Read dhopadhola Yohana 18 Bible Online

Yohana 18 - dhopadhola bible

Yohana 18

¹Munyo Yesu ocowo kwayo me, oay kodi jofonjirok pere to jokalo jwom Kidiron. Kenyo oyido nitie ndelo moro, to Yesu kodi jofonjirok pere jodonj'iye.

²Yuda, jacami sereko, oyido bende oŋeyo kenyo, rupiri ndir madit Yesu onwaŋo otieko bedo kenyo kodi jofonjirok pere.

³Ameno Yuda okidho kenyo kodi kitipa pa jolweny kodi jokur moro ma Ot pa Were ma jotel pa jocway ri Were i wi migam kodi Jofarisayo jooro. Jotiŋo mac odingili, talin, gi gilweny.

⁴Yesu oyido oŋeyo gimoro je m'onwaŋo kidho timere kwoŋe. Riameno ocore bongi jo to penjo jo ni, “Wirango ŋa?”

⁵Jodwoko ni, “Yesu Janazareth.” Go odwoko ni, “A an me.” Yuda jacami sereko, onwaŋo ocungo gi jo.

⁶Munyo Yesu owaco rijo ni, “A an me.” Jogik gi yuŋey gin to jooy piny ngulungulu.

⁷Yesu odoko openjo jo ni, “Wirango ŋa won.” Jowaco ni, “Yesu Janazareth.”

⁸Yesu owaco rijo ni, “Atieko waco riwin ni a an me. Ere ka wirangan, weyi win jome jowokadhi.”

⁹Gime otimere ama, ŋey gima ndir no go owaco wotundi i kare ni, “Ongoye kad'acel m'orwenyo kwoŋ joje m'imiyan.”

¹⁰Simon Petero oyido nitie g'abor; oyuyo to toŋo ŋeca pa jadwoŋ pa jocway ri Were i wi migam, to codo woko ithe maracuc. Nyingi ŋeca no oyido Maliko.

¹¹Yesu owaco ri Petero ni, “Dwoki abor i ode! Onyo akir'amadhi agwata ma candirok ma Baba omiyan?”

¹²Lwak jolweny kodi jotel pajo kodi Joyuda ma jokur jomako Yesu, jotweyo go,

¹³to jotero go pa Anas m'oyido obedo ba cipa Kaifas, m'oyido jadwoŋ pa jocway ri Were i wi migam i oro no.

¹⁴Kaifas me ama ndir ca omiyo Joyuda rieko nike oyido ber loyo ka ŋat'acel otho ri ji je.

¹⁵Petero kodi jafonjirok man joluwo Yesu. Paka jafonjirok man no oyido oŋeyere maber gi jadwoŋ pa jocway ri Were i wi migam no, go bende odonjo gi Yesu i diedipo pa jadwoŋ no.

¹⁶Petero odoŋ woko to cungo cegin gi dhiot. Jafonjirok man, m'oyido oŋeyere maber gi jadwoŋ no, ogik oluwo gi nyako m'oyido kuro dhiot, to rwako Petero.

¹⁷Nyako m'oyido kuro dhiot owaco ri Petero ni, “In won me k'acel kwoŋ jofonjirok pa ŋato?” Petero odwoko ni, “Be, akibedo.”

¹⁸Piny onwaŋo ŋic, riameno jotic kodi jokur jomoko mac aka onwaŋo jocungo jothoko mac no jooyo. Petero bende okidho to cungo gi jo ka oyo mac.

¹⁹Jadwoŋ pa jocway ri Were i wi migam no openjo Yesu kwoŋ jofonjirok pere kodi fonji pere.

²⁰Yesu odwoko ni, “Ndiri je aluwo kamaler ri piny, aka afonjo i kitipa pa jom'oyeyo pa Joyuda kodi i Ot pa Were, kama Joyuda je jocokere iye, aka ongoye gima fodi awaco nyaliŋliŋ.

²¹To raŋo ma wipenjan ameno? Penji win ji ma jotieko winjan. Kole joŋeyo gim'atieko waco rijo.”

²²Munyo Yesu owaco ama, acel kwoŋ jokur ogoyo lembe g'adhoŋ aka owaco ni, “Inyalo nedi luwo ameno gi jadwoŋ pa jocway ri Were i wi migam?”

²³Yesu odwoko ni, “K'awaco gimoro marac, nyuthi ginago kamaler. To ka gim'awaco otire, raŋo igoyan?”

²⁴Gikenyo Anas odhiro go, ma fodi otwey cinge, pa Kaifas, jadwoŋ pa jocway ri Were i wi migam.

²⁵Petero oyido fodi ocungo kenyo oyo mac. Gikenyo jowote jopenjo go ni, “Ibende ikibedo acel kwoŋ jofonjirok pa ŋato?” To Petero kwedere ni, “Be, akibedo acel kwoŋ jo.”

²⁶Acel kwoŋ ŋecin pa jadwoŋ pa jocway ri Were i wi migam, wat pa ŋata Petero oyido ocodo woko ithe ca, oluwo malo ni, “Akinenin bonge i ndelo kaca?”

²⁷Petero odoko okwedere to waco ni, “Be.” Piyo piyo no to wod gweno koko.

²⁸Jokwanyo Yesu i ot pa Kaifas to jotero go i cel pa gavana. Piny onwaŋo obedo odikin worwor. Joyuda jok'odonjo i cel rupiri oyido joyenyo jowokure ma jok'obedo makoc i kite ma cik, ŋey jowocami kalima ma Kadho.

²⁹Am'omiyo Pilato owok woko romo gi jo to waco ni, “Banja aŋo ma wiosa jame?”

³⁰Jodwoko ni, “Di wakikelo go bongin bedi go k'otimo raco moro.”

³¹Pilato owaco ni, “Wiwegi kwany win go aka winen banja pere i kite ma cik mewin.” Joyuda jodwoko ni, “K'oyey wan neko dhano.”

³²(Me onyutho adieri gima Yesu onwaŋo otieko waco munyo go nyutho kiti tho ma go latho.)

³³Pilato ogik i cel to lwoŋo Yesu to penjo go ni, “In i Kere pa Joyuda?”

³⁴Yesu odwoko ni, “Penji me wok bongin iwon, kosa joman ama jowaco rin kwoŋan?”

³⁵Pilato odwoko ni, “Iparo nike a Jayuda? Kole ji perin wegi kodi jotel pa jocway ri Were i wi migam ama jokelin bongan. Itimo aŋo?”

³⁶Yesu owaco ni, “Ker paran k'obedo ma piny ka; bedi ker paran bedi ma piny ka, di joma luwan jolwenyo ma geŋan ma d'akipodho i cingi Joyuda. To, ker paran ki ma piny ka!”

³⁷Gikenyo Pilato openjo go ni, “Kere in ibedo kere?” Yesu odwoko ni, “Eno iwaco ni abedo kere. Kole onywolan ri gime aka abino i piny ka luwo ri adieri. Nyatoro je ma tiyere g'adieri winjo dwondan.”

³⁸Pilato openjo ni, “Aka adieri meno aŋo?” Gikenyo Pilato ogik woko bongi Joyuda to waco rijo ni, “Akinen banja moro kwoŋ go.

³⁹To paka winitie gi cik mewin, ndir je agonyo riwin jatwec moro i hongo ma kalima ma Kadho, wimito agony riwin Kere pa Joyuda?”

⁴⁰Jodwoko go gi koko ni, “Be, ki go! Wamito Baraba!” (Baraba oyido jakwo m'ojoko jo.)