Read dhopadhola Yohana 11 Bible Online

Yohana 11 - dhopadhola bible

Yohana 11

¹Dhano m'ilwoŋo ni Lazaro, ma Bethania oyido two. Me obedo tindi ma Maria kodi Marita, nyamin go, oyido jobed'iye.

²(Maria me ama ndir moro oolo mo maŋwe kur i tiendi Rwoth to yweyo gi ye wiye; aka ama Lazaro, omin go, oyido two.)

³Nyimere no jodhiro wac ri Yesu ni, “Rwoth, mere perin m'imaro two.”

⁴Munyo Yesu owinjo, owaco ni, “Two pa Lazaro kilacowere gi tho; gime otimere ma nyutho dwoŋ pa Were, aka nyaka wobedi nger ma Wod Were ripo lim'iye dwoŋ.”

⁵Yesu oyido omaro Marita gi nyamin, kodi Lazaro.

⁶To kada munyo go owinjo wac ni Lazaro two, omedo bedo kam'oyido niye ndelo ario man.

⁷Gikenyo nyaka go owaco ri jofonjirok pere ni, “Weyi wagiki win Yuda kendo.”

⁸Jofonjirok jodwoko ni, “Jafonji kole nyaka okadho hongo macek won cuka Joyuda jomiti goyin gi telin, ama odoko onyo iyiko gik yukorago?”

⁹Yesu owaco ni, “Ndelo nitie gi sawa apar g'ario, k'ameno? Ka dhano wotho odieceŋ, kicer, rupiri go neno lero.

¹⁰To ka go owotho wor, cer, rupiri lero ongoye.”

¹¹Yesu omedo waco ni, “Mere mawan Lazaro nindo, t'abino kidho cewo go.”

¹²Jofonjirok jowaco ni, “Rwoth, ka go nindo bino bedo maber.”

¹³To wac pa Yesu dwoŋ mere oyido ni Lazaro otieko tho, to joparo nike go waco nindo ma ndir je.

¹⁴Gikenyo Yesu owaco rijo kamaler ni, “Lazaro otieko tho;

¹⁵to ri bero mewin asangala nike onwaŋo angoye yukoro aka ŋey wiyey. Ere weyi wakidhi win bonge.”

¹⁶Toma (m'ilwoŋo ni Rut) owaco ri jofonjirok wadi ni, “Weyi wajoje wakidhi watho kanyacel gine!”

¹⁷Munyo Yesu otundo, onwaŋo ni Lazaro oyido otieko bedo ndelo aŋwen i bur.

¹⁸Bethania onwaŋo kirom mayiro ario wok Yerusalem

¹⁹aka Joyuda mathoth onwaŋo jobino limo Marita kodi Maria gi kweyo cuny jo i teko pajo ma tho p'omin jo.

²⁰Munyo Marita owinjo ni Yesu bino, owok woko romo gine; to Maria odoŋ peco.

²¹Marita owaco ri Yesu ni, “Rwoth bedi ceŋino ibedi ka, di omin an k'otho.”

²²T'aŋeyo ni kada pama Were bino miyin gimoro je m'ikwayo go.

²³Yesu owaco rigo ni, “Omin in lacerino.”

²⁴Go odwoko ni, “Aŋeyo ni go bino cerino i ndelo ma rumacen.”

²⁵Yesu owaco rigo ni, “Aŋat'abedo kisukina kodi kwo; ŋata yeyan bino kwo, kada go otho;

²⁶aka ŋata kwo aka yeyan kilatho. Iyeyo gime?”

²⁷Go odwoko ni, “Ey, Rwoth! Ayeyo nike in i Kristo, Wod Were, m'oyido genere ni labino i piny ka.”

²⁸Munyo Marita otieko waco gime, ogik peco lwoŋo Maria nyamin go nyaliŋliŋ. Owaco rigo ni, “Jafonji obino aka lwoŋin.”

²⁹Munyo Maria owinjo gime, oay malo to redo kidho romo gine.

³⁰[Yesu oyido fodi k'otundo loka no, to oyido nitie kama Marita orom'iye gine].

³¹Joyuda m'onwaŋo jonitie i ot gi Maria m'oyido jokweyo cuny go i teko pere munyo joneno go oay malo to rure woko, joluwo go. Joparo nike oyido go kidho dho kaliel ywak.

³²Munyo Maria otundo kama Yesu niye to neno go, opodho piny dho tiende, to waco ni, “Rwoth, bedi ceŋino oyido ibedi ka, d'omin an k'otho!”

³³Munyo Yesu oneno go ywak, aka Joyuda ma jobino gine bende joywak, geregere omako go, aka owinjo malith swa i cunye.

³⁴Openjo jo ni, “Wiyiko go kune?” Jodwoko ni, “Rwoth biye neni.”

³⁵Yesu oywaki.

³⁶Gikenyo Joyuda jowaco ni, “Neni paka onwaŋo omaro go!”

³⁷To jomegi kwoŋ jo jowaco ni, “Ŋat'obotho kiri waŋ dhano m'oyido otho raŋo ma di go k'ogeŋo tho pa jame?”

³⁸Geregere odoko omako Yesu to kidho dho kaliel, m'onwaŋo obedo ŋungu m'ocul dhoke gi tele.

³⁹Yesu omiyo jo or ni, “Kwany win woko tele!” Marita nyamin jatho, odwoko ni, “Rwoth, kole pama onyo go ŋwe marac; cuka yik go onyo me ndelo mar'aŋwen!”

⁴⁰Yesu owaco rigo ni, “Akiwaco rin nike ibino neno dwoŋ pa Were k'iyeyo?”

⁴¹Gikenyo joŋilo woko tele. Yesu oŋiyo malo to waco ni, “Baba, afoyin ni iwinjan.

⁴²Aŋeyo ni ndir je iwinjan, t'awaco ama ma bero pa ji man ka, ŋey jowoyey ni iŋat'ioran.”

⁴³Munyo otieko waco gime, okoko gi dwonde ma malo ni, “Lazaro, woki!”

⁴⁴Ŋat'otho no owok m'otwey cinge gi tiende gi nangin, kareno nanga man oboy gine waŋe. Yesu owaco rijo ni, “Gony win go, aka wiwey wowothi.”

⁴⁵Joyuda mathoth m'oyido jobino limo Maria joneno gima Yesu otimo, to joyeyo go.

⁴⁶To joman kwoŋ jo jogik bongi Jofarisayo to jowaco rijo gima Yesu otimo.

⁴⁷Ameno Jofarisayo kodi jotel pa jocway ri Were i wi migam joromo kodi jopido to jowaco ni, “Watim win aŋo? Neni paka jame onyo timo gir'aura madit!

⁴⁸Ka wayeyo go omedere gi tic me, ji je jobino yeyo go, aka rwodhe ma Roma jobino ay to joŋinyo woko Ot pa Were gi riemo woko nono mawan gipi!”

⁴⁹Ŋat'acel kwoŋ jo ma nyinge Kaifas, m'oyido a jadwoŋ pa jocway ri Were i wi migam i oro no owaco ni, “Wikuya gimoro kad'acel!

⁵⁰Wikiniaŋ ni ber riwin ka ŋat'acel otho ri ji je, loyo nono gipi rerok woko?”

⁵¹Iy'adieri, go k'owaco gime i paro pere won; kwanyo woko paka go oyido jadwoŋ pa jocway ri Were i wi migam i oro no, go otuco mikwenda ma wok bongi Were nike Yesu cegin tho ri Joyuda je.

⁵²Aka ki ri Joyuda kende, to ma coko kanyacel nyithindho pa Were ma jokele iye je.

⁵³Am'omiyo wok i ndelo no kadho malo jotimo can ma neko Yesu.

⁵⁴Riameno Yesu k'owotho kamaler kendo i Yuda, to oeye to kidho kamoro macegin gi thim, i tindi m'ilwoŋo ni Efrayim. Kenyo ama go obed'iye gi jofonjirok pere.

⁵⁵Kalima pa Joyuda ma Kadho, oyido nicegin, aka ji mathoth jowok thenge gi thenge jokidho Yerusalem, timo kula ma lonyo delkwoŋ gin mafodi kalima no k'otundo.

⁵⁶Jo oyido jorango Yesu, aka munyo jocokere i Ot pa Were, wegi jopenjere ni, “Wiparo nedi? Kosa go k'obin i kalima?”

⁵⁷Jotel pa jocway ri Were i wi migam kodi Jofarisayo oyido jotieko wodho or ni ka moro nitie m'oneno kama Yesu niye ripo dhiro wac, ŋey jowomaki go.