Read dhopadhola Tim pa Jomoor 12 Bible Online

Tim pa Jomoor 12 - dhopadhola bible

Tim pa Jomoor 12

¹I hongo no Herode m'obedo kere ocako lweny gi jomegi ma kitipa pa jom'oyeyo.

²Go owodho or t'ineko Yakobo, omin Yohana, g'abor.

³Munyo oneno ni gino osangala Joyuda, go omedere oro ji mako Petero bende. (Gime otimere i ndir ma kalima ma Mugat ma Buthow.)

⁴Munyo otiek mako rigo Petero, oketho go i od twec, to ketho go i cingi bwora aŋwen ma jolweny aŋwen aŋwen, kuro go. Herode oyido oyiko wodho go kenyo wowinji banja pere ka kalima ma Kadho orumo.

⁵Ameno Petero obedo i od twec; to ji ma kitipa pa jom'oyeyo onwaŋo jokwayo Were rigo gi geregere madit.

⁶Wor no won ma Herode onwaŋo kidho wodh'iye go ri ji, Petero onwaŋo nindo i dier jokur ario kareno otwey go g'atege ario, aka jokur megi oyido jonitie kiri dho waŋkac ma od twec.

⁷Piyo piyo malaika pa Rwoth omenyere, to lero meny i od twec. Malaika no ogwelo buti Petero, oyengo go to cewo go aka owaco ni, “Kwakere! Ay malo!” Gikenyo won to atege ma cinge budhere woko.

⁸To malaika waco rigo ni, “Rukere irwaki war perin.” Petero otimo ameno, to malaika waco ni, “Ere ruki kabuti perin iluwan.”

⁹Petero oluwo go to jowok i od twec to go k'oŋeyo kada ni gima malaika no onwaŋo timo obedo adieri; oparo nike kono manago menyirok moro ama go onyo neno.

¹⁰Jokalo jokur marapena gi mar'ario, to jotundo i waŋkac ma nyweny ma royo ma kidho yu tindi. Waŋkac no won oyawere kende rijo, to jowok woko i royo. Piyo piyo to malaika no weyo Petero kenyo kende.

¹¹Gikenyo Petero nyaka oniaŋ kwoŋ gim'owok timirok rigo, to waco ni, “Nyaka onyo aŋeyo ni gime obedo adieri! Rwoth ooro malaika pere wobothan kwoŋ meni pa Herode kodi kwoŋ gigipiny je ma Joyuda oyido jocano timo ran.”

¹²Munyo otieko niaŋ ameno, okidho peco pa Maria min Yohana ma nyinge man Mariko. Ji mathoth onwaŋo jocokere kenyo jokwayo.

¹³Petero ogudo thigo ma woko to jatic manyako m'ilwoŋo ni Roda bino.

¹⁴To munyo go oniaŋ ni obedo dwondi Petero, ogik i ot gi ŋwec ma k'oyawo thigo ro kisangala madit, to waco rijo paka Petero ocungo woko i waŋkac.

¹⁵Jowaco rigo ni, “Neko omakin!” Aka munyo go omedo waco nike obedo adieri, jodwoko ni, “Kono meno malaika pere ayin.”

¹⁶I hongo no Petero omedo gudo thigo. Rumacen joyawo thigo aka munyo joneno go jodhier swa.

¹⁷Go onyutho jo gi cinge ni jowoliŋ, aka otito rijo paka Rwoth owodho go i od twec. Owaco ni, “Waci win ri Yakobo kodi jom'oyeyo je.” Gikenyo oweyo jo to kadho kaman.

¹⁸Yawere mere odikin, ruwirok madwoŋ obedo i dier jokur ma od twec ri gim'otimo Petero.

¹⁹Munyo Herode owodho or ma rango go, to jok'onyalo nwaŋo go, oyenyo ni wopenji jokur to wodho or ni woneki jo. Rumacen Herode oay wok i Yuda to kidho wocowi hongo moro yu Kasareya.

²⁰Herode onwaŋo yado nigi dhaw moro kodi ji ma Tire kodi Sidon; ameno jokidho bonge i muma neno go. Jono kutho jotelo mako mere gi Bulasito, jal m'oyido kuro cel pa kere. Gikenyo nyaka jokidho bongi Herode to jokwayo go siem, rupiri piny pajo onwaŋo limo cemo ma wok i piny pa kere no.

²¹I ndelo m'oyik, Herode orwako ruk pere ma dhum, to bedo wi kom pere ma dhum, to cako luwo gi jo.

²²Gikenyo ji jokoko ni, “Me ki dwondi dhano ama luwo, to were moro ayin!”

²³Piyo piyo malaika pa Rwoth ogoyo Herode matek, rupiri go k'omiyo Were dwoŋ. Aka kudin ocamo go to tho.

²⁴To wac pa Were omedo nyay gi dongo.

²⁵Munyo Barinaba gi Saulo jocowo timo tic pajo, jogik yu Yerusalem kodi Yohana gi Mariko.