Read dhopadhola Tim pa Jomoor 11 Bible Online

Tim pa Jomoor 11 - dhopadhola bible

Tim pa Jomoor 11

¹Jomoor kodi wadi jo ma Yuda parom jowinjo ni Jopath bende jojolo wac pa Were.

²Munyo Petero okidho Yerusalem, ji m'onwaŋo joyenyo ni Jopath bende jowothumere jogesa ni,

³“Raŋo wikidho bongi Jopath ma jok'othumere to wicemo kiri gi jo!”

⁴Gikenyo Petero otito rijo thenethene ma gim'otimere woki i cakirok mere ama:

⁵“An onwaŋo anitie ikwayo i tindi ma Yopa, to aneno gimoro munyo loro piny wok i polo m'ocalo suka mapando m'icaro piny kareno omaki thenge aŋwen je to tundo bongan.

⁶Akaŋasa iye maber t'aneno le ma nyatiende aŋwen, kodi ogwaŋe, kodi gigipiny ma mol gi kor gin kodi winyin ma malo.

⁷Aka awinjo dwondi jo moro m'owaco ran ni, ‘Petero, ay malo, neki jo icami!’

⁸To awaco ni, ‘K'ameno Rwoth! Ongoye cemo makicar kosa ma k'olony m'otieko donjo i dhokan.’

⁹Dwondi jo m'owok i polo no oluwo kendo ni, ‘Gima Were otieko lonyo, ikir'ilwoŋo ni gima kicar.’

¹⁰Gime otimere didek, aka rumacen oyway t'idwoko i polo.

¹¹I hongo no won ama ji moro adek m'oor bongan wok Kasareya jotundo i ot m'onwaŋo abed'iye.

¹²Cuny Maleŋ owaco ran ni akidhi gi jono m'ongoye yero. Joma joyeyo aucel me bende jowotho kodan kiri i Kasareya, to wajoje wadonjo i ot pa Kornelio.

¹³Go owaco riwan paka oneno malaika moro ocungo i ot pere to waco rigo ni, ‘Or dhano Yopa wolwoŋi Simon ma nyinge Petero.

¹⁴Go bino kelo riwin wac ma bino miyin kodi jopeco perin je limo both.’

¹⁵Aka munyo acako luwo, Cuny Maleŋ oloro rijo paka cango oloro riwan i kacako.

¹⁶Gikenyo apoyo gima Rwoth ndir ca owaco ni, ‘Yohana obatisa win gi pi to wibino limo batisimo ma Cuny Maleŋ.’

¹⁷Onyo k'inen Were omiyo Jopath no bende mic acel ma go omiyo wan munyo wayeyo Rwoth Yesu Kristo, onyo an aŋa, ma d'atem juko Were!”

¹⁸Munyo jowinjo gime, joliŋ piem, to jopako Were munyo jowaco ni, “Kere Were otieko miyo Jopath bende hongo ma ŋuto gi bedo gi kwo.”

¹⁹Jom'oyeyo jokedhere ro lweny m'obedo munyo oneki Stefano. Jomegi jokidho kiri yu Fonisia kodi Sipuro kodi Antiok munyo jotito mikwenda ri Joyuda kende.

²⁰Aka jom'oyeyo megi, ji ma jowok Sipuro kodi Sireno jokidho Antiok to jotito ri Jogris mikwenda no bende, munyo jofonjo jo Wac Manyen Maber kwoŋ Rwoth Yesu.

²¹Cingi Rwoth onwaŋo nigi jo, aka ji mathoth joyeyo to jowire bongi Rwoth.

²²Wac me otundo i kitipa pa jom'oyeyo ma Yerusalem to jooro Barinaba yu Antiok.

²³Munyo go otundo to neno nema pa Were m'oyido nikenyo, osangala to kwayo joje ni jowobedi gi genirok kodi adieri ruwaŋ Rwoth gi ridho madwoŋ;

²⁴ato Barinaba onwaŋo obedo dhano maber, m'opoŋ gi Cuny Maleŋ kodi yeyo. Aka ji mathoth swa jomedere i kitipa ji pa Rwoth.

²⁵Gikenyo Barinaba okidho Tariso rango Saulo.

²⁶Munyo onwaŋo go, okelo go Antiok. I hongo ma romo oro gipi jario me joromo gi kitipa pa jom'oyeyo, to jofonjo ji madit swa. I Antiok me ama open lwoŋ'iye jofonjirok ni Jokristo.

²⁷I kare no ama jotuci wac Were megi jobin'iye Antiok wok Yerusalem.

²⁸Acel kwoŋ jo, ma nyinge Agabo, ocungo malo gi meni pa Cuny Maleŋ, to luwo kwoŋ kec madwoŋ ma bino bedo to swana piny gipi. (Kec no obino i adhum pa Kilaudio.)

²⁹Jofonjirok joridho ni kisi dhano kwoŋ jo ripo dhiro kony ri wadi jo ma Yuda paka go nyalo.

³⁰Jotimo ameno, to jodhiro pesa ri jotel ma kitipa pa jom'oyeyo munyo luwo gi i cingi Barinaba gi Saulo.