Read dhopadhola Yohana 3 Bible Online

Yohana 3 - dhopadhola bible

Yohana 3

¹Nitie nyatoro ma nyinge Nikodemo, jatel pa Joyuda, m'obedo Jafarisayo.

²Ŋato obino bongi Yesu Wor acel to waco rigo ni, “Jafonji, waŋeyo paka ibedo jafonji ma Were am'ooro. Ongoye ŋata nyalo timo gir'aura m'itimo kwanyo woko ka Were nitie gine.”

³Yesu odwoko ni, “Adieri awaco rin, ongoye ŋata nyalo neno Ker pa Were kwanyo woko k'onywole madirio.”

⁴Nikodemo openjo ni, “Nyalere nedi ŋat'otieko dwoŋ nywolirok kendo? Kole go kinyal donjo i iy min kendo ŋey wonywol go madirio!”

⁵Yesu odwoko ni, “Adieri awaco rin, ongoye ŋata nyalo donjo i Ker pa Were kwanyo woko ka olimo nywolirok ma pi kodi ma Cuny.

⁶Gima del onywolo bedo ma del, aka gima Cuny onywolo bende bedo ma cuny.

⁷Ikir'ibedi gi dhier ni awaco rin ni, ‘Iripo nywolirok madirio!’

⁸Kole koyo kudho yuthenge m'omito je; wiwinjo derino mere, to wikiŋey kam'owok'iye kosa kama com'iye.” Meno bende apaka ŋat'onywol ma cuny cale.

⁹To Nikodemo omedo openjo ni, “Gime nyalere nedi?”

¹⁰Yesu odwoko ni, “In i jafonji madwoŋ ma Isiraili gipi, am'ikuya gime?

¹¹Adieri awaco rin, waluwo gima waŋeyo, aka wawaco gima watieko neno to ongoye moro kwoŋ win ma yeyo jolo mikwenda mawan.

¹²K'inen wikiyey k'awaco riwin gigipiny ma piny ka; onyo winonyali nedi yeyo k'awaco riwin gigipiny ma polo?

¹³Aka ongoye moro m'otieko kidho i polo kwanyo woko Wod Dhano m'obino i piny wok i polo.”

¹⁴“Aka paka Musa oŋawo thwol ma nyweny wi yath moro i thim, apaka bende ibino ŋawo Wod Dhano malo.

¹⁵Ameno nyaka dhano je ma yeyo go bino bedo gi kwo makirum.

¹⁶Kole Were omaro piny tektek to miyo Wode acel g'acel, ni nyatoro je ma yeyo go wokiri wotho to wobedi gi kwo makirum.

¹⁷Ato Were k'ooro Wode i piny ka nike wothum ri piny banja, to ni piny wonyali limo both kwoŋ go ayino.

¹⁸Ongoye moro je ma yeyo Wod Were m'ibino thumo rigo banja, to moro je ma kiyey ama otiek thumo rigo banja ni oloyo go con kwoŋbedo k'oketho yeyo i nyingi Wod Were acel kende.

¹⁹Me apaka thumo banja bedo: Lero obino i piny to ji jomaro mudho ayino kapa lero, rupiri jotimo gigipiny mareco.

²⁰Aka moro je ma timo gigipiny mareco meno odak lero aka kibin kama dilero, rupiri kimiti ni tim pere mareco wonyuthere kamaler.

²¹To ŋata timo gim'otire bino kama dilero, ŋey lero wonyuthi nike go otimo tic pere munyo winjo Were.”

²²Rumacen Yesu kodi jofonjirok pere jokidho iy'adec ma Yuda to cowo kenyo hongo moro gi jo munyo batisa ji.

²³Yohana oyido bende batisa ji i Ayenon, cegin gi Salim, rupiri pi oyido nitie kenyo kweth. Ji oyido jokidho bonge hongo je wobatisa jo.

²⁴(Gime otimere mafodi k'otwey Yohana.)

²⁵Jofonjirok pa Yohana megi jocako piem kodi Jayuda moro kwoŋ lonyo manyadini.

²⁶Gikenyo jobino bongi Yohana to jowaco rigo ni, “Jafonji, dhano m'oyido nitie kodin loka meca ma Yordan m'iluwo kwoŋe, pama batisa ji aka dhano je onyo kidho bonge!”

²⁷Yohana odwoko ni, “Ongoye dhano manyalo bedo gi gimoro kwanyo woko ka Were am'omiyo go.

²⁸Wiwegi wibedo jokony paran, ni awaco ni, aŋat'akibedo Kristo, to ooran telo yuwiye ayin.”

²⁹“Jamweha ama mweha bedo apere; jakony pa jamweha cungo ruŋete to ciko ithe wowinji gima timere, aka go sangala swa k'owinjo dwondi jamweha. Meno bende apaka kisangala paran onyo oromo.

³⁰Go ripo medo ŋeyirok kareno ŋeyirok paran mojere woko.”

³¹Ŋata wok malo i polo ama loyo ji je; ŋata wok i piny ka meno dhano ma piny ka, aka luwo kwoŋ gigipiny ma piny ka. To ŋata wok i polo loyo ji je.

³²Go luwo kwoŋ gima go otieko neno gi winjo, to ongoye ŋata jolo mikwenda pere.

³³To ŋat'otieko jolo mikwenda pere otieko niaŋo ji gi ranen nike Were obedo jar'adieri.

³⁴Ŋata Were ooro, luwo wac pa Were, rupiri Were miyo go Cuny Maleŋ m'opoŋ ma k'obuyo.

³⁵Were Baba omaro Wode aka oketho gimoro je i cingi go.

³⁶Ŋata yeyo Wode nitie gi kwo makirum; ŋata kiwinji Wode k'olimi kwo, to keme pa Were ama bino tundo rigo.