Read dhopadhola Cik 23 Bible Online

Cik 23 - dhopadhola bible

Cik 23

¹Wongoye ŋat'oŋidhi nyangil mande kosa m'oŋad kalac pere ma woyey i kacokirok pa Rwoth.

²Ŋat'onywol woko ma nywomirok kiripi yeyo i kacokirok pa Rwoth, kiri i luse mar'apar wongoye nyikway jo ma jowobedi i kacokirok pa Rwoth.

³Wongoye Jaamon kosa Jamowab ma wiyey i kacokirok pa Rwoth, kiri i luse mar'apar, wongoye nyikway jo ma jowobedi i kacokirok pa Rwoth.

⁴Kwoŋbedo jokwero miyo win cemo kodi pi i woth mewin wok i Misir, aka kwoŋbedo jonyewo Balam wod pa Bewor, ma wok i Pethor i Mesopotamia kwoŋo win.

⁵Kucel Rwoth Were mewin okwero winjo Balam. Rwoth Were mewin owiro lam no i silwany, kwoŋbedo Rwoth Were mewin omaro win.

⁶Wikiri wirangi siem pajo kosa bero pajo tekin kafodi wikwo.

⁷Wikiri widak Jaedom, kole jobedo wade mewin, wikiri widak Jamisir, kole oyido wibedo jopath i lowo pajo.

⁸Nyithindho pajo ma jonywol kiri i luse mar'adek winyalo yeyo jo i kacokirok pa Rwoth.

⁹Ka wiketho kambi kadho lweny gi jokwor mewin, wiripo kurok kwoŋ kidakana moro je.

¹⁰Ka jacwo moro okocere gi leko nike oyido nindo gi dhako to biyo pi ma wor, go ripo wok woko ma kambi; go kiripi bino i kambi.

¹¹Ka othieno otundo, go wolwokere gi pi, aka ka waŋceŋ otieko podho, go nyalo dwoko i kambi.

¹²Wiripo bedo g'adec woko ma kambi, kama winyalo kadh'iye konyirok.

¹³Wiripo bedo gi kitiyo, ma ka witieko konyirok woko ma kambi, wiripo kunyo bur to wiyiko gima wipielo.

¹⁴Kole Rwoth Were mewin wotho i kambi mewin, botho win kodi jwango jokwor mewin, riameno kambi mewin ripo bedo maleŋ, ŋey go wokiri wonen gimakoc to eye woko kwoŋ win.

¹⁵Ŋecin ma jokwale bino bongi win wok bongi rwodhe pajo, wikiripi dwoko jo ri rwodhe pajo.

¹⁶Jolabedo gi win, i dier win, i kabedo moro je ma joyer i tindi mewin acel, kama jomiti je, wikiripi diyo jo.

¹⁷Wongoye nyako Jaisiraili moro je ma wobedi malaya i ot pa were.[1]

¹⁸Wikiripi kelo pesa m'ocul malaya i Ot pa Rwoth Were mewin i cul ma cikirok, kole je obedo amien ri Rwoth Were mewin.

¹⁹Wikiripi kikopa pesa gi magowa ri Jaisiraili, kosa gir'aora, kosa gimoro je m'ikopa.

²⁰Ri japath inyalo kikopa gi magowa, to ikir'ikopa omin in gi magowa, ŋey Rwoth Were mewin womiy win silwany i tic mewin je i lowo ma wicegin donjo lunjo.

²¹ K'itimo cikirok ri Rwoth Were perin, ikir'igali gi culo, kole Rwoth Were perin adieri lamitin icul, aka labedo rin reco.

²²To k'iweyo m'ikiciko, kilabedo rin reco.

²³Gima dhokin otuco iripo timo gi kinen, paka in won iciko Rwoth Were perin gi dhokin.

²⁴K'idonjo i ndelo vini pa jager perin, inyalo camo ma romin paka imito, to ikiripi tiŋo iy'atawo.

²⁵K'idonjo i ndelo duma pa jager perin, inyalo turo ye ithe gi cingin, to ikiripi keco ŋano pere gi ringa.