Read dhopadhola Yohana 1 Bible Online

Yohana 1 - dhopadhola bible

Yohana 1

¹I cakirok, wac oyido nitie; go oyido nitie gi Were, aka wac no oyido obedo Were won.

²Wok i cakirok go oyido nitie gi Were.

³Gi go Were ocweyo gimoro je manitie, ongoye gima nitie ma go ama k'ocweyo.

⁴Gimoro je manitie olimo kwo i go aka kwo no oyido a lero pa ji.

⁵Lero no liel i mudho aka mudho kinyal neko.

⁶Dhano moro obino, ma Were ooro, nyinge Yohana.

⁷Go obino paka jamikwenda ma luwo ri lero no, ŋey ji je jowoyey luwo i go.

⁸Go am'oyido k'obedo lero no, to jamikwenda ma luwo ri lero ayin.

⁹Lero mar'adieri ma miyo ji je lero, won am'onwaŋo labino i piny.

¹⁰Go obedo i piny, ma cakirok mere owok bonge, to piny k'oŋeyo go.

¹¹Go obino i piny pere won, to ji pere jok'ojolo go.

¹²To jono je ma jojolo go ma joyeyo i nyinge, omiyo jo meni ma lokirok nyithindho pa Were.

¹³Nywolirok pa jono k'obedo ma remo pa dhano, kosa ro mito pa ji, kosa mito pa dhano, to ro mito pa Were won.

¹⁴Wac olokere Dhano, aka obedo gi wan, to waneno dwoŋ pere paka Wod Were acel kende, m'owok bongi Were Bawan, m'opoŋ gi nema kodi adieri.

¹⁵Yohana obedo paka jamikwenda pere m'okoko ka waco ni, “Me a ŋat'atieko luwo kwoŋe ni, ‘Ŋata luwan cen loyan swa gi dwoŋ, rupiri go otelo bedo ran.’ ”

¹⁶Adieri, wajoje watieko nwaŋo nema wi nema kwoŋ ŋaŋo pere.

¹⁷Kole Cik obino luwo i cingi Musa, to nema kodi adieri obino riwan luwo bongi Yesu Kristo.

¹⁸Ongoye moro m'otieko neno Were, kwanyo woko Wode won m'orikere ruŋeti Bamere am'onyutho wan go.

¹⁹Me a gima Yohana owaco munyo Joyuda ma Yerusalem jooro jocway ri Were i wi migam kanyacel gi Jolevi penjo go ni, “To in iŋa?”

²⁰Yohana k'okwero dwoko, to waco kamaler ni, “Aŋat'akibedo Kristo.”

²¹To jopenjo go ni, “To in iŋa won? In Elia?” Go odwoko ni, “Akibedo go.” Jopenjo go kendo ni, “Ibedo jatuci wac Were?” Ana go ni, “Be!”

²²Gikenyo jowaco ni, “Ere waci riwan ŋat'ibedo to. Waripo dwoko wac ri joma jooro wan. Iwaco aŋo ma mako kwoŋin iwon.”

²³Ana Yohana ni, “Abedo dwondi ŋata koko i thim ni, ‘Tir win royo pa Rwoth wowoth'iye!’ ” (Me a gima jatuci wac Were Isaya owaco.)

²⁴Jofarisayo ama jodhiro jomikwenda no.

²⁵Jopenjo Yohana ni, “K'ikibedo Kristo kosa Elia kosa jatuci wac Were, to raŋo m'ibatisa ji?”

²⁶Yohana odwoko ni, “An abatisa kodi pi; to i dier win ka ocungo ŋata wikuya.

²⁷Go luwo ŋeyan, aka akiripi kada gonyo thol war pere.”

²⁸Gigipiny me je otimere i Bethania loka ma jwom Yordan kama go oyido batisa iye ji.

²⁹Yawere mere Yohana oneno Yesu munyo bino bonge to waco ni, “Neni Nyathi rombo pa Were ma kwanyo woko gimarac ma piny!

³⁰Me a ŋat'oyido aluwo kwoŋe munyo awaco ni, ‘Moro luwo ŋeyan, aka loyan gi dwoŋ rupiri go ama otelo bedo ran.’

³¹An won oyido akuya go, t'abino timo tic ma kibatisa ji kodi pi ŋey go wonenere kamaler ri Joisiraili.”

³²Me a mikwenda ma Yohana omiyo, “Aneno Cuny Maleŋ oloro wok i polo to pie kwoŋe.

³³An oyido akuya go, to Were m'ooran kibatisa ji kodi pi am'owaco ran ni, ‘Ŋat'inonen Cuny Maleŋ loro piny to pie kwoŋe, meno a ŋata ripo kibatisa ji gi Cuny Maleŋ.’

³⁴Atieko neno gi tito ri ji ni ŋati me won a Wod Were.”

³⁵Yawere mere Yohana onwaŋo ocungo kenyo kodi jofonjirok pere ario;

³⁶aka munyo oneno Yesu wotho, owaco ni, “Neni Nyathi rombo pa Were!”

³⁷Jofonjirok ario no jowinjo munyo go waco ameno to joluwo Yesu.

³⁸Yesu owire to neno jono munyo joluwo go, to penjo jo ni, “Wiyenyo aŋo?” Jodwoko ni, “Rabi, ibedo kune?” (Rabi, nyaka ni jafonji).

³⁹Go odwoko ni, “Biye neni win.” Gikenyo jokidho gine to joneno kama go bed'iye, to jocowo ndelo no bonge (ato onwaŋo obedo kapa sawa apar m'othieno).

⁴⁰Acel kwoŋ j'ario ma jowinjo gima Yohana owaco, to joluwo Yesu, obedo Andereya, omin Simon Petero.

⁴¹Gikenyo Andereya onwaŋo Simon, omin go, to waco rigo ni, “Wanwaŋo Mesiya.” (Wac me dwoŋ mere ni Kristo).

⁴²Gikenyo go okelo Simon bongi Yesu. Yesu oneno go to waco ni, “Kere ilwoŋin ni Simon, wod pa Yona? Pama nyingin bino bedo Kefas.” (Kefas me rom gi Petero, aka dwoŋ mere ni, “Tele.”)

⁴³Yawere mere Yesu otimo can ma kidho Galili, to nwaŋo Filipo to waco rigo ni, “Luwan!”

⁴⁴(Filipo onwaŋo wok Bethsayida, tindi ma Andereya kodi Petero bende onwaŋo jowok'iye.)

⁴⁵Gikenyo Filipo onwaŋo Nathanel to waco rigo ni, “Watieko nwaŋo ŋata Musa ondiko kwoŋe i kitawo ma Cik, kodi ŋata jotuci wac Were jondiko kwoŋe. Go obedo Yesu, wod Yozefu ma Nazareth.”

⁴⁶To Nathanel penjo ni, “Bende nitie gimaber manyalo wok Nazareth?” Filipo odwoko ni, “Ere biye neni.”

⁴⁷Munyo Yesu oneno Nathanel, oluwo kwoŋe ni, “Me Jaisiraili mar'adieri; ongoye komo moro kwoŋe!”

⁴⁸Nathanel openjo go ni, “Iŋeyan nedi?” Ana Yesu, “Anenin munyo ibedo i tiendi makuyu, mafodi Filipo k'obino lwoŋin.”

⁴⁹Nathanel odwoko ni, “Jafonji, ibedo Wod Were! In a Kere pa Joisiraili!”

⁵⁰Yesu owaco ni, “Iyeyo nyaka rupiri awaco rin nike anenin munyo ibedo i tiendi makuyu? Ibino neno gigipiny madongo maloyo me!”

⁵¹Aka Yesu owaco rigo ni, “Adieri awaco rin, ibino neno munyo polo oyawere kareno jomalaika pa Were joidho malo aka joloro piny wi Wod Dhano.”