Read dhopadhola Yohana 4 Bible Online

Yohana 4 - dhopadhola bible

Yohana 4

¹Munyo Yesu oniaŋ nike Jofarisayo jotieko winjo ni go onyo ywayo ji bonge aka miyo ji batisimo loyo Yohana,

²(iy'adieri, Yesu k'obatisa nyatoro, to jofonjirok pere am'oyido jotimo ameno.)

⁵Go obino i tindi ma Samaria m'ilwoŋo ni Sika, m'oyido cegin gi ndelo ma Yakobo cango omiyo Yozefu, wode.

⁶Waŋ pi pa Yakobo oyido nikenyo, aka Yesu munyo ool gi woth, obedo piny dho waŋ pi no oyido obedo odieceŋ kapa sawa aucel.

⁷Dhasamaria moro obino kulo, to Yesu waco rigo ni, “Miyan ye pi amadhi.”

⁸(Jofonjirok pere onwaŋo fodi jokidho i tindi nyewo cemo.)

⁹Dhasamaria no odwoko ni, “Kole in i Jayuda aka an a Jasamaria; inyalo nedi kwayan pi amadha?” (Ato Joyuda oyido jokitiyere gi Josamaria kosa jokiori atewe pa Josamaria kendo jokimadhi pi g'agwatin ma Josamaria jomadh'iye pi.)

¹⁰Yesu odwoko ni, “Bedi iŋey mic pa Were kodi ŋata kwayin pi amadha, d'ikwayo go aka d'omiyin pi ma kwo.”

¹¹Dhako no owaco ni, “Jadwoŋ kole ingoye kodi gitwomo pi aka waŋ pi luth. Inonwaŋ kune pi ma kwo m'iwaco no?

¹²Iparo ni idwoŋ loyo kwari wan Yakobo m'omiyo wan waŋ pi me; aka go kodi wote, kodi mwendi pere jomadho pi me?”

¹³Ana Yesu ni, “Moro je ma madho pi me bino winjo riyo kendo;

¹⁴to ŋat'omadhi pi m'abino miyo go odoko kilawinjo riyo kendo. Aka pi m'anomiy go bino lokere i go waŋ pi ma mol to miyo go kwo makirum.”

¹⁵Ana dheno ni, “Jadwoŋ, miyan pi no aka ŋey akiri doko awinji riyo kosa adwoki ka kendo kulo.”

¹⁶Yesu owaco rigo ni, “Kidhi ilwoŋ cworin idwoki gine ka”

¹⁷Dheno odwoko ni, “Angoye gi cworan.” Ana Yesu ni, “Itire waco ni ingoye gi cworin,

¹⁸rupiri itieko nywomirok gi cwo abic, aka ŋata pama ibedo gine no bende k'obedo cworin. Iwaco gir'adieri.”

¹⁹Dhako no owaco ni, “Jadwoŋ, onyo aniaŋ ni kere i jatuci wac Were.

²⁰Kole kwarere mawan yado jolamo Were wi got me, to win wi Joyuda wiwaco ni Yerusalem a kama waripo lam'iye Were.”

²¹Yesu odwoko go ni, “Dhako me, yey gim'awaco rin; hongo bino tundo ma ji jok'olam Baba wi got me kosa kada i Yerusalem.

²²Win Josamaria wilamo gima wikuya; to wan Joyuda waŋeyo gima walamo, kwoŋbedo both wok bongi Joyuda.

²³To hongo bino, aka ee otieko kiri tundo, ma joma lamo Baba i yo m'otire, jobino lamo go i Cuny kodi iy'adieri, rupiri Baba yenyo joma lamo go ameno.

²⁴Were obedo Cuny aka joma lama go joripo lamo go i cuny kodi iy'adieri.”

²⁵Dhako no owaco rigo ni, “Aŋeyo ni Mesiya (m'ilwoŋo ni Kristo), labino, aka k'obino lawaco riwan kisi gimoro.”

²⁶Yesu odwoko go ni, “An won ago, an m'aluwo kodin me.”

²⁷I hongo no won to jofonjirok pa Yesu jodwoko, to jodhier swa munyo jonwaŋo go luwo kodi dhako. To ongoye kwoŋ jo ŋat'openjo go kada ni, “Imito aŋo?” Odoko ni, “Raŋo m'iluwo gi dheno?”

²⁸Gikenyo dhako no oweyo dak pi pere, ogik i tindi, to waco ri ji ma kenyo ni,

²⁹“Biye neni win dhano m'owaco ran gimoro je m'atieko timo, kosa go a Kristo?”

³⁰Gikenyo ji joay i tindi to jokidho bongi Yesu.

³¹I hongo no jofonjirok oyido jokwayo Yesu nike, “Jafonji, cemi ye!”

³²To odwoko jo ni, “Anitie gi cemo acama ma wikuya.”

³³Gikenyo jofonjirok pere wegi jocako penjirok kendi gin ni, “Yagi, kosa moro nende okelo rigo cemo?”

³⁴Yesu owaco rijo ni, “Cemo paran obedo timo gima ŋat'ooran yenyo gi cowo tic pere.”

³⁵“Wingoye gi ageca ma wimaro luwo ni, ‘Odoŋ dwe aŋwen to keco tundo?’ Awaco riwin, kaŋasa win ndelin maber: Gim'ocwoy pama otieko cek aka otundo akeca.

³⁶Ŋata keco limo kemba, aka ameno go coko gim'onyak ri kwo makirum, ŋey jacwoyo kodi jakeco je jowosangala kanyacel.

³⁷Kole ageca me ripo ni, ‘Ŋat'acel cwoyo aka ŋatiman keco.’

³⁸Adhiro win keco gima wikicwoyo; joman ama jonekere gi tic mere, aka onyo widonjo limo bero ma wok i kwok pajo.”

³⁹Josamaria mathoth ma tindi no joyeyo Yesu rupiri dhako no owaco rijo ni, “Go owaco ran gimoro je m'atieko timo.”

⁴⁰Gikenyo Josamaria jobino bonge to jokwayo go nike wobedi gi jo, to Yesu bedo kenyo ndelo ario.

⁴¹Ji mathoth man joyeyo go ro fonji pere,

⁴²aka jowaco ri dhako no ni, “Pama onyo wayeyo go, ki kwoŋbedo gim'iwaco, to rupiri wawegi watieko winjo go, aka onyo waŋeyo adieri ni go a Jaboth pa piny.”

⁴³Munyo ndelo ario no orumo, Yesu oeye kenyo to kidho Galili,

⁴⁴kada nende go won onwaŋo otieko waco ni, “Jatuci wac Were kimiy go dwoŋ i piny pere won.”

⁴⁵To munyo go otundo Galili, ji jojolo go, rupiri jo wegi ndir ca jokidho Yerusalem i ndelo madwoŋ ma kalima ma Kadho to joneno gimoro je ma go otimo i kalima no.

⁴⁶Gikenyo Yesu ogik i Kana ma Galili, kama go ndir ca olok'iye pi vini. Kenyo onwaŋo nitie jadwoŋ moro ma wode oyido two yu Kapernaum.

⁴⁷Munyo jalo owinjo ni Yesu obino Galili wok Yuda, okidho bonge to kwayo go nike wokidhi Kapernaum wobothi rigo wode m'onwaŋo cegin tho.

⁴⁸Yesu owaco rigo ni, “Ato ka wikineno ranyuth madongo wik'oyey!”

⁴⁹Jadwoŋ ma Jaroma no odwoko ni, “Jadwoŋ, bowe wakadhi kafodi nyathi paran k'otho.”

⁵⁰Yesu owaco rigo ni, “Kadhi, wodin bino kwo!” Jalo oyeyo gima Yesu owaco rigo to kadho.

⁵¹Munyo fodi ni royo kadho, jotic pere joromo gine to jowaco rigo ni wode kwo.

⁵²Go openjo jo ni two oweyo go keraŋo, to jowaco ni, “Nyoro odieceŋ kapa sawa abirio ama two no owey'iye go.”

⁵³Gikenyo bamere opoyo ni i hongo no won ama Yesu owac'iye rigo ni, “Wodin bino kwo.” Riameno go kodi peco pere gipi joyeyo.

⁵⁴Me obedo gir'aura mar'ario ma Yesu otimo munyo otieko wok Yuda okidho Galili.