Read dhopadhola Cik 24 Bible Online

Cik 24 - dhopadhola bible

Cik 24

¹Ka jacwo odonjo i nywomirok gi dhako, to nwaŋere nike dhako k'osangala go, kwoŋbedo nitie koco moro i go, jacwo no wondiki rigo balwa ma pokirok, wokethi i cingi go, to riemo woko go i ot pere.

²Ka dheno owok i ot pere, go nyalo nywomere gi jacwo man.

³To ka jacwo ma go onywomere gine k'omaro go, to ndiko rigo balwa ma pokirok, aka omiyo go i cinge, kosa ka jacwo no otho,

⁴kenyo cwor go marapena, m'otelo riemo go, kiripi gik tero go paka dhako pere kendo, paka go otieko waco nike go koc. Kole meno labedo amien ruwaŋ Rwoth, aka wilakelo banja i lowo ma Rwoth Were mewin miyo win paka gir'alunja.

⁵Ka jacwo nyaka onywomo dhako, go kiripi kadho gi jolweny kosa timo tic ma makere gi lweny. Go ripo bedo peco ma oro acel, kisangala gi cege ma go onywomo.

⁶Wongoye dhano ma wosinga kidi kosa cuma ma rego, kole meno bedo paka kisinga kwo.

⁷K'onwaŋ dhano kwalo Jaisiraili nyawote, loko go ŋeca kosa tana Jaisiraili, jakwo no ripo tho, ŋey wicidi woko reco no i dier win.

⁸Gwokere win kwoŋ thoyamo ma dhowo, luwo gi kinen fonji ma jocway ri Were i wi migam ma Jolevi jomiyo win, paka atieko miyo jo or.

⁹Poyi win gima Rwoth Were mewin otimo ri Miriam i woth mewin wok i Misir.

¹⁰Ka ikopa jager perin gimoro je, ikiripi donjo i ot pere kwanyo gima go osinga.

¹¹Iripo kuro gi woko, kareno ŋat'ibanja kelo rin gima go osinga.

¹²Ka ŋato obedo jacandi, ikiripi nindo gi gima go osinga.

¹³Iripo dwoko rigo gim'osinga ka waŋceŋ podho, ŋey jager perin wonyali nindo i nanga pere, aka labedo rin gim'otire ruwaŋ Rwoth Were perin.

¹⁴Ikiripi diyo jatic ma jacandi kosa jotic ma bu gimoro, obedi Joisiraili kosa jopath ma jobedo i lowo mewin i tindin mewin.

¹⁵Iripo culo jo cul pajo kisi ndelo mafodi waŋceŋ k'opodho, kwoŋbedo jobedo jocandi aka meno apaka jokwo, ka k'obedo ameno jonyalo ywak ri Rwoth kwoŋin, aka labedo rin reco.

¹⁶Jonywol kiripi neko jo ro nyithindho pajo, aka nyithindho kiripi neko jo ro jonywol pajo. Kisi dhano je won wotho ro reco pere.

¹⁷Ikir'ithwon japath kosa nyithindho kic tiro; aka ikir'imaki nanga pa citho ma kisinga.

¹⁸Poyi win nike oyido wibedo ŋecin i Misir aka Rwoth Were mewin obotho win wok koro, riameno amiyo win or timo gime.

¹⁹K'ikeco ranyak perin i ndelo perin aka wiyin owil gi mweniko man i ndelo, ikir'igiki omo, meno weyi ri japath, nyithindho kic, kodi citho, ŋey Rwoth Were perin womiy tic je ma cingin silwany.

²⁰K'ifono yen oliv perin, ikir'iyengi m'odoŋ, labedo apa japath, nyithindho kic, kodi citho.

²¹K'ifono nyingi vini i ndelo vini perin, ikir'iluw fono m'odoŋ, labedo apa japath, nyithindho kic, kodi citho.

²²Poyi win nike oyido wibedo ŋecin i lowo ma Misir, riameno amiyo win or timo gime.