Read dhopadhola Cik 31 Bible Online

Cik 31 - dhopadhola bible

Cik 31

¹Musa omedere luwo wac me ri Joisiraili je.

²Aka owaco rijo ni, “Ajaoro miya acel gi piero ario konon me. Akinyali kendo medirok, aka Rwoth otieko waco ran ni, ‘Ak'okali Yordan me.’

³Rwoth Were mewin won ama laŋado yuwiy win. Go lareyo woko nonin me ruwaŋ win. Yosuwa bende latelo win paka Rwoth owaco.

⁴Rwoth latimo rijo paka otimo ri Sihon kodi Og kerin pa Joamor kodi lowo pajo ma go oreyo woko.

⁵Rwoth lajwango jo ruwaŋ win, aka wilatimo rijo paka amiyo win or.

⁶Bedi win matek, bedi win jomiseni; wikiri wibedi gi bwok kosa wikirin ro jo, kole Rwoth Were mewin ama kadho gi win. Go k'owey win, kosa jwango win.”

⁷Musa olwoŋo Yosuwa aka owaco rigo ruwaŋ Joisiraili je ni, “Bedi matek, bedi jamisen, kole iŋat'ilakadho gi ji me i lowo ma Rwoth ociko kwarere pajo miyo jo, aka ilamiyo jo lunjo.

⁸Rwoth won ama telo yuwiy win. Go labedo kodin; go kilaweyin kosa jwangin. Ikir'ibedi gi bwok kosa inyapere.”

⁹Musa ondiko cik me piny, to miyo jocway ri Were i wi migam, wot Jolevi, ma jotiŋo Kakan ma Cikirok pa Rwoth kodi jodongo je ma Isiraili.

¹⁰Musa omiyo jo or ka waco ama: “Kisi ka oro mar'abirio rumo, i hongo ma reyo woko banjin, i Kalima ma Kayindi,

¹¹ka Joisiraili je jobino ruwaŋ Rwoth Were mewin i kabedo ma go layero, soma win cik me malo ruwaŋ Joisiraili je ka jowinjo.

¹²Coki win ji, cwo, mon, nyithindho kiri gi jopath ma jobedo i waŋkac mewin, ŋey jowowinji, to jofonjere lworo Rwoth Were mewin, aka ŋey jowogwokere timo wac je ma cik me.

¹³Nyithindho pajo ma fodi jokuya jowowinji aka jowofonjere lworo Rwoth Were mewin, tekin fodi wimedo kwo i lowo ma wiŋado Yordan kadho lunjo.”

¹⁴Rwoth owaco ri Musa ni, “Ee, ndelo perin ma tho cegin tundo, lwoŋ Yosuwa aka wibin gi go i Wema ma romo, ŋey anyal oro go.” Aka Musa kodi Yosuwa jokadho i Wema ma romo.

¹⁵Rwoth omenyere i wema i siro ma pondeponde; aka siro ma pondeponde ocungo i dhiot ma wema.

¹⁶Rwoth owaco ri Musa ni, “Icegin nindo kanyacel gi kwarere perin ka. To ji me jolaay timirok paka malaya, luwo werin pa jopath i dier lowo ma jocegin kadh'iye koro, aka jolaweyan, to joturo cikirok m'atimo gi jo.

¹⁷Nge paran laliel kwoŋ jo i ndelo no, alajwango jo t'apano waŋan kwoŋ jo. Joladoŋ ri rerok aka gimarac kweth kodi teko labino kwoŋ jo. I ndelo no jolapenjo ni, ‘Teko me k'obino kwoŋ wan, kwoŋbedo Were mawan ongoye i dier wan?’

¹⁸I ndelo no alapano waŋan adieri, ro reco ma jotimo gi wirok bongi werin man.”

¹⁹“Onyo riameno ndiki wer me, aka ifonji Joisiraili, kethi i dhok jo, ŋey wer me wobedi ran jakony ma luwo adieri kwoŋ Joisiraili.

²⁰Kole k'atieko kelo jo i lowo m'aciko kwarere pajo, ma mol gi cak kodi mo kic, ka jotieko cemo gi yeŋo, jolawire bongi werin man tiyo rijo, cayan kodi turo cikirok paran.

²¹Aka ka raco kodi teko kweth otieko podho kwoŋ jo, wer me labedo jakony ma luwo adieri, kwoŋbedo kilarwenyo i dhok nyikway jo. Kole atieko ŋeyo gima joyikere timo konon mafodi akikelo jo i lowo m'aciko jo.”

²²Musa ondiko wer no i ndelo no won to fonjo Joisiraili.

²³Rwoth ooro Yosuwa wod pa Nun ka waco ni, “Bedi matek, bedi jamiseni, kole ilakelo Joisiraili i lowo m'aciko jo. Alabedo kodin.”

²⁴Aka paka Musa otieko ndiko wac ma cik me je i kitawo kiri i cowe,

²⁵Musa owodho or ri Jolevi ma jotiŋo Kakan ma Cikirok pa Rwoth ka waco ama:

²⁶“Ter win kitawo ma cik me, aka wikethi kabuti Kakan ma Cikirok pa Rwoth Were mewin, weyi wodoŋ kenyo paka jakony ma luwo adieri kwoŋ win.

²⁷Kole aŋeyo maber paka wi jogwenyirok kodi wictek. Ee fodi akwo gi win konon to wigwenyere kwoŋ Rwoth, t'obedi nedi k'atieko tho!

²⁸Coki ran jodongo je ma nonin mewin kodi jodhum, ŋey anyal luwo gi jo wac me ka jowinjo, aka ŋey anyal lwoŋo polo kodi piny bedo jokony kwoŋ jo.

²⁹Kole aŋeyo nike rumacen ma tho paran, wilatimo gikidakana adieri, aka wilawire woko kwoŋ yo m'amiyo win or luwo, i ndelo no teko lapodho kwoŋ win, kwoŋbedo witimo reco ruwaŋ Rwoth, kwinyo nge pere gi tic ma cingi win.”

³⁰Musa oluwo i ithi Joisiraili je m'oyido jocokere wac je ma wer me kiri i cowe.