Read dhopadhola Cik 6 Bible Online

Cik 6 - dhopadhola bible

Cik 6

¹Me or, fonji kodi cik ma Rwoth Were mewin omiyan or fonjo win kuro i lowo ma wicegin donjo gi bed'iye.

²Ŋey win kodi nyithindho mewin kodi nyikway win winyal lworo Rwoth Were, kuro cik kodi or m'afonjo win, i kwo mewin je ŋey ndelo ma kwo mewin wobedi mabor.

³Winji Awi Isiraili, aka kur win gi kinen, ŋey winwaŋ bero, aka ŋey wimedi nyay swa i lowo ma mol gi cak kodi mo kic, paka Rwoth, Were pa kwarere mewin ociko win.

⁴Winji Awi Isiraili, Rwoth Were mawan, obedo Rwoth acel.

⁵Iripo maro Rwoth Were perin g'adundo perin je, gi cunyin je, gi meni perin je.

⁶Kur win wac me, m'amiyo win or kwoŋe konon i cuny win.

⁷Fonji win nyithindho mewin gi kinen aka luw win kwoŋe ka winitie peco kodi ka wiwotho i royo, ka winindo piny kodi ka wicew.

⁸Tweyi win i cingi win kodi i nyim win paka ranyuth,

⁹ndiki win ruwaŋ dhiot ma udi mewin kodi i waŋkace mewin.

¹⁰Ka Rwoth Were mewin otieko kelo win i lowo m'ociko kwarere mewin, Abraham, Isaka, kodi Yakobo miyo win, tindin madongo malac ma wikigeto,

¹¹udi m'opoŋ gi nger gigipiny kweth ma wikipoŋo, kacoko pi ma wikikunyo, ndelin vini kodi oliv ma wikipidho, ka witieko camo ma romo,

¹²gwokere win wicwil okir omaki win gi Rwoth, m'owodho win wok i lowo ma Misir, wok i ot ma twec.

¹³Wiripo lworo Rwoth Were mewin, go ama wiripo tiyo rigo, aka wiripo kwoŋere i nyingi go kende.

¹⁴Wikiri wiluw werin man, werin pa nonin ma jothoko win,

¹⁵kwoŋbedo Rwoth Were mewin, manitie gi win, obedo Were ma janyeko. Nge pa Rwoth Were mewin nyalo liel kwoŋ win aka nyalo reyo woko win wok i piny.

¹⁶Wikiri witem Rwoth Were mewin paka witemo go i Masa.

¹⁷Wiripo kuro or pa Rwoth Were mewin, fonji pere, kodi cik pere m'omiyo win.

¹⁸Tim win gim'otire kodi gimaber ruwaŋ Rwoth, ŋey winwaŋ bero, aka ŋey widonji wilunji lowo maber ma Rwoth ociko kwarere mewin miyo win,

¹⁹kanyo riemo woko jokwor mewin je ruwaŋ win paka Rwoth otieko ciko.

²⁰Ka nyithindho mewin jopenji win i hongo ma bino ni, “Or, cik kodi fonji ma Rwoth Were mawan miyo win, dwoŋ mere aŋo?”

²¹Waci win ri nyithindho mewin ni, “Oyido wabedo ŋecin i Misir, to Rwoth owodho wan wok i Misir gi cinge ma meni.

²²Rwoth onyutho ranyuth kodi gir'aura madongo ma kelo lworo kwoŋ Misir, kwoŋ Farawo kodi peco pere je ma waneno.

²³Go owodho wan wok koro ŋey wokel wan miyo wan lowo ma go ociko gi kwoŋirok ri kwarere wan.

²⁴Rwoth omiyo wan or kuro cik me je, lworo Rwoth Were mawan, ri bero mawan makirum, ŋey wokur wan makwo, paka obedo kiri pama.

²⁵Ka wakuro or gibe gi kinen ruwaŋ Rwoth Were mawan, paka omiyo wan or, walatimo gim'otire.”