Read dhopadhola Cik 7 Bible Online

Cik 7 - dhopadhola bible

Cik 7

¹Ka Rwoth Were mewin otieko kelo win i lowo ma wicegin donjo bed'iye, to riemo woko nonin kweth ruwaŋ win, Johiti, Jogirigas, Joamor, Jokanan, Joperiz, Johivi kodi Joyebus, nonin abirio ma jotek aka jothoth loyo win,

²ka Rwoth Were mewin otieko miyo win jo to wikengila jo, wiripo reyo woko jo kicutho. Wikiri witim cikirok gi jo kosa winyuthi jo wor.

³Wikiri winywomere gi jo, miyo jo nyir mewin kosa nywomo nyir pajo.

⁴Kole jolawiro woko nyithindho mewin kwoŋ luwan, tiyo ri werin man. Kenyo nge pa Rwoth laliel kwoŋ win aka nyalo reyo woko win piyo.

⁵To me apaka wiripo tiyo gi jo: Turo piny migame pajo, ŋinyo woko sirin, turo piny Asera pajo kodi waŋo cal pajo gi mac.

⁶Kole wibedo ji maleŋ ri Rwoth Were mewin. Rwoth Were mewin otieko yero win kwoŋ nonin je i piny bedo ji pere, lim pere ma welo.

⁷K'obedo nike oyido withoth loyo ji man am'omiyo Rwoth oketho cunye kwoŋ win to yero win; kole oyido winok loyo.

⁸Obedo kwoŋbedo Rwoth omaro win aka okuro cikirok m'otimo ri kwarere mewin, am'omiyo Rwoth owodho win gi cinge ma meni, aka obotho win wok i ot ma twec, wok i cingi Farawo kere ma Misir.

⁹Ŋey win riameno nike Rwoth Were mewin obedo Were, Were ma timo adieri ma kuro cikirok kiri i luse ganin pa jono ma jomaro go aka jokuro or pere,

¹⁰aka go culo kwor kwoŋ jono ma jodak go. Go kibedi moth gi jo.

¹¹Riameno kur win gi kinen, or, cik kodi fonji, m'amiyo win konon.

¹²Ka wiwinjo or me, gi kuro gi kinen, Rwoth Were mewin lakuro gi win cikirok i tirok ma go okwoŋere ri kwarere mewin.

¹³Go lamaro win, lamiyo win silwany, lanyayo win, go lamiyo nywol mewin kodi nywol ma lowo mewin silwany, ŋano mewin kodi vini kodi mo mewin, nywol ma dhok mewin kodi mwendi mewin, i lowo ma go ociko kwarere mewin ni lamiyo win.

¹⁴Wilabedo ji ma josilwany kwoŋ nonin je, m'ongoye ŋata kinywol i dier win kosa ogwaŋe mewin.

¹⁵Rwoth lakwanyo woko arama i dier win. Two marac je ma wineno i Misir, go kilakelo kwoŋ win, to lakelo kwoŋ jono ma jodak win.

¹⁶Wiripo reyo woko nonin je ma Rwoth Were mewin miyo win i cingi win, ongoye nyutho jo wor, kosa lamo werin pajo, kole meno labedo riwin bwo.

¹⁷Wilawaco i cuny win ni, nonin me jothoth loyo wan, wanoriemi jo nedi?

¹⁸Wikiri wibedi gi bwok rijo. Nyaka poyi win gima Rwoth Were mewin otimo ri Farawo kodi Misir gibe.

¹⁹Poy win thoyamo madongo ma wineno gi waŋ win, ranyuth kodi gir'aura, cinge ma meni kodi cinge m'oyare ma Rwoth Were mewin owodho gine win. Rwoth Were mewin latimo gimoro acel no ri nonin ma wibedo rijo gi bwok.

²⁰Aka kiri Rwoth Were mewin ladhiro thoyamo kwoŋ jo, cuka kiri joma joboth kodi joma joringi je jorere woko.

²¹Wikiri wibedi gi bwok rijo, kole Rwoth Were mewin, manitie gi win, obedo Were madwoŋ aka kelo lworo.

²²Rwoth Were mewin lariemo woko nonin no ruwaŋ win, adec adec, wikilareyo woko jo dicel, ka k'obedo ameno ogwaŋe madudi jolamedere riwin.

²³To Rwoth Were mewin lajwango jo i cingi win, to bolo jo i kirin madwoŋ, cuka ireyo woko jo.

²⁴Go lamiyo kerin pajo i cingi win aka wilareyo woko nyingi jo i pendi polo, ongoye ŋata lanyalo ciro win, cuka winotiek reyo woko jo.

²⁵Cal ma werin pajo wiwaŋ woko gi mac. Wikiri wiwanya feza kosa zahabu manitie kwoŋ jo ma doŋ gine, kwoŋbedo labedo riwin bwo, kole obedo amien ri Rwoth Were mewin.

²⁶Wikiri wikel gir'amien i pecin mewin, kosa win bende ilareyo woko win paka jo. Wiripo dak, to wikwero, kwoŋbedo okethi gicen ma reyo woko.