Read dhopadhola Yohana 8 Bible Online

Yohana 8 - dhopadhola bible

Yohana 8

²Yawere mere odikin, aka go ogik i Ot pa Were. Lwak ji gibe ocokere othoko go, to go bedo piny to cako fonjo jo.

³Gikenyo jondiko kodi Jofarisayo jokelo dhako m'omak munyo timo cot, to joketho go wocungi ruwaŋ ji je.

⁴Aka jowaco ri Yesu ni, “Jafonji, dhako me owok nwaŋo munyo timo cot won.

⁵Kole i Cik mawan Musa owodho or ni dhako ma pameno ripo wogoyi gi telin wotho. Onyo pama, iwaco aŋo?”

⁶Jowaco ama ma ciko go, ŋey jowokethi kwoŋe banja. To Yesu luŋere piny to ndiko i lowo gi lwete.

⁷Munyo jocungo kenyo aka oyido fodi jomedere gi penji pajo, Yesu oay malo to waco rijo ni, “Ere nyatoro moro je kwoŋ win ma fodi k'otimo gimarac ama wopen bolo tele kwoŋe.”

⁸Gikenyo go oluŋere piny kendo to ndiko i lowo.

⁹Munyo jowinjo gino joje jocako kwalok, acel acele, cako kwoŋ jomadongo. Joweyo Yesu kenyo kende, gi dhako no munyo ocungo kenyo.

¹⁰Go otiŋo waŋe malo to waco ri dheno ni, “Dhakodwoŋ, nikune jo? Ongoye ŋata thumo rin banja be?”

¹¹Go odwoko ni, “Ongoye, jadwoŋ.” Yesu odwoko ni, “Onyo abende ak'othum rin banja. Onyo kadhi rin, to ikiri doko itimi reco.”]

¹²Yesu odoko oluwo gi jo ni, “Abedo lero ma piny; ŋata luwan bino bedo gi lero ma kelo kwo aka k'owothi i mudho.”

¹³Jofarisayo jowaco rigo ni, “Kole onyo eno iluwo yuthenge perin iwon; kere gim'iwaco onyo k'obedo adieri.”

¹⁴Yesu odwoko ni, “Be, kad'awon aluwi yuthenge paran je fodi gim'awaco otire, rupiri aŋeyo kam'awok'iye kodi kam'akidh'iye.

¹⁵Withumo ri ji banja gi rieko ma nyadhano; to an akithum ri nyatoro banja.

¹⁶To kada bedi athum banja ri nyatoro, je di thumo paran obedo mar'adieri, rupiri akinitie kendan i gime; Baba m'ooran nitie kodan.

¹⁷Ondiki i Cik mewin ni ka jokony ario joyere i wac moro, gima jowaco bedo adieri.

¹⁸Aridho adieri ma mako kwoŋan won, aka Baba m'ooran bende ridho adieri ma mako kwoŋan.”

¹⁹Jopenjo go ni, “Benin nikune?” Yesu odwoko ni, “Wikuya an kosa Baba. Bedi wiŋeyan di wiŋeyo kiri Baba bende.”

²⁰Yesu owaco gime je munyo fonjo i Ot pa Were, dho tielo kam'ikan'iye lim. Aka ongoye ŋat'omako go rupiri ndir pere oyido fodi k'otundo.

²¹Yesu owaco rijo kendo ni, “Abino kadho ran; aka wibino rangan, to wilatho i reco mewin. Kam'akidh'iye wikinyal tundo.”

²²To Joyuda jowaco ni, “Ka go waco ni wakinyali kidho kama go kidh'iye, dwoŋ mere nike go ladere wotho?”

²³Yesu odwoko ni, “Win wicakere i piny, to an awok malo. Win ji ma piny ka, to an a ki dhano ma piny ka.

²⁴Am'omiyo awaco riwin nike wibino tho i reco mewin. Aka wibino tho i reco mewin rupiri wikiyey nike, ‘An ago ma atuco riwin.’ ”

²⁵Gikenyo jopenjo ni, “In a ŋa?” Ana Yesu ni, “Gim'atieko waco riwin wok con.

²⁶Gigipiny dit m'aripo waco riwin odoko wac thoth m'aripo kelo kwoŋ win. To ŋat'ooran, obedo jar'adieri, aka awaco ri piny gim'awinjo wok bonge.”

²⁷Jok'onyalo niaŋ nike go oyido luwo rijo kwoŋ Bamere.

²⁸Gikenyo Yesu owaco rijo ni, “Ka witieko ŋawo malo Wod Dhano nyaka wibino ŋeyo ni, ‘An ago.’ Wibino ŋeyo nike akitim gimoro gi wi tungan, t'awaco gima Baba ama ofonjan.

²⁹Aka ŋat'ooran nikodan, k'oweyan kendan, rupiri ndir je atimo gima sangala go.”

³⁰Jomathoth ma jowinjo Yesu munyo waco gigipiny me joyeyo go.

³¹Gikenyo Yesu owaco ri Joyuda ma joyeyo go ni, “Ka wiwinjo fonji paran to wicwir'iye meno wijofonjirok paran adieri;

³²wibino ŋeyo adieri, aka adieri no bino miyo wibedo i siem.”

³³Jodwoko ni, “Kole wabedo nyikway Abraham, kendo fodi wakibedo ŋecin pa nyatoro, odoko iwaco nedi n'ibino loko wan joma ni siem?”

³⁴Yesu owaco rijo ni, “Adieri awaco riwin, moro je ma timo gimarac meno ŋeca pa gimarac.

³⁵Ndiri je ŋeca kibedi japeco; to nyathi anywola ama ndir je bedo japeco.

³⁶Ka Wod Were omiyo win siem, wibino bedo joma ni siem adieri.

³⁷Aŋeyo nike wibedo nyikway Abraham. To kad'ameno je fodi wirango nekan, rupiri wikiyey jolo fonji paran.

³⁸Aluwo kwoŋ gima Baba onyuthan, to win witimo gima bawin owaco riwin.”

³⁹Gikenyo jodwoko go ni, “Bawan obedo Abraham.” Yesu odwoko ni, “Bedi adieri winyithindho pa Abraham, di witimo gima cango go otimo.

⁴⁰To an ma awaco riwin adieri ma awinjo bongi Were, ama je fodi wimito nekan. Kole Abraham k'otimo gima cale ameno!

⁴¹Adieri witimo gima bawin otimo.” Jodwoko ni, “Wakibedo nyithindho madudi. Wanitie gi Bawan acel kende, Were won gipi.”

⁴²Yesu owaco rijo ni, “Bedi Were a Bawin adieri, di wimaran, rupiri awok bongi Were aka onyo an ka. Akibino gi wi tungan, to go ama ooran.

⁴³To raŋo ma wikiniaŋ gim'awaco? Obedo rupiri wikimiti winjo fonji paran.

⁴⁴Wibedo nyithindho pa bawin, jwogi, aka wimito timo gima bawin no yenyo. Wok con go oyido janek, fodi go k'obedo yuthenge mar'adieri, rupiri adieri ongoye i go. Ka go twodo meno go timo gikula pere won, rupiri go jatwodo aka go a ba jotwodo je.

⁴⁵To rupiri awaco riwin gir'adieri am'omiyo wikiyeyan.

⁴⁶Ŋa kwoŋ win manyalo nyutho ni atimo gimarac? To k'inen awaco gir'adieri raŋo ma wikiyeyan?

⁴⁷Ŋata wok bongi Were winjo wac pa Were. Gim'omiyo wikiyey winjo wac paran, obedo rupiri wikibedo apa Were.”

⁴⁸Joyuda jopenjo Yesu ni, “Kere wakitire munyo wawaco nike in i Jasamaria aka jwogi ni kwoŋin?”

⁴⁹Yesu odwoko ni, “Angoye gi jwogi moro je, aworo Baba, to win wikiworan.

⁵⁰Akirangi dwoŋ paran awon, to nitie Ŋata rango aka ama bino bedo jathum banja.

⁵¹Adieri awaco riwin, ni ŋata winjo fonji paran kilatho.”

⁵²Joyuda jowaco rigo ni, “Pama onyo nyaka waŋeyo odoco nike initie gi jwogi. Abraham kodi jotuci wac Were jotho, aka odoko iwaco ni, ŋata winjo fonji perin kilatho.

⁵³Onyo iwaco nike idwoŋ loyo Abraham Bawan m'otieko tho. Aka jotuci wac Were bende jotho. Iparo nike in iŋa?”

⁵⁴Yesu odwoko ni, “Bedi awon amiyere dwoŋ, dwoŋ paran dinyo ongoye gimoro. Ŋata miyan dwoŋ manago Baba, ma wilwoŋo ni Were mewin.

⁵⁵Kole fodi wikiŋeyo kiri go, to an aŋeyo go aka awinjo wac pere. Bedi awaci ni akuya go, d'abedo jatwodo paka win. T'aŋeyo go aka awinjo wac pere.

⁵⁶Bawin Abraham osangala nike oyido laneno ndelo paran; oneno aka osangala.”

⁵⁷Joyuda jowaco rigo ni, “K'inen fodi ikirom kada oro piero abic, am'iwaco ni itieko neno Abraham?”

⁵⁸Yesu odwoko ni, “Adieri awaco riwin, mafodi k'onywol Abraham oyido anitie.”

⁵⁹Ro meno jodimo telin ma goyo gine go to go opondo to eye i Ot pa Were.