tindi mewin moro je, wok kama go oyido bed'iye i Isiraili je, to bino i kabedo ma Rwoth oyer, (aka go nyalo bino kisi ka cunye mito)

⁷kenyo go nyalo tic i nyingi Rwoth Were pere, paka Jolevi wadi ma jocungo tic kenyo ruwaŋ Rwoth.

⁸Jolabedo gi migew marom acama, makada nende jonitie gi lim ma jolimo wok i mitan ma lim pajo ma peco.

⁹Ka witundo i lowo ma Rwoth Were mewin miyo win, wikiri wifonjere luwo tim ma mienirok pa nonin no.

¹⁰Wokiri wonwaŋere i dier win nyatoro moro m'owaŋ wode kosa nyare paka mic, kosa ŋata temo bedo gi jamiliel kosa jar'ajwoka, kosa jathieth, kosa jajwok,

¹¹ŋata jalam, kosa ŋata luwo gi jwogere kosa tipo, kosa ŋata luwo gi jom'otho ma ŋeyo gima latimere yuwaŋe.

¹²Rupiri ŋata timo gigipiny me labedo amien ri Rwoth; aka ro tim ma mienirok me, am'omiyo Rwoth Were mewin riemo woko jo ruwaŋ win.

¹³Wiripo bedo g'adieri kicutho ri Rwoth Were mewin.

¹⁴Makada nende nonin me ma wicegin mayo jo lowo pajo kodi gigipiny pajo, jowinjo jar'ajwoka kodi jamiliel, paka riwin, Rwoth Were mewin k'oyeyo win timo ameno.

¹⁵Rwoth Were mewin lamiyo win jatuci wac Were ma cale kodan wok i dier win, wok kwoŋ wutmin win, aka ama wiripo winjo go.

¹⁶Me a gima wikwayo Rwoth Were mewin wi Got Horeb i ndelo ma cokirok, munyo wiwaco ni, “Ka wawinjo dwondi Rwoth Were mawan, kosa waneno mac madwoŋ me kendo, walatho.”

¹⁷Rwoth odwokan ni, “Jotire i gima jotieko waco.

¹⁸Alayero rijo jatuci wac Were ma cale kodin wok i dier jo; aka alaketho wac paran i dhok jatuci wac Were, ma lawaco rijo gimoro je m'amiyo or kwoŋe.

¹⁹Aka ŋata k'owinji wac paran ma jatuci wac Were laluwo i nyingan, an won alapenjo go.

²⁰To jatuci wac Were ma won okethere ma luwo wac moro i nyingan m'akioro go ni woluwi, kosa ŋata luwo i nyingi werin man, jatuci wac Were no latho.”

²¹Aka inyalo penjere i cunyin ni, “Wanyalo nedi ŋeyo wac ma Rwoth k'oluwo?”

²²Ka jatuci wac Were luwo i nyingi Rwoth, ka wac no k'otundo i kare, kosa k'obedo adieri, meno wac ma Rwoth ama k'oluwo; jatuci wac Were oluwo gima go won oparo, okir womiy win bwok.