Read dhopadhola Cik 2 Bible Online

Cik 2 - dhopadhola bible

Cik 2

¹Wawire to wawotho gik i thim, i royo ma Nam M'obokere paka Rwoth owaco ran aka wathoko Got Edom ma ndelo kweth.

²Kenyo Rwoth oluwo kodan ka waco ni:

³“Witieko thoko piny matendere me m'oromo, wire win wikadhi yumalo,

⁴aka miy ji or iwaci rijo ni, wicegin luwo iy'adec pa wade mewin, nyikway Esau, ma jobedo i Edom. Jolabedo gi bwok riwin, ameno wiripo gwokere swa,

⁵cako lweny gi jo, kole akilamiyo win lowo pajo kada ma romo tiendi jo acel. Atieko miyo Esau Got Edom.

⁶Wiripo nyewo cemo wok bongi jo gi feza, ŋey wicam, aka wiripo nyewo pi gi feza ŋey winyal madho.

⁷Kole Rwoth Were mewin otieko miyo win silwany i kisi gima witimo je. Go oŋeyo woth mewin i thim madwoŋ me; aka oro piero aŋwen me Rwoth Were mewin obedo gi win m'ongoye gima wicando.”

⁸Ameno wakalo wutmin wan, nyikway Esau ma jobedo i Edom, waweyo cen royo ma kadho i Araba, Elath kodi Eziongeber, aka wagiki yumalo luwo gi royo ma kadho i thim ma Mowab.

⁹Rwoth owaco ran ni, “Wikiri wikwiny Jomowab kosa wilweny gi jo, kole akilamiyo win lim pajo, ato atieko miyo Ar ri nyithindho pa Loti paka lim pajo.”

¹⁰(Joemim, ji ma jothoth aka ma joboyo paka Joanakim oyido cango jobedo kenyo.

¹¹Paka Joanakim, jo bende oyido oŋey jo paka Jorefayim, Jomowab oyido jolwoŋo jo ni Joemim.

¹²Kucel Johori am'oyido cango jobedo i Edom, to nyikway Esau joriemo woko jo, joreyo woko jo, to jobedo i lowo pajo, paka Joisiraili jotimo i lowo ma Rwoth omiyo jo lunjo.)

¹³Onyo medere win wakal pi ma mol Zered. Ameno wamedere to wakalo pi ma mol Zered.

¹⁴Hongo ma wacowo woth wok i Kades Barineya cuka wakalo pi ma mol Zered obedo oro piero adek g'aboro, cuka luse pa jolweny je orere woko wok i kambi paka Rwoth oyido okwoŋere ma mako jo.

¹⁵Adieri, cingi Rwoth won oay kwoŋ jo, fudho woko jo wok i kambi, cuka joje jorere woko.

¹⁶Tekin joje jotieko tho wok i dier ji,

¹⁷Rwoth oluwo kodan ka waco ni:

¹⁸“Konon wilaŋado kew pa Jomowab gi Ar.

¹⁹Ka wicegin tundo i kew gi Joamon, wikiri wikwiny jo kosa wilweny gi jo, kole akilamiyo win lowo pajo paka lim mewin, kwoŋbedo atieko miyo ri nyikway Loti.”

²⁰(Meno bende itero paka lowo pa Jorefayim. Jorefayim cango oyido jobedo kenyo, makada nende Joamon jolwoŋo jo ni Zamzumim,

²¹ji ma jotek aka jothoth, ma joboyo paka Joanakim. To Rwoth oreyo woko jo ruwaŋ Joamon ŋey jowonyal bedo i lowo pajo.

²²Rwoth otimo gimoro acel ri nyikway Esau, ma jobedo i Edom gi reyo woko Johori ruwaŋ jo ŋey jowonyal bedo i lowo pajo kiri konon.

²³Paka ri Joavim, m'oyido jobedo i calin tundo kiri Gaza, joma wok i Kirete joreyo woko jo to jobedo i lowo pajo.)

²⁴“Ay win wimedere gi woth wiŋadi milelo ma malawa Arinon. Neni, atieko ketho i cingi win Kere Sihon pa Joamor ma Hesibon kodi lowo pere. Cak win mako lowo pere gi lweny gi go.

²⁵Konon me acako ketho bwok kodi lworo kwoŋ nonin je ma jonitie i pendi polo ro win. Ka jowinji wac ma mako kwoŋ win, jolakirin to jobwok ro win.”

²⁶Aoro jomikwenda wok i thim ma Kedemoth bongi Kere Sihon ma Hesibon gi wac ma siem k'awaco ni:

²⁷“K'iyeyan luwo i lowo perin, alaluwo nyaka royo kende, m'akirwayo racuc kosa racam.

²⁸Ilakitana an cemo ma pesa, ŋey anyal cemo, kodi pi, ŋey anyal madho. Nyaka Yeyan aluw atiendi,

²⁹paka nyikway Esau ma jobedo i Edom kodi Jomowab ma jobedo i Ar jotimo ran cuka anoŋadi Yordan donjo i lowo ma Rwoth Were mawan miyo wan.”

³⁰To Kere Sihon ma Hesibon k'oyeyo wan luwo, kole Rwoth Were mewin otweyo adundo pere kodi cunye matek ŋey womiy go i cingi win, paka otieko timo pama.

³¹Rwoth owaco ran ni, “Neni, atieko cako miyo Sihon kodi lowo pere riwin. Cak win pama mako lowo pere.”

³²Ameno munyo Sihon owok kwoŋ wan, go kodi ji pere je lweny i Yahaz,

³³Rwoth Were mawan omiyo go i cingi wan, aka wafodo go piny, kiri gi nyikwaye kodi ji pere je.

³⁴I hongo no wamako tindin pere je, aka i kisi tindi wasika woko cwo, mon, kodi nyithindho. Ongoye ŋata waweyo m'obothi.

³⁵Nyaka ogwaŋe ama waweyo paka mawan, kiri gi gima wanyaga i tindin ma wamako.

³⁶Cako i Arower i gike ma milelo ma malawa Arinon (kiri gi tindi m'oyido nitie i wadi won) tundo kiri Giliad, ongoye tindi m'oyido nitie gi cel mabor riwan. Rwoth Were mawan omiyo wan gigipiny je.

³⁷To wikidonjo i lowo pa Joamon, kodi adec ma thengi malawa Yabok kiri gi tindin madongo i piny matendere, kodi kisi kama Rwoth Were mawan omiyo or ma geŋo wan donjo.