Read dhopadhola Cik 5 Bible Online

Cik 5 - dhopadhola bible

Cik 5

¹Musa ocoko Joisiraili je, to waco rijo ni, Winji win, Awi Isiraili, fonji kodi cik, m'awaco riwin konon, wiripo fonjere, kuro kodi timo jo.

²Rwoth Were mawan otimo gi win cikirok i Horeb.

³K'obedo gi kwarere mawan ma Rwoth timo gi jo cikirok me, to gi wan, ma wanitie ka konon, wan mafodi wakwo.

⁴Rwoth oluwo gi win awaŋ g'awaŋ wok i mac wi got.

⁵I hongo no oyido acungo i dier Rwoth kodi win tuco riwin wac pa Rwoth; kole oyido winitie gi lworo ro mac aka wikidho malo wi got. Aka go owaco ni,

⁶An abedo Rwoth Were mewin, m'owodho win i lowo ma Misir, wok i ot ma twec.

⁷Wikiripi bedo gi werin man ruwaŋan.

⁸Wikiripi timo cal ma gimoro je, kosa ma cwec manitie i polo malo, kosa manitie i piny, kosa manitie i pi i pendi piny.

⁹Wikiripi kulok piny rijo kosa lamo jo; kole An Rwoth Were mewin, abedo Were ma janyeko, amiyo nyithindho gir'acula ri reco pa jonywol pajo, kiri i luse mar'adek kodi mar'aŋwen pa jono ma jokweran.

¹⁰To anyutho mar makiwire ri luse ganin pa jono ma jomaran aka jokuro or paran.

¹¹Wikiripi oro nyingi Rwoth Were mewin i nger m'okom, kole Rwoth k'ocwaki ri ŋata oro nyinge i nger m'okom.

¹²Kur win ndelo ma sabato aka wikuri maleŋ, paka Rwoth Were mewin omiyo win or.

¹³Ndelo aucel wiripo riwin kodi timo tic mewin je.

¹⁴To ndelo mar'abirio obedo sabato ri Rwoth Were mewin; wikiripi timo tic moro je; win, kosa nyithindho mewin, kosa ŋecin mewin, kosa dhok kosa punde, kosa mwendi mewin, kosa japath ma bedo i tindin mewin, ŋey ŋecin mewin bende jowonyal ywomirok paka win.

¹⁵Poyi win nike oyido wibedo ŋecin i lowo ma Misir, aka Rwoth Were mewin owodho win wok koro gi cinge ma meni kodi cinge m'oyare. Riameno Rwoth Were mewin omiyo win or kuro ndelo ma sabato.

¹⁶Lwor benin gi yokin, paka Rwoth Were mewin omiyo win or, ŋey wikwo ma hongo malac aka winwaŋ bero i lowo ma Rwoth Were mewin miyo win.

¹⁷Ikir'ineki.

¹⁸Ikir'ikwal.

¹⁹Ikir'itim cot.

²⁰Ikir'icwoki dhok jager perin nono.

²¹Ikir'igomba ciwegi, ikir'igomba ot pa jager perin, kosa ndelo pere, kosa ŋeca pere, kosa dhiaŋ, kosa punda, kosa gimoro je m'obedo apa jager perin.

²²Me wac ma Rwoth oluwo gi dwonde ma malo ri cokirok je wi got, wok i mac, pondeponde, kodi mudho m'opoto, aka k'omedo man. Go ondiko i telin mapando ario, aka omiyan.

²³Munyo wiwinjo dwonde wok i mudho, kareno got liel mac, wibino bongan, jotel ma nonin je kodi jodongo mewin,

²⁴aka wiwaco ni, “Neni, Rwoth Were mawan otieko nyutho wan dwoŋ kodi meni pere, aka watieko winjo dwondi go wok i mac. Konon watieko neno nike Were nyalo luwo gi dhano to ŋato fodi medo bedo makwo.

²⁵Onyo pama raŋo watho? Kole mac madwoŋ me lareyo woko wan; ka wamedo winjo dwondi Rwoth Were mawan kendo, walatho.

²⁶Kole ŋa manitie i del m'otieko winjo dwondi Were makwo luwo wok i mac, paka watieko winjo, aka omedo kwo?

²⁷Core cegin, in won, aka winji gima Rwoth Were mawan waco je. Kenyo wac riwan gima Rwoth Were mawan waco rin je, aka walawinjo to watimo.”

²⁸Rwoth owinjo wac mewin munyo wiluwo kodan, aka Rwoth owaco ran ni, “Atieko winjo wac pa ji me, ma jowaco rin, jotire i gima jowaco je.

²⁹Kabedi oyido jonitie gi paro paka me, lworan kodi kuro or paran noknok, ŋey jowonwaŋ bero kodi nyikway jo cil gi cil,

³⁰kadhi iwaci rijo ni, ‘Gik win i wemin mewin.’

³¹To in, cungi ka bongan, alawaco rin or je, fonji kodi cik, m'iripo fonjo jo, ŋey jowotimi i lowo m'amiyo jo bedo apajo.”

³²“Riameno wiripo kurok timo paka Rwoth Were mewin omiyo win or; wikiripi rwayo racuc kosa racam.

³³Wiripo luwo royo ma Rwoth Were mewin omiyo win or luwo, ŋey winyal kwo, winwaŋ bero, aka ŋey winyal bedo gi kwo mabor i lowo ma wikadho lunjo.”