Read dhopadhola Cik 32 Bible Online

Cik 32 - dhopadhola bible

Cik 32

¹Cik ithin, awi polo aka alaluwo, winji awi piny, wac ma wok i dhokan.

²Fonji paran lathon paka koth, luwo paran laŋicere paka thoyo, paka koth ma lilo i lum, paka nyidho i cemo madongo.

³Kole alapako nyingi Rwoth, alamiyo dwoŋ ri Were mawan.

⁴Go tele, tic pere nitie i kare, yo pere je otire. Were ma timo adieri, m'ongoye gi banirok, go jatiro aka timo gim'otire.

⁵Kucel nyithindho pere jobanere rigo, jobedo luse ma jorwenyo, ma jomienere.

⁶Ama apaka wilaculo Rwoth? Awi ji ma jomiŋ, ma jongoye gi rieko! Kosa go k'obedo bawin, go m'ocweyo win, m'otimo win, to bedo cakirok mewin?

⁷Poyi ndelo ma cen, par kwoŋ luse macon, penji benin aka lakowo rin, jom'otegino jolawaco rin.

⁸Munyo Jamalo Swa opoko nonin lim, munyo otiako ji, ocomo kew ri ji, cungo kwoŋ welo pa Joisiraili.

⁹Adec pa Rwoth obedo ji pere, Yakobo obedo alunja pere.

¹⁰Go onwaŋo go i lowo abar, i thim ma nyekere m'othangere, okwonga go, aka odewo kwoŋe, ogwoko go paka nyangil waŋe.

¹¹Paka ango kedho woko thac mere, aka waya i wi nyithindhe, paka yaro bwombe aka tiŋo jo malo, aka liero jo i bwombe,

¹²apaka Rwoth kende am'otelo jo, aka ongoye were makicar m'oyido nitie gi jo.

¹³Go otiŋo jo i kabedo ma malo i piny, aka opidho jo gi ranyak ma ndelin, omiyo jo naŋo mo kic ma wok i tele, kodi mo wok i tele lwanda ma cot mac.

¹⁴Mo dhiaŋ kodi cak mwendi, gi bor nyithindhi rombo kodi wot rombo. Dhok ma Basan kodi diegi, kanyacel gi ŋano m'oyer ayera kodi vini ndoto ma wimadho.

¹⁵Yesurun meno nyingi Yakobo man, opoŋ aka ogwenyere, okelo del aka cwe, ojwango Were m'ocweyo go, aka oŋalo Tele ma both pere.

¹⁶Jomiyo go nyeko gi werin makicar, aka jokwinyo nge pere g'amien.

¹⁷Jocowere ri jwogi, ma ki Were, werin ma fodi jokuya, ma nyaka joay manyen, ma kwarere pajo jok'olworo.

¹⁸Wikiparo kwoŋ Tele m'onywolo win, wiy win owil gi Were m'onywolo win.

¹⁹Rwoth oneno aka omako nge, okwedo jo paka nyithindho pere, kwoŋbedo jomiyo go nge.

²⁰Go owaco ni: Alapano waŋan kwoŋ jo, Alaneno gima gike pajo obedi; kole jobedo luse m'orwenyo, nyithindho m'adieri kinwaŋere i jo.

²¹Jomiyan abedo gi nyeko gi gima k'obedo Were, jokwinyo nge paran gi cal pajo. Ameno alamiyo jo nyeko gi gima k'obedo ji, alakwinyo nge pajo gi nono mamiŋ.

²²Kole nge paran oliel paka mac, aka owaŋ kiri i piny pa jom'otho, reyo woko piny kodi ranyak mere, aka ocwinyo kindi gote.

²³Aladhuro teko kwoŋ jo, alaoro aserin paran kwoŋ jo.

²⁴Kec ama lanyapo jo, two nundu oreyo woko jo. Aladhiro kwoŋ jo lak ogwaŋe, gi kwir gigipiny ma jomol i fukefuke.

²⁵Abor laloko win ma bu nyithindho, woko kodi i iye, lareyo woko jayac kodi nyako mambula nyathi ma dhoth kodi jalwar.

²⁶Awaco ni, alatoŋo jo mathindho thindho, aka alareyo woko jo i paro pa ji.

²⁷T'alworo oro nge pa jakwor, kole jokwor pajo jonyalo niaŋ kicar, to jowaco nike otiŋ cingi wan malo, me k'obedo Rwoth am'otimo gime.

²⁸Kole jobedo nono ma jongoye gi rieko, aka jongoye gi niaŋ.

²⁹Kabedi oyido joriek, dinyo joniaŋ gime, di joparo kwoŋ nger ma gike pajo labedo.

³⁰Ŋat'acel oyido d'oriem nedi gana, aka jario jomiy nedi gana apar ŋwec, kwanyowoko ka Tele pajo am'otana jo, Rwoth oyido ojala jo?

³¹Adieri tele pajo kicale Tele mawan, aka jokwor mawan wegi joŋeyo.

³²Kole yen vini pajo obedo ma wok i Sodom, wok i ndelo vini ma Gomora, nyingi vini pajo nitie iye kwir, kayegin mere kec.

³³Vini pajo obedo kwir thwole, kwir mager pa malasaŋ.

³⁴Gime k'okan kodan, k'omwon i udi paran ma kan?

³⁵Culo kwor obedo aparan, kodi miyo gir'acula, kole i sawa ma tiendi jo ocer; meno ndelo ma teko orikere cegin, aka rerok pajo bino piyo.

³⁶Kole Rwoth lathumo banja ri ji pere, aka labedo gi wor kwoŋ ŋecin pere, k'oneni nike jorumo gi meni, m'ongoye ŋat'otwey kosa m'ogony ma jodoŋ.

³⁷Aka go lapenjo ni: “Nikune werin pajo, tele pajo ma jopond'iye;

³⁸ma jocamo bor ma cowirok pajo, to jomadho vini ma mic ma medho pajo? Weyi jowoay malo aka jowokony win, weyi jowokwonga win!

³⁹Neni win pama ni An, Abedo go, ongoye were man kwanyowoko an, Aneko, aka amiyo kwo, amiyo litho, aka acango, aka ongoye ŋata nyalo botho dhano wok i cingan.

⁴⁰Kole atiŋo malo cingan i polo, aka akwoŋere, paka akwo cil gi cil.

⁴¹K'apako abor paran maliel, to cingan mako thumo banja, alaculo kwor kwoŋ jokwor paran, aka alaculo kwor kwoŋ jono ma jodakan.

⁴²Alamiyo aserin paran jowomer gi remo, aka abor paran lacamo riŋo, gi remo pa jom'onek kodi jom'otwey, wok i ye wi jakwor maboyo.

⁴³Fore win, awi nonin, kodi ji pere, kole go laculo kwor ri remo pa ŋecin pere, go laculo kwor kwoŋ jokwor pere, aka lanyutho wor ri lowo pere kodi ji pere.”

⁴⁴Musa obino aka oluwo wac je ma wer me i ithi ji, kanyacel gi Yosuwa wod pa Nun.

⁴⁵Munyo Musa otieko luwo wac me je ri Joisiraili je,

⁴⁶Musa owaco rijo ni, “Kethi win cuny win i wac je m'afonjo win konon me, ma wilamiyo nyithindho mewin or kwoŋe kuro kodi timo, wac je ma cik me.

⁴⁷Kole wac me k'obedo manono riwin, t'obedo wac ma kwo, aka luw'iye winyal kiyindira i lowo ma wicegin kalo Yordan bed'iye.”

⁴⁸Rwoth oluwo gi Musa i ndelo no won ka waco ni:

⁴⁹“Idhi malo wi got pa Joabarim, Got Nebo, manitie i lowo ma Mowab, got Nebo m'oŋiyere gi Yeriko aka inen lowo ma Kanan m'amiyo Joisiraili paka gipajo.

⁵⁰Ilatho kenyo wi got m'idho aka ilariwere gi wade perin, paka omin in Aron otho wi Got Hor, to riwere gi wade pere.

⁵¹Kwoŋbedo wijario je wituro yeyo kodan i dier Joisiraili i pi ma Meriba, cegin gi Kades i thim ma Zin, rupiri wikiteran paka aleŋ i dier Joisiraili.

⁵²Kucel ilaneno lowo gi bor, t'ikilatundo koro i lowo m'amiyo Joisiraili.”