Read dhopadhola Yohana 2 Bible Online

Yohana 2 - dhopadhola bible

Yohana 2

¹I ndelo mar'adek kalima ma nywomirok obedo i tindi ma Kana i Galili. Min Yesu oyido nikenyo

²aka Yesu kodi jofonjirok pere bende oyido olwoŋi jo i kalima no.

³Munyo vini je orumo, min Yesu owaco rigo ni, “Kole vini orumo rijo.”

⁴Yesu odwoko ni, “Dhakodwoŋ, raŋo ithuyan gi wac me? Kole ndir paran fodi k'otundo.”

⁵Gikenyo min Yesu owaco ri joma poko cemo gi gir'amadha ni, “Tim win gimoro je ma go owaci riwin.”

⁶Joyuda jonitie gi kite ma logo, riameno kenyo oyido nitie degi aucel ma telin, aka kisi acel nwaŋo dwoŋ ma romo ayigin aŋwen kosa aucel.

⁷Yesu owaco ri jotic ni, “Ere poŋ win pi i degi no.” Jopoŋo degi no gi pi kiri malo ni cut,

⁸to waco rijo ni, “Onyo twom win pi moro witer ri jadwoŋ ma telo kalima.” Jono jotero rigo pi no,

⁹to go bilo, aka onwaŋo ni oyido otieko lokere vini. Go k'oŋeyo kama vini no owok'iye to jotic ma jotwomo pi ama joŋeyo. Gikenyo go olwoŋo won kalima,

¹⁰to waco rigo ni, “Kole dhano je kutho pen poko vini maber tektek mere, aka ka wendo jotieko medho m'oromo aka nyaka poko vini ma ndir je. To in ikano vini maber tektek mere tundo pama!”

¹¹Yesu otimo gir'aura marapena me i Kana i Galili; kenyo go onyuth'iye dwoŋ pere, aka jofonjirok pere joyeyo go.

¹²Munyo gino orumo, Yesu kodi yokimere, gi wutmin kodi jofonjirok pere jokidho Kapernaum, to jobedo kenyo ndelo manok.

¹³Munyo ndir oyido orikere ma poyo kalima ma Kadho, Yesu okidho i Yerusalem.

¹⁴Go onwaŋo ji jotana gigipiny i Ot pa Were paka: Dhok, rombo, kodi akurin aka joma wilo pesa oyido jobedo dho meza pajo.

¹⁵Gikenyo go omino adasa to riemo woko le je i Ot pa Were, gi rombo kanyacel gi dhok; aka oywoyo woko pesa to ŋilo woko mezin pa jowili pesa;

¹⁶Ooro joma tana akurin ni, “Kwany win woko akurin no ka! Wikiri wiloki Ot pa Baba katale!”

¹⁷Gikenyo jofonjirok pere jopoyo gim'ondiki ni, “Maro Ot perin, a Were, waŋ i cunyan pa mac.”

¹⁸Rumacen Joyuda jodwoko bonge gi penji ni, “Gir'aura aŋo m'inyalo timo ma nyutho wan nike initie gi meni ma timo gime?”

¹⁹Yesu odwoko ni, “Kedhi win woko Ot pa Were me aka i hongo ma ndelo adek abino gero kendo.”

²⁰Jopenjo go ni, “Ot pa Were me m'otero wan oro piero aŋwen g'acel gipi gero, am'iwaco n'ibino gero i ndelo adek won kende?”

²¹To Ot pa Were ma Yesu oluwo kwoŋe oyido obedo delkwoŋe ayino.

²²Am'omiyo munyo go ocerino kwoŋ jom'otho, jofonjirok pere jopoyo nike go oyido waco gino ayin; gikenyo to joyeyo gim'ondiki kodi wac ma Yesu owaco.

²³Munyo go fodi ni Yerusalem i kalima ma Kadho, ji madit joyeyo nyingi go munyo joneno ranyuth m'otimo.

²⁴To Yesu k'onyuthere kamaler rijo kwoŋbedo go oyido oŋeyo dhano je.

²⁵Oyido ongoye kony nyatoro waco rigo gimoro kwoŋ jo rupiri go won oyido oŋeyo gima ni cuny jo.