Read dhopadhola Tim pa Jomoor 13 Bible Online

Tim pa Jomoor 13 - dhopadhola bible

Tim pa Jomoor 13

¹I kitipa pa jom'oyeyo ma Antiok, oyido nitie jotuci wac Were moro kodi jofonji: Barinaba, Simeo (m'ilwoŋo ni Ma col), Lukio (ma wok Sireno), Manaen (m'odongo pa gavana Herode), kodi Saulo.

²Ndelo moro munyo jolamo Rwoth aka joriyo kec, Cuny Maleŋ owaco rijo ni, “Kethi ran win gicen Barinaba kodi Saulo, jowotimi tic ma alwoŋ'iye jo.”

³Munyo jotieko riyo kec kodi kwayo, joketho cingi gin kwoŋ jo to jodhiro jo kadho tic.

⁴Munyo Cuny Maleŋ otieko oro Barinaba gi Saulo, jokidho yu Selukia aka jocewere wok kenyo to jokidho i kigoda ma Sipuro.

⁵Munyo jotundo Salemis, jofonjo wac pa Were I kalamo pa Joyuda. Yohana Mariko oyido konyo jo i tic.

⁶Joje jocewere yu loka i kigoda ma Pafo, kama jorom'iye gi jathieth moro ma nyinge Bar Yesu, Jayuda m'obedo jatuci wac ma twodo.

⁷Go oyido tiyo ri gavana ma kigoda no, Serigio Paulo, m'onwaŋo obedo ŋatariek swa. Gavana no olwoŋo Barinaba kodi Saulo bonge rupiri oyido mito winjo Wac pa Were.

⁸To Elima jathieth (meno a dwoŋ nyinge) opiemo gi jo ka temo ywayo woko gavana i yeyo.

⁹Gikenyo Cuny Maleŋ opoŋ kwoŋ Saulo, ma bende oŋeyere ni Paulo, to ŋiyo waŋ jathieth no tirtir

¹⁰to waco ni, “In wod pa jwogi, m'ibedo jakwor gi gimoro je m'otire, aka imore kodi thenethene mareco ma twodo, kere ikilaweyo wiro adieri pa Rwoth i twodo?

¹¹Cingi Rwoth eno bino podho kwoŋin pama; waŋin bino tho, aka ik'onen lero pa waŋceŋ cowo hongo moro.” Piyo piyo no Elima owinjo munyo tor macol umo waŋe, to cako woth ariwa ariwa munyo temo nwaŋo dhano m'omak cinge to telo go i royo.

¹²Gavana oyeyo munyo oneno gim'otimere no; aka odhier swa kwoŋ fonji pa Rwoth.

¹³Gikenyo Paulo kodi wadi jocewere wok Pafo to jokidho yu Paga iy'adec ma Pamfilia kama Yohana Mariko owey'iye jo to gik yu Yerusalem.

¹⁴Jomedere gi woth wok Paga to jokidho Antiok ma Pisidia; aka i ndelo ma Sabato jodonjo i kalamo pa Joyuda to jobedo piny.

¹⁵Munyo kisoma m'owok i Cik pa Musa kodi i ndiko pa jotuci wac Were orumo, jotel ma kalamo pa Joyuda jodhiro rijo mikwenda ni, “Wutmin wan, luw win ye gi ji ka winitie gi wac ma medo gine jo meni.”

¹⁶Paulo ocungo, to miyo jo ranyuth gi cinge to cako luwo ama: Joisiraili jowotan, kodi Jopath je ma jolamo Were, winji win!

¹⁷Were pa ji ma Isiraili oyero kwarere mawan, to miyo nono pajo bedo madwoŋ i ndir ma jobed'iye i piny Misir. Were owodho jo wok Misir gi meni pere m'oasere,

¹⁸aka i hongo ma oro piero aŋwen ofamba gi jo i dier thim.

¹⁹Go oreyo woko nonin abirio i piny ma Kanan to loko ji pere wegi piny no cowo

²⁰hongo ma oro cegin miya aŋwen gi piero abic. Rumacen omiyo jo jothumi banjin, cuka tundo ndir pa Samwiri jatuci wac Were.

²¹Aka munyo jokwayo kere, Were omiyo jo Saulo, wod pa Kisi, janono pa Benyamin, bedo kere pajo ma oro piero aŋwen.

²²Munyo Were otieko kwanyo go woko, oloko Daudi kere pajo. Me a gima Were oluwo kwoŋe: “Anwaŋo ni Daudi wod pa Yese, obedo kiti dhano ma amito, ŋata bino timo gimoro je ma ayenyo ni wotim.”

²³Yesu, acel kwoŋ nyikway Daudi, a ŋata Were oloko Jaboth pa ji ma Isiraili paka cango ociko.

²⁴Mafodi Yesu k'obino, Yohana ofonjo ji je ma Isiraili nike jowoŋuti reco pajo wobatisa jo.

²⁵Aka munyo Yohana oyido cegin cowo tic pere, openjo ji ni, “Wiparo ni an a ŋa? Akibedo ŋata wikuro. To neni win, go luwan cen, aka akiripi kada lunyo war ma tiende.”

²⁶Wutmera, nyikway Abraham, kodi Jopath je manitie ka ma jolamo Were: Fonji ma mako kwoŋ both me otiek dhiro riwan!

²⁷Kole ji ma Yerusalem kodi jotel pajo jok'oŋeyo nike go a Jaboth, aka jok'oniaŋ kada wac pa jotuci wac Were m'isoma i kisi Sabato. Kad'ameno wac pa jotuci wac Were otundo i kare munyo jothumo ri Yesu banja ma tho.

²⁸Aka kada jok'onwaŋo atoŋa ma thumo rigo banja ma tho, je fodi jokwayo Pilato nike woneki go.

²⁹Aka munyo jotieko timo gimoro je ma Ndiko Maleŋ luwo kwoŋe, jogamo go kwoŋ musalaba to joketho go i kaliel.

³⁰To Were ocerino go kwoŋ jom'otho,

³¹aka i ndelo madit onyuthere ri joma yado jowotho gine woki i Galili tundo Yerusalem. Jono am'onyo pama jobedo jokony i wac pere i waŋ ji ma Isiraili.

³²Aka onyo bende wakelo riwin Wac Manyen Maber no.

³³Gima Were ociko kwarere mawan nike d'otimo, pama go otieko timo riwan ma wabedo nyikway jo, munyo ocerino Yesu paka ondiki i Zabuli mar'ario ni, “In Wodan, konon alokere Benin.”

³⁴Aka me a gima Were owaco kwoŋ cerino pere kwoŋ jom'otho ma odoko k'ogiki i topo: “Abino miyin silwany maleŋ ma bu kiganagana ma cango aciko Daudi.”

³⁵Aka adieri go owaco kaman ni, “Ik'oyey jatic perin wotopi.”

³⁶Kole Daudi oketho atoŋa pa Were i tim i ndir pere; rumacen go otho to iyiko cegin gi kwarere pere, aka otho to top woko.

³⁷To ŋata Were ocerino kwoŋ jom'otho k'onyalo top woko.

³⁸Riameno wutmere, wijoje wiripo ŋeyo adieri nike fonji kwoŋ cwako reco ma ifonjo win wok bongi Yesu;

³⁹Aka nyatoro je ma yeyo i go igonyo go woko kwoŋ gimarac ma Cik pa Musa onwaŋo kinyal gonyo win kwoŋe.

⁴⁰Am'omiyo gwokere win, ŋey gima jotuci wac Were jowaco wokiri wotimere riwin ni:

⁴¹ Neni win, wijocay! Dhier win witho; rupiri alatimo tic moro i ndir mewin won, to wik'oyey tic no kada moro otemi tito riwin!

⁴²Munyo Paulo kodi Barinaba oyido jokidho wok i kalamo pa Joyuda, okway jo ni jowogiki kendo i Sabato ma luwo aka jowomedi waco rijo kwoŋ gigipiny me.

⁴³Munyo ji jotieko eye i romo, Joyuda mathoth kodi Jopath ma jowire i dini pa Joyuda joluwo Paulo gi Barinaba. Jomoor joluwo gi jo aka jomedo jo miseni nike jowomedere i nema pa Were.

⁴⁴I Sabato ma luwo, cegin kisi dhano obino wok i tindi winjo wac pa Were.

⁴⁵Munyo Joyuda joneno lwak ji, nyeko omako jo; jopiemo gi gima Paulo oyido waco aka joyeto kiri go.

⁴⁶To Paulo kodi Barinaba jomedo luwo pajo gi miseni ni, “Oyido yenyere ni wac pa Were wopen tito riwin ayino. To paka wikijol, aka wikiter i kwo mewin paka joma ripo limo kwo makirum, walaweyo win to wakidho bongi Jopath.

⁴⁷Kole meno a or ma Rwoth omiyo wan munyo owaco ama.” “ ‘Aketho win paka lero pa Jopath, ni winyal kelo both ri piny gipi.’ ”

⁴⁸Munyo Jopath jowinjo gime josangala aka jopako fonji pa Rwoth. Aka jom'oyido oyer ri kwo makirum jolokere jom'oyeyo.

⁴⁹Wac pa Were onyay iye je iy'adec no.

⁵⁰To Joyuda josigila jotel pa ji i tindi kodi mon pa Jopath ma kitipa ma malo ma onwaŋo jolamo Were. Gikenyo jocako lweny gi Paulo kodi Barinaba to joriemo jo woko iy'adec no.

⁵¹Jomoor joteŋo lowo ma par tiendi gin munyo jokwoŋo jo to jokadho yu Ikoniam.

⁵²Jofonjirok ma Antiok jopoŋ gi kisangala i cuny jo kanyacel gi Cuny Maleŋ.