Read dhopadhola Yohana 12 Bible Online

Yohana 12 - dhopadhola bible

Yohana 12

¹Munyo fodi odoŋ ndelo aucel aka ndelo ma kalima ma Kadho wotundi, Yesu okidho Bethania, kama Lazaro, ma Yesu ocerino kwoŋ jom'otho bed'iye.

²Joyiko rigo kenyo cemo m'othieno aka Marita oyido a japok cemo kareno Lazaro obedo gi Yesu dhower.

³Gikenyo Maria okwanyo cupa mo maŋwe kur swa ma romo adec kilo gipi, ma nyingi yath moro aka ma welo, to olo i tiendi Yesu, to yweyo gi ye wiye. Kur pa mo no mamit otweyo ot gipi.

⁴Acel kwoŋ jofonjirok pa Yesu, Yuda Iskariot, ŋat'oyido lacamo rigo sereko, okwero ni,

⁵“Raŋo k'otana mo maŋwe kur me siringi miya adek to ipoko jocandi pesa no?”

⁶Go owaco ama ki kwoŋbedo go paro kwoŋ jocandi, to rupiri go oyido jakwo. Go oyido a jamigowa pesa aka onwaŋo diceŋ konyere gi pesa me.

⁷To Yesu waco ni, “Weyi dheno! Oyiki ni go wokan mo me cuka ndelo ma yikirok paran.

⁸Ndiri je wibino bedo gi jocandi, to an akibino bedo gi win ndir je.”

⁹Lwak ji madwoŋ jowinjo ni Yesu oyido nitie Bethania to jokidho kenyo; ki ro wac pa Yesu kende, to ro mito neno Lazaro bende, ma Yesu ocerino kwoŋ jom'otho.

¹⁰Ameno jotel pa jocway ri Were i wi migam jocano neko Lazaro bende;

¹¹rupiri ro gim'otimere kwoŋe, Joyuda mathoth joweyo jotel pajo to joyeyo Yesu.

¹²Yawere mere lwak ji madwoŋ m'onwaŋo obino i kalima ma Kadho, jowinjo ni Yesu oyido bino Yerusalem.

¹³Riameno jokwanyo jangi thith to jokidho romo gine munyo jokoko ni, “Hosana! Jasilwany a ŋata bino i nyingi Rwoth! Silwany pa Were wobedi ri Kere ma Isiraili!”

¹⁴Yesu onwaŋo nyathi punda to bedo i wiye, paka Ndiko Maleŋ waco ni,

¹⁵“Tindi ma Zayon, ikir'ibedi gi lworo, kole Kere perin bino bongin, kareno obedo wi nyathi punda.”

¹⁶Jofonjirok pere jok'oniaŋ kwoŋ gime i hongo no, to munyo Yesu otiek tiŋo malo i dwoŋ nyaka jopoyo nike ndiko owaco gime, aka ni d'otim kwoŋe gime.

¹⁷Lwak ji ma ndelago jobedo bongi Yesu i hongo ma go olwoŋ'iye Lazaro wok i kaliel aka ocerino go kwoŋ jom'otho, jomedo nyayo wac no.

¹⁸Ji kweth jokidho romo gine rupiri jowinjo nike go otimo gir'aura no.

¹⁹Gikenyo Jofarisayo wegi jowaco kendi gin ni, “Wineno, wakinyali gimoro be! Neni win paka piny gipi onyo luwo go”

²⁰Jogris moro bende oyido jobedo megi kwoŋ joma jokidho Yerusalem lamo Were i ndir ma kalima no.

²¹Jobino bongi Filipo, m'oyido wok Bethsayida i Galili, to jokwayo ni, “Jadwoŋ, wamito neno Yesu.”

²²Filipo okidho to waco ri Andereya, aka jario no jokidho to jowaco ri Yesu.

²³Yesu odwoko jo ni, “Pama onyo hongo otundo ma miyo Wod Dhano dwoŋ.

²⁴Adieri awaco riwin, ka nyingi kal moro k'opidhi i lowo to tho, go doŋadoŋa acel mangil. To k'otho, nyaka nywolo nyingi kal kweth.

²⁵Ŋata won omaro kwo pere, bino rwenyo woko kwo; to ŋata kwero kwo pere i piny ka ama bino kuro ri kwo makirum.

²⁶Nyatoro je ma tiyo ran ripo luwan, aka jatic paran bino bedo kam'an'iye. Aka Baba bino miyo nyatoro je ma tiyo ran dwoŋ.”

²⁷“Pama cunyan raman; t'anowaci nedi? Ni, ‘Baba, bothan kwoŋ hongo me?’ To be, me a gim'omiyan atundo i hongo ma candirok me.

²⁸Baba, miy nyingin dwoŋ.” Gikenyo dwondi jo moro oluwo wok i polo ni, “Atieko miyo nyingan dwoŋ, kendo abino medo timo ameno.”

²⁹Lwak ji m'oyido ocungo kenyo owinjo dwondi jo no to jowaco ni manago lithkoth, aka joman jowaco ni, “Calo malaika oluwo gine!”

³⁰To Yesu owaco rijo ni, “K'obedo ri an am'omiyo dwondi jo me oluwo, to riwin.

³¹Ndiri otundo ma thumo banja ri piny me; kendo jadhum ma piny me onyo ibino riemo woko.

³²K'otiek tiŋan malo wok piny abino ywayo ji je bongan.” [

³³Ameno, go onyutho kiti tho ma go oyido kidho candirok].

³⁴Lwak ji odwoko ni, “Kole Cik mawan waco ni Kristo bino kwo cil gi cil. To idoko iwaco ni Wod Dhano iripo tiŋo malo nedi? Wod Dhano no a ŋa?”

³⁵Yesu odwoko ni, “Lero no fodi nitie gi win hongo moro ye. Woth win kafodi lero no nitie gi win, ka mudho fodi k'oumo win; kole ŋata wotho i mudho kiŋey kama go com'iye.

³⁶Yey win lero no kafodi winigine, ŋey wibedi nyithindho ma lero.” Rumacen munyo Yesu otieko waco gime okidho pondo rijo.

³⁷Kada Yesu oyido otieko timo ranyuth madongo me i waŋ jo, je fodi jok'oyeyo go.

³⁸Gime otimere ama ŋey gima jatuci wac Were, Isaya, owaco wotundi i kare ni, “Rwoth, ŋa m'oyeyo mikwenda ma wakelo? Were onyutho ŋa meni pere?”

³⁹Riameno jok'onyalo yeyo paka Isaya odoko owaco kaman ni,

⁴⁰“Were oculo waŋ jo to umo paro pajo, nike waŋ jo wokiri wonen, paro pajo wokiri woniaŋi gimoro, ŋey jokiri jowonyal gik bongan, ni aboth jo.”

⁴¹Isaya owaco ama rupiri oneno dwoŋ pa Ŋato, aka oluwo kwoŋe.

⁴²Kad'ameno, jotel pa Joyuda mathoth bende joyeyo Yesu; to paka onwaŋo jolworo Jofarisayo, jok'owaco gino nyatirtir ni aka ŋey wokiri woriem jo woko i kitipa pa jom'oyeyo pa Joyuda.

⁴³Ato oyido jomaro foy pa ji loyo foy pa Were.

⁴⁴Gikenyo Yesu oluwo gi dwonde ma malo ni, “Nyatoro je ma yeyan kiyeyan kende to yeyo ŋat'ooran bende.

⁴⁵Ŋata nenan meno neno ŋat'ooran bende.

⁴⁶Abino i piny ka paka lero ŋey nyatoro je ma yeyan, wokiri wodoŋ i mudho.

⁴⁷To ka moro winjo mikwenda paran aka kimaki, akithum rigo banja, Ato akibino thumo banja ri piny, to botho piny ayino.

⁴⁸Nitie ŋata bino thumo banja ri nyatoro je ma kweran aka kijol fonji paran; wac m'atieko luwo ama bino bedo jathum rigo banja i ndelo ma rumacen,

⁴⁹rupiri akiluwo gi meni paran won, to Baba am'ooran gim'aripo waco kodi luwo.

⁵⁰Aka aŋeyo nike or pere kelo kwo makirum. Am'omiyo gim'awaco je, awaco paka Baba ooran waco.”