Read dhopadhola Tim pa Jomoor 14 Bible Online

Tim pa Jomoor 14 - dhopadhola bible

Tim pa Jomoor 14

¹Gima pameno bende otimere Ikoniam: Paulo kodi Barinaba jodonjo i kalamo pa Joyuda to joluwo wac m'omiyo Joyuda kodi Jogris mathoth joyeyo.

²To Joyuda ma jok'onyalo yeyo josigila Jopath to joruwo paro pajo ni joeye kwoŋ jom'oyeyo no.

³Jomoor jobedo kenyo hongo malac. Joluwo gi miseni kwoŋ Rwoth, m'oridho ni fonji pajo kwoŋ nema pere oyido obedo adieri munyo miyo jo meni ma timo ranyuth kodi gidhier.

⁴To kitipa pa ji i tindi otiakere: Jomegi jodok yuthenge pa Joyuda, joman yuthenge pa jomoor.

⁵Gikenyo Jopath kodi Joyuda, kanyacel gi jodhum pajo, joyiko lweny kodi jomoor gigoyo jo gi telin.

⁶Munyo jomoor jolimo ŋeyo i wac no, joringo yu Listira kodi Dabe, tindin ma Likonia, kodi iy'adec m'othoko jo.

⁷Kenyo ama jofonj'iye Wac Manyen Maber no.

⁸Onwaŋo nitie nyatoro i Listira ma tiende je oŋol; go oyido oŋol wok i nywolirok pere aka k'onyalo woth.

⁹Go onwaŋo obedo piny ciko ithe winjo wac pa Paulo. Gikenyo Paulo oneno go tirtir aka munyo oneno nike ŋato nigi yeyo aka nyalo limo both,

¹⁰owaco rigo gi dwonde madwoŋ ni, “Ay malo icungi m'itire!” Ŋato oay malo abwap to cako thokirok gi woth.

¹¹Munyo lwak ji oneno gima Paulo otimo, jocako koko i dhodhok Likonia pajo ni, “Werin jolokere ji aka joloro bongi wan!”

¹²Jomiyo Barinaba nyinge ni Zewo, aka Paulo ni Hames, rupiri go oyido a jaluwo madwoŋ.

¹³Gikenyo jacowirok i migam pa were Zewo, ma migam pere oyido nitie dho tindi, okelo thwondhe moro kodi thiw ajwoka i waŋkac munyo go kanyacel kodi ji ma tindi no onwaŋo jomito timo cowirok ri jomoor.

¹⁴Munyo Paulo gi Barinaba jowinjo gim'onwaŋo jokidho timo, joyeco nangin pajo to joringo i dier lwak ji munyo jokoko ni,

¹⁵ “Jume, raŋo ma witimo gime? Wabende wabedo ji paka win! Wanitie ka i atoŋa ma tito riwin Wac Manyen Maber, kwanyo win woko kwoŋ gigipiny me m'ongoye kony bongi Were Ma kwo, m'ocweyo polo gi piny, nam kodi gigipiny je manitie i iye.

¹⁶I ndir m'okadho go oweyo nonin je luwo yo pajo wegi;

¹⁷to kad'ameno go k'odoŋ nono m'ongoye gima nyutho ni go nitie, rupiri go onyuthere ndir je i gigipiny mabeyo ma go timo: Go miyo win koth wok i polo kodi cemo m'ipidho i hongo m'otire; go miyo win cemo aka poŋo kisangala i cuny win.”

¹⁸To kada joluwo kweth wac me, je jomoor jok'onyalo i yoto juko jono cowirok rijo.

¹⁹Joyuda moro jowok yu Antiok ma Pisidia kodi Yu Ikoniam; aka munyo jocowo ywayo ji yuthenge pajo, jogoyo Paulo gi telin, joywayo go, to jowodho go woko ma tindi munyo joparo nike go otieko tho.

²⁰To munyo jom'oyeyo jocokere jothoko go, oay malo to gik i tindi. Yawere mere go kodi Barinaba jokadho yu Dabe.

²¹Paulo kodi Barinaba jofonjo Wac Manyen Maber i Dabe to jolimo jofonjirok mathoth. Gikenyo jogik Listira, kodi Ikoniam, kodi Antiok i Pisidia.

²²Jomedo jom'oyeyo meni to jomedo jo miseni nike jowocwire i yeyo. Jofonjo ni, “Waripo donjo i Ker pa Were munyo waluwo i teko madit.”

²³Munyo jotieko ketho jotel i kisi kitipa pa joma yeyo gi kwayo kodi riyo kec, joketho jo i cingi Rwoth m'oyido joketho geno pajo kwoŋe.

²⁴Munyo jocowo woth iy'adec ma Pisidia, jokidho yu Pamfilia.

²⁵Jofonjo i Paga to joloro Atalia.

²⁶Aka wok kenyo jocewere to jogik Antiok, kama ndir ca oketh'iye jo gicen ri Were i kur ma nema pere kwoŋ tic m'oyido jocowo me.

²⁷Munyo jotundo Antiok, jocoko ji ma kitipa pa jom'oyeyo kanyacel to jowaco rijo gimoro je ma Were otimo gi jo; kendo paka onyo oyawo royo ri Jopath ma yeyo.

²⁸Jotieko kenyo hongo malac gi jom'oyeyo.