Read dhopadhola Tim pa Jomoor 1 Bible Online

Tim pa Jomoor 1 - dhopadhola bible

Tim pa Jomoor 1

¹Mondo Thiofilo, i kitawo marapena m'andiko, aluwo kwoŋ gimoro je ma Yesu otimo kendo ofonjo,

²cuka ndelo m'oter'iye go i polo. Aka gi meni pa Cuny Maleŋ, omiyo jomoor pere ma go oyero or.

³Go onyutho jo i yo madit paka go onyo kwo, munyo otieko candirok to tho; aka i hongo ma ndelo piero aŋwen gipi obedo munyo menyere rijo aka luwo rijo kwoŋ Ker pa Were;

⁴aka go omiyo jo or munyo nitie dhower gi jo ni, “Wikiri wieye Yerusalem; to kuri win gikenyo mic ma Were Baba ociko ma witieko winjo.

⁵Ato batisimo pa Yohana obedo gi pi, to wibino limo batisimo gi Cuny Maleŋ mafodi ndelo k'okadho mathoth.”

⁶Aka jom'oyido jobino kenyo jopenjo go ni; “Rwoth, imito dwoko dhum i cingi Isiraili pama?”

⁷Yesu owaco rijo ni, k'obedo tic mewin ŋeyo ndir kodi hongo ma Baba won oyiko gi meni pere;

⁸to wibino nwaŋo meni ka Cuny Maleŋ otieko loro kwoŋ win; aka wibino bedo jokony ma ridho wac paran i Yerusalem kodi i Yuda gipi, i Samaria, kodi i witum je ma piny.

⁹Munyo otieko waco ameno, joneno paka otiŋ go t'itero malo, cuka pondeponde oumo go ma jokinen.

¹⁰Aka munyo fodi joyaro waŋ gin malo munyo joneno paka go kadho, piyo piyo j'ario ma joruko nangin matar jocungo kabuti jo.

¹¹Jopenjo ni, “Win ji ma Galili, raŋo ma wicungo wiŋiyo polo? Kole Yesu me, ma okwany bongi win t'itero i polo, bino dwoko i piny ka i kite no won, paka wiwok neno go munyo kadho i polo.”

¹²Gikenyo jomoor jogik Yerusalem munyo jowok wi got Oliv, ma romo cegin adec mayiro wok i tindi.

¹³Jodonjo Yerusalem aka joidho malo i ot m'onwaŋo jobed'iye; Petero, Yohana, Yakobo kodi Andereya, Filipo gi Toma, Batholomayo kodi Matayo, Yakobo wod pa Alfayo, Simon ma jalweny ri piny pere, kodi Yuda wod pa Yakobo.

¹⁴Joje jocokere kanyacel i bwora to jokwayo adhik, kanyacel gi mon, kodi Maria min Yesu, kodi wutmin Yesu.

¹⁵Munyo ndelo okadho manok, romo pa jom'oyeyo obedo (ma romo ji cegin miya acel), to Petero cungo to luwo.

¹⁶Owaco ni, “Wutmera, ndiko oyido ripo wotundi i kare kwoŋ gima Cuny Maleŋ, munyo luwo gi dhok Daudi, owaco con kwoŋ Yuda m'otelo ji munyo jobino mako Yesu.

¹⁷Yuda oyido jakweth mawan, rupiri oyido oyer go bende i tic mawan.”

¹⁸ (Pesa ma Yuda olimo i tim pere marac no onyewo gine ndelo, kama go ogor'iye piny to tho; aka okedhere to gir iye dhure piny.

¹⁹Ji je ma jobedo Yerusalem jowinjo gino, aka i dhodhok pajo wegi jolwoŋo ndelo no ni Akeldama, dwoŋ mere ni, “Ndelo ma Remo.”)

²⁰ Kole ondiki i Zabuli ni, “Weyi ot pere wodoŋ nono, aka moro wokiri wobed'iye.” Kendo ni, “Weyi ŋatiman woter kabedo pere.”

²¹ Am'omiyo acel kwoŋ cwo ma jowotho gi wan i hongo no je munyo Rwoth Yesu oyido fodi nigi wan noknok,

²²wok i ndir ma Yohana oyido miyo batisimo tundo ceŋ m'okwany'iye go bongi wan t'itero go malo, ama ripo bedo jakony m'oneno gi wan cerino pere.

²³Gikenyo to joketho j'ario ruwaŋ jo: Yozefu m'ilwoŋo ni Barsaba, m'ocwok nyinge ni Yusito, kodi Matias.

²⁴Aka jokwayo Were munyo jowaco ni, “Rwoth, iŋeyo cuny dhano je, nyuthi wan acel kwoŋ jario me, ŋat'iyero

²⁵ni woter tic paka acel kwoŋ jomoor, i kabedo ma Yuda oweyo to kidho kapere.”

²⁶To jobolo rijo kwir, to Matias loyo; t'iketho go i kitipa pa jomoor apar g'acel.