Read dhopadhola Yohana 20 Bible Online

Yohana 20 - dhopadhola bible

Yohana 20

¹I Sabiti odikin worwor, mafodi piny riprip, Maria ma wok Magdala okidho kaliel to neno ni oŋil woko tele ma dhok kaliel.

²Go oringo to kidho bongi Simon Petero kodi jafonjirok man ma Yesu omaro, to waco rijo ni, “Jokwanyo woko Rwoth i kaliel aka wakuya kam'oketh'iye go!”

³Gikenyo Petero gi jafonjirok man no joay to jokidho i kaliel.

⁴Jario no oyido joringo, to jafonjirok man no odwire oyombo Petero to telo tundo i kaliel.

⁵Go oluŋere to neno sukin ama odoŋ, to k'odonjo i iye.

⁶Simon Petero oluwo go cen to donjo i kaliel, to neno sukin no kenyo,

⁷kodi nanga m'onwaŋo otwey gine wiy Yesu m'odole gicen kakende.

⁸Gikenyo, jafonjirok, m'otelo tundo i kaliel bende odonjo to neno to yeyo.

⁹(Jono fodi oyido jok'oniaŋ odoco kwoŋ randik ma waco ni go ripo cerino).

¹⁰Gikenyo jofonjirok no jodok peco pajo.

¹¹Maria ocungo munyo ywak dho thengi kaliel;

¹²gikenyo go oneno jomalaika ario kenyo, i nangin matar, ma jobedo piny kam'onwaŋo oketh'iye delkwoŋ Yesu, acel yuwiye, man yu tiende.

¹³Jopenjo go ni, “Dhakodwoŋ, iywaki aŋo?” Go odwoko ni, “Jokwanyo Rwoth paran, aka akuya kama joketh'iye go!”

¹⁴Munyo go otieko waco ameno, go owire to neno Yesu ocungo kenyo; to k'oŋeyo ni manago Yesu.

¹⁵Yesu openjo go ni, “Dhakodwoŋ, raŋo iywaki. Raŋo ŋa?” Paka dheno oparo ni meno won ndelo, owaco rigo ni, “K'iŋati ikwanyo go, jadwoŋ, waci ran kam'iketh'iye go akidhi aom go.”

¹⁶Yesu owaco rigo ni, “Maria!” Go owire yubonge to waco gi Dhohiburu ni, “Raboni!” (Dwoŋ mere ni Jafonji.)

¹⁷Yesu owaco rigo ni, “Ikir'imakan rupiri fodi akigiki bongi Baba. To kidhi bongi wutmera iwaci rijo ni akidho malo bongi Baba ma Bawin, Were paran ma Were mewin.”

¹⁸Gikenyo Maria Magadalina owaco ri jofonjirok pere ni, “Atieko neno Rwoth.” To liesa rijo gima Yesu owaco rigo je.

¹⁹Munyo piny oumere i ndelo ma Sabiti no, jofonjirok oyido jocokere kanyacel kareno jocego thigin, rupiri oyido jolworo Joyuda. Gikenyo Yesu obino to cungo i dier jo to waco ni, “Siem wobedi kodi win.”

²⁰Munyo go otieko waco ameno, onyutho jo cinge gi ŋete. Jofonjirok kisangala opoŋ i cuny jo munyo joneno Rwoth.

²¹Gikenyo Yesu odoko owaco rijo ni, “Siem wobedi kodi win. Paka Baba ooran abende aoro win.”

²²Go owaco gime to kudho jo gi luya to waco ni, “Limi win Cuny Maleŋ.

²³Reco pa ji ma winocwaki rijo, ibino cwako rijo; to reco pa ji ma wik'ocwaki rijo bende k'ocwaki rijo.”

²⁴Acel kwoŋ jofonjirok, Toma (m'ilwoŋo ni Rut) onwaŋo ongoye bongi jo munyo Yesu obino.

²⁵To jofonjirok wadi jowaci rigo ni, “Watieko neno Rwoth!” Toma owaco rijo ni, “K'akineno waŋpoyo ma musumal oweyo i cinge, t'arwako lwetan kama musumal odonj'iye i ŋete, ak'oyey.”

²⁶Munyo ndelo abirio okadho, jofonjirok oyido jonitie kanyacel kendo, aka Toma oyido nigi jo. Thigin je oyido ocegi, to Yesu obino to cungo i dier jo to waco rijo ni, “Siem wobedi gi win.”

²⁷Gikenyo go owaco ri Toma ni, “Rwaki lwetin ka, aka neni cingan; odoko keli cingin irwaki i ŋetan bende. Ikir'ibedi gi kiganagana, to bedi gi yeyo ayin!”

²⁸Toma odwoko ni, “Rwoth paran kendo Were paran!”

²⁹Yesu owaco rigo ni, “Onyo iyeyo rupiri itieko nenan? Josilwany a joma yeyo kada mafodi jok'onenan!”

³⁰Yesu otimo ranyuth man kweth ruwaŋ jofonjirok pere ma k'ondiki i kitawo me.

³¹To me ondiki aka ŋey wiyey ni Yesu obedo Kristo, Wod Were, aka ni yeyo gime winyal limo kwo makirum i nyingi go!