Read dhopadhola Yohana 5 Bible Online

Yohana 5 - dhopadhola bible

Yohana 5

¹Rumacen, kalima pa Joyuda manyadini obedo to Yesu kidho Yerusalem.

²I Yerusalem, dho waŋkac m'ilwoŋo ni Ma Rombo, ma i Dhohiburu ilwoŋo ni Bethzatha, nitie dago moro man gi kadonjo abic.

³Aka kidhur ji ma two oyido jonitie dho kadonjo no je. Joma waŋ gin otho, jom'oŋol, kodi joma two nyaŋinya. [Jono onwaŋo jokuro pi woicere;

⁴rupiri dicel dicel malaika pa Rwoth oyido bin loro piny i dago no to ico pi. Aka jatwo m'open donjo i dago no ka otiek ico pi, ama two pere ma nger je both woko].

⁵Kenyo onwaŋo nitie nyatoro m'onwaŋo otieko two oro piero adek g'aboro.

⁶Munyo Yesu oneno go opiele piny kenyo, to ŋeyo nike ŋato oyido otieko two hongo malac; ameno openjo go ni, “Imito bedo maber?”

⁷Jatwo no odwoko ni, “Jadwoŋ, angoye gimoro manyalo kethan i dago ka pi oicere; ka nyaka ni atem donjo i pi, ŋatiman ama telo donjo ran.”

⁸Yesu owaco rigo ni, “Ay malo, kwany par perin, iwothi.”

⁹Piyo piyo no, ŋato obedo maber, okwanyo par pere, to wotho kadho. Ndelo no oyido obedo Sabato pa Joyuda,

¹⁰am'omiyo jowaco ri ŋat'owok both no ni, “Kole konon Sabato, aka Cik kiyeyin tiŋo par perin.”

¹¹Go odwoko ni, “Ŋat'obothan owaco ni, tiŋi par perin iwothi.”

¹²Aka jopenjo go ni, “Manago ŋa no m'owaco rin ni itiŋ par perin iwothi?”

¹³To jalo k'oŋeyo ŋata go, rupiri Yesu oyido otieko rwenyo i dier ji mathoth m'oyido jonitie kenyo.

¹⁴Rumacen, Yesu onwaŋo go i Ot pa Were to waco rigo ni, “Neni, pama onyo itieko bedo maber! Onyo ikiri doko igiki timo reco, kosa giman nyalo timin marac maloyo meno.”

¹⁵Gikenyo ŋato okadho to waco ri Joyuda ni Yesu ama obotho go.

¹⁶Ro wac me, Joyuda jocako lweny gi Yesu, rupiri omaro timo gima pameno i Sabato.

¹⁷To Yesu odwoko jo ni, “Kole Baba tiyo noknok, aka abende onyo atiyo.”

¹⁸Wac me omiyo Joyuda jomedo ridho paro ma neko go; rupiri go oyido k'oturo nyaka cik ma Sabato kende, to oyido waco bende ni Were meno Bamere won, aka ameno go won kethere i kabedo marom g'apa Were.

¹⁹Gikenyo Yesu odwoko ni, “Adieri awaco riwin, Wod Were kitim gimoro gi meni pere won; to go timo gim'oneno Bamere timo. Gima Bamere timo ama Wode bende timo.

²⁰Kole Were Baba omaro Wode aka nyutho go gimoro je ma go won timo. Go bino nyutho Wode kiri gigipiny maloyo me, aka wibino uro

²¹rupiri paka Bamere cerino jom'otho aka miyo jo kwo, apaka Wode bende miyo joma go oyenyo kwo.

²²Baba won kithum banja ri nyatoro, to omiyo Wode meni je ma thumo banja

²³aka ŋey dhano je wowori Wod Were paka joworo Bamere. Ŋata kiwor Wod Were meno bende kiwor Bamere m'ooro go.”

²⁴“Adieri awaco riwin, nyatoro je ma winjo wac paran, to yeyo ŋat'ooran, nitie gi kwo makirum. Aka k'othumi rigo banja rupiri go otieko wok i tho odonjo i kwo.

²⁵Adieri awaco riwin, ndir bino tundo aka otieko kiri tundo ma jom'otho jobino winj'iye dwondi Wod Were, aka dhano je ma winjo dwonde bino kwo.

²⁶Ato paka Baba nigi kwo kwoŋe, apaka otieko miyo Wode bende bedo gi kwo kwoŋe.

²⁷Aka go otieko miyo Wode meni ma thumo banja, rupiri go obedo Wod Dhano.

²⁸Wikiri widhier kwoŋ gime; kole ndir bino ma jom'otho je ma jonitie i kaliel jobino winj'iye dwonde,

²⁹aka jobino wok kenyo: Joma timo gima beyo jobino cerino to jokwo, aka joma timo reco ibino cerino jo to ithumo banja loyo jo.”

³⁰“Akinyali timo gimoro awon kendan; athumo banja paka Were waco ran, am'omiyo thumo banja paran otire, rupiri akitem timo gim'awon amito, to gima ŋat'ooran ama mito.

³¹Bedi awon aluwo gima mako kwoŋan, d'onyo wac paran kibedi m'otire;

³²to nitie ŋatiman ma cungo aka luwo kaparan, aka aŋeyo nike gima go waco kwoŋan otire.”

³³“Wioro jomikwenda bongi Yohana aka kole go otieko luwo ma ridho adieri no.

³⁴K'obedo nike a thenere kwoŋ wac pa dhano, t'awaco ama aka ŋey wilimi both ayin.

³⁵Yohana oyido obedo paka tala maliel ka miyo lero, aka wiyeyo kiri kisangala i lero pere nyaka hongo macek.

³⁶To wac ma an awodh'iye kony dwoŋ loyo kiri ma Yohana omiyo: Ato tic ma an atimo obedo ma Baba am'omiyan timo, aka tic no nyutho kamaler ni Baba ama ooran.

³⁷Aka Baba m'ooran, bende otieko luwo kwoŋan. Fodi wikiwinjo dwonde, odoko fodi wikineno cal pere,

³⁸aka wingoye gi wac pere i win; rupiri wikiyeyo ŋata go ooro.

³⁹Wifonjere Ndiko Maleŋ rupiri wiparo ni wibino nwaŋ'iye kwo makirum; aka kole Ndiko no ama luwo kwoŋan!

⁴⁰To je fodi wikiyey bino bongan limo kwo.”

⁴¹“Akiyeny pak pa ji,

⁴²to aŋeyo win maber, nike wingoye kodi mar pa Were i cuny win.

⁴³E abino i meni pa Baba to wikijolan; to ka moro obin gi meni pere won, ama wibino jolo.

⁴⁴Onyo winyalo yeyo nedi ka wimito pak ma wok bongi wiwegi, aka wikitem limo pak ma wok bongi Were won.

⁴⁵Wikiri wipar nike abino kiosa win bongi Baba. Musa ma wigeno kwoŋe no won ama bino kelo kwoŋ win wac.

⁴⁶Bedi wiyeyo Musa, d'onyo wiyeyan bende, rupiri go ondiko gima mako kwoŋan.

⁴⁷To ka wikiyey gima go ondiko, winonyali nedi yeyo gim'awaco?”