Read dhopadhola Tim pa Jomoor 10 Bible Online

Tim pa Jomoor 10 - dhopadhola bible

Tim pa Jomoor 10

¹Onwaŋo nitie dhano i Kasareya m'ilwoŋo ni Kornelio, jasirikale madwoŋ i lwak jolweny ma Roma m'ilwoŋo ni kitipa pa Joitalia.

²Go oyido obedo jadin matek gi ot pere gibe aka jolworo Were. Go oyido miyo kony madit ri jocandi, aka onwaŋo kwayo Were noknok.

³Dho kapa sawa abuŋwen odieceŋ moro, go oneno cal m'omenyere rigo, m'onen'iye malaika pa Were munyo donjo to lwoŋo go ni, “Kornelio!”

⁴Go omoro waŋe kwoŋ malaika gi lworo aka owaco ni, “Aŋo jadwoŋ?” Ana malaika: “Were ojolo kwayo perin gi tic perin ma konyo ji, aka onyo opoyin.

⁵Onyo or jomoro i Yopa jowolwoŋ Simon ma nyinge man Petero.

⁶Go obedo wendo pa Simon ma jajwayi piendere ma bedo dho thengi wakawaka.”

⁷Gikenyo malaika m'onwaŋo luwo gine okadho, aka Kornelio olwoŋo jotic ma ot pere jario kodi jasirikale, ma bende jadin matek m'onwaŋo obedo acel kwoŋ jokur pere.

⁸Owaco rijo gim'otimere je to oro jo Yopa.

⁹Yawere mere kapa sawa aucel m'odieceŋ, munyo jonitie i woth pajo aka onwaŋo joriko Yopa, Petero oidho wi ot kwayo.

¹⁰Gikenyo go ocako winjo kec to mito gir'acama; aka munyo fodi itedo cemo, ocako nur to neno cal m'omenyere rigo.

¹¹Oneno polo oyawere aka gimoro oloro m'ocalo suka malac m'ocar piny gi sonda mere aŋwen pa kidho umo piny.

¹²I suka no onwaŋo nitie le ma piny ma kite je, gigipiny ma mol gi kor gin piny kodi winyin ma malo.

¹³Dwondi jo moro owaco rigo ni; “Ay malo, Petero, ineki icami!”

¹⁴To Petero owaco ni, “K'ameno, Rwoth! Fodi yado akicamo gimoro je m'itero paka gima kicar, kosa ma k'olony.”

¹⁵Dwondi jo no odoko oluwo gine ni, “Gima Were otieko lonyo, ikir'ilwoŋo ni gima kicar.”

¹⁶Gime otimere didek to idwoko gino i polo.

¹⁷Munyo Petero fodi uro dwoŋ cal ma go oneno no, ji ma Kornelio ooro rango kama ot pa Simon nitie iye jotundo kenyo to jocungo dho waŋkac.

¹⁸Jolwoŋo gi dwondi jo ma malo to jopenjo ni, “Nitie wendo moro ka ma nyinge Simon Petero?”

¹⁹Petero oyido fodi temo niaŋ i dwoŋ cal ma go oneno no to Cuny Maleŋ waco rigo ni, “Kole nitie ji adek ka ma jorangin.

²⁰Am'omiyo yikere ilor, aka ikir'imindaminda m'ikikadho gi jo, rupiri aŋat'aoro jo.”

²¹Gikenyo Petero oloro to waco rijo ni, “An a ŋata wirango. Wibino raŋo?”

²²Jowaco ni, “Jasirikale madwoŋ m'ilwoŋo ni Kornelio ama ooro wan. Go obedo ŋataber ma lamo Were aka Joyuda joworo go swa. Acel kwoŋ jomalaika pa Were owaco rigo nike wolwoŋin i ot pere, wonyali winjo gim'inowaci.”

²³Petero orwako jono i ot to jonindo kenyo. Yawere mere go oyikere to kadho gi jo; aka jowote moro ma jowok Yopa bende jokadho gine.

²⁴Yawere mere jotundo Kasareya kama Kornelio oyido kur'iye go, kanyacel gi wade pere gi merin pere ma go olwoŋo.

²⁵Munyo Petero nyaka donjo i ot, Kornelio oromo gine, to podho dho tiende gi bwonirok.

²⁶Petero owaco rigo woay malo. Owaco ni, “cuny, kole abende adhano adhana.”

²⁷Petero omedere gi luwo kodi Kornelio munyo donjo i ot, kam'onwaŋ'iye ji mathoth ma jocokere.

²⁸Owaco rijo ni, “Wiwegi wiŋeyo maber nike dini pa Jayuda kiyey go riwirok kodi Jopath. To Were otieko nyuthan ni akir'ater dhano moro je paka jakicar kosa ni k'olony.

²⁹Am'omiyo munyo ioro ji lwoŋan abino m'ongoye piem. Onyo wac ran gim'omiyo ilwoŋan.”

³⁰Kornelio owaco ni, “Ndelo aŋwen m'okadho onwaŋo akwayo i ot paran sawa abuŋwen m'odieceŋ. Piyo piyo dhano m'orukere i ruk ma minyin ocungo ruwaŋan.

³¹Owaco ni, ‘Kornelio! Were owinjo kwayo perin, aka opoyo tic perin ma konyo ji.

³²Or dhano moro Yopa wolwoŋi jal m'ilwoŋo ni Simon Petero ma obedo wendo peco pa Simon jajwayi piendere, ma bedo dho thengi wakawaka!’

³³Am'omiyo aoro ji lwoŋin mayot, aka itimo maber bino. Pama onyo wajoje wan ka i nyim Were, wakuro winjo gimoro je ma Rwoth oorin waco.”

³⁴Petero ocako luwo ni, “Onyo pama aneno adieri ni Were tero dhano je marom.

³⁵Nyatoro je ma lworo go aka timo gim'otire, go jolo m'ongoye tito nono pere.

³⁶Wiŋeyo fonji ma go odhiro ri ji ma Isiraili, ma tito Wac Manyen Maber ma kelo siem i Yesu Kristo, m'obedo Rwoth pa ji je.

³⁷Wiŋeyo gimadwoŋ m'otimere i Yuda parom, cako Galili, cako kwoŋ batisimo ma Yohana ofonjo:

³⁸Paka Were okonjo kwoŋ Yesu ma Nazareth Cuny Maleŋ kodi meni; paka go okidho kamoro je munyo timo bero gi botho joma two je m'onwaŋo jonitie i acanda pa jwogi, rupiri Were oyido nigi go.

³⁹Wabedo jokony ma joŋeyo gimoro je ma go otimo i piny Yuda kodi i Yerusalem. Joneko go munyo joguro go kwoŋ musalaba.

⁴⁰To Were ocerino go kwoŋ jom'otho i ndelo mar'adek, to miyo go menyere ri ji.

⁴¹Ji je jok'oneno go, to wan ayino ma wabedo jokony ma Were otieko yero. Wacemo odoko waoro gir'amadha kanyacel gine munyo Were otieko cerino go kwoŋ jom'otho.

⁴²Aka go ooro wan fonjo ji Wac Manyen Maber, gi nyutho jo kamaler nike go a ŋata Were oketho thumo banja pa jomakwo gi jom'otho.

⁴³Jotuci wac Were je joluwo kwoŋe, munyo jowaco ni nyatoro je m'oyey go ibino cwako reco pere gi meni ma nyingi go.”

⁴⁴Munyo Petero fodi luwo, Cuny Maleŋ oloro kwoŋ joje m'onwaŋo jociko ithi jo jowinjo fonji.

⁴⁵Joyuda ma joyeyo ma jobino wok Yopa gi Petero jodhier ni Were okonjo mic pere ma Cuny Maleŋ kwoŋ Jopath bende.

⁴⁶Ato jowinjo munyo joluwo i dhodhok manyen manyakare ka jopako dwoŋ pa Were. Aka Petero owaco ni,

⁴⁷“Nitie ŋata nyalo geŋo jome kwoŋ batisimo ma pi ma to bende jotieko limo Cuny Maleŋ paka wan?”

⁴⁸Gikenyo go ooro jo ni wobatisa jo i nyingi Yesu Kristo. Rumacen jokwayo Petero gin ni jowobed'iye gi jo ndelo ma romo.