Read dhopadhola Tim pa Jomoor 15 Bible Online

Tim pa Jomoor 15 - dhopadhola bible

Tim pa Jomoor 15

¹Nitie jomoro ma jowok Yuda to jobino Antiok to jocako fonjo jom'oyeyo ni, “Wikinyal limo both kwanyo woko ka withumere paka Cik pa Musa waco.”

²Paulo kodi Barinaba jobedo gi piem mager tektek gi jo kwoŋ gime; gikenyo oridhi ni Paulo kodi Barinaba kodi joman ma Antiok jowokidhi Yerusalem jowoneni jomoor kodi jotel ma kitipin kwoŋ wac me.

³Paka kitipa pa jom'oyeyo ooro jo, joluwo yu Fonisia kodi Samaria to jowaco rijo paka Jopath bende jowire bongi Were; wac me okelo kisangala madwoŋ ri jom'oyeyo je.

⁴Munyo jotundo Yerusalem, kitipa pa jom'oyeyo kodi jomoor kodi jotel ma kitipin je jojolo jo maber, to jowaco rijo gimoro je ma Were otimo rijo.

⁵To jom'oyeyo megi m'oyido jonitie i kweth pa Jofarisayo jocungo to jowaco ni, “Mitere wothum Jopath aka wowaci rijo mako Cik pa Musa.”

⁶Gikenyo jomoor kodi jotel ma kitipin, joromo kanyacel paro kwoŋ wac me.

⁷Rumacen munyo piem okadho kamabor, Petero ocungo to waco ni, “Wutmera, wiŋeyo nike yucen koro Were oyeran i dier win fonjo Jopath Wac Manyen Maber, nike jowonyal winjo jowoyey.

⁸Aka Were, m'oŋeyo cuny ji, onyutho paka ojolo Jopath munyo bende omiyo jo Cuny Maleŋ, paka otimo gi wan.

⁹Go k'opoko wan gi jo; aka ocwako reco pajo cungo kwoŋ yeyo pajo.

¹⁰Am'omiyo, raŋo ma wimito temo Were mawan munyo wiyimo ri jom'oyeyo okol i goki jo makada kwarere wan kosa wawegi wakinyali tiŋo?

¹¹Be! Kole wayeyo ni wabino limo both kwoŋ nema pa Rwoth Yesu, paka jo bende.”

¹²Gikenyo jom'ocokere je joliŋ to jowinjo Barinaba kodi Paulo munyo jonuŋanuŋa ri ji gir'aura je kodi gigipiny ma kelo dhier ma Were otimo i dier Jopath.

¹³Munyo jocowo luwo, Yakobo oluwo malo ni, “Winjan win, wutmera!

¹⁴Simon owok tito riwan paka Were okutho onyutho paka dewo kwoŋ Jopath munyo kwanyo i dier jo ji ma jowobedi apere won.

¹⁵Kole wac pa jotuci wac Were makere swa gi me. Paka ndiko waco ama.”

¹⁶ “Rumacen abino dwoko, abino geto kendo ot pa Daudi m'opodho. Abino geto kendo gundin mere, alageto malo.”

¹⁷“Aka ŋey ji man je joworangi Rwoth, kodi Jopath je m'ilwoŋo jo gi nyingan.”

¹⁸“Rwoth, m'omiyo gime oŋeyere wok con ama owaco ameno.”

¹⁹“Am'omiyo aparo ni wakiripi cando Jopath ma jowire bongi Were;

²⁰kucel waripo ndiko balwa ma cero jo lamo cal makicar kosa timo kidakana kosa camo gim'odey kosa remo moro je kosa cemo moro je ma k'olony ayin.

²¹Kole Cik pa Musa otiek kisoma hongo malac i kalamo pa Joyuda m'omore i Sabato je, aka wac pere ifonjo i tindi je.”

²²Gikenyo jomoor kodi jotel ma kitipin pa jom'oyeyo, kanyacel gi kitipa pa jom'oyeyo gipi joridho yero ji moro i kitipa gi dhiro jo Antiok kodi Paulo gi Barinaba. Joyero Yuda m'ilwoŋo ni Barsaba kodi Sila, j'ario ma jom'oyeyo jomiyo dwoŋ swa.

²³Jodhiro jono gi balwa me: “Wan jom'oyeyo jowot win, ma joman jomoor aka joman jotel ma kitipin pa jom'oyeyo, wadhiro moth ri jom'oyeyo ma Jopath ma Antiok kodi Siria kodi Silisia.

²⁴Watieko winjo paka ji megi i kitipa mawan jobino koro to jokwinyo win gi luwo pajo ma to wakifonjo jo ni jowotimi ameno.

²⁵Am'omiyo watieko romo kanyacel aka wajoje wayere yero jomikwenda moro to wadhiro jo riwin. Jobino kanyacel gi merin mawan Barinaba gi Paulo,

²⁶cwo ma jojala kwo pajo i tic ri Rwoth Yesu Kristo.

²⁷Am'omiyo wadhiro riwin Yuda kodi Sila, ma wegi jobino waco riwin gigipiny ma wandiko riwin.

²⁸Ato oneno ri Cuny Maleŋ kodi wan ni ber wakiri watur win gi bieto kwanyo woko or me kende:

²⁹Wikiri wicam gim'ocow gine jwogi; wikiri wicam remo; wikiri wicam le m'odey; aka kure win kwoŋ kite ma kidakana. Wibino timo maber ka wikure kwoŋ gigipiny me. Kutho win.”

³⁰Jooro jomikwenda no to jokidho Antiok, kama jocok'iye kitipa pa jom'oyeyo je to jomiyo jo balwa no.

³¹Munyo ji josoma balwa no, kisangala opoŋ i cuny jo ro mikwenda ma dwoko meni.

³²Yuda kodi Sila, m'onwaŋo bende jotuci wac Were, joluwo ma hongo malac kodi jom'oyeyo no munyo jomedo jo meni kendo jodwoko cuny jo.

³³Munyo jocowo hongo moro kenyo, jom'oyeyo josewila jo gi siem, to jogik bongi jomoor.

³⁴[To Sila oridho paro ma doŋ kenyo].

³⁵Paulo kodi Barinaba jocowo hongo moro i Antiok kanyacel gi joman mathoth munyo jofonjo wac pa Rwoth.

³⁶Rumacen Paulo owaco ri Barinaba ni, “Weyi wagiki waliewi wutmin wan i tindi je ma watieko fonj'iye Wac pa Were, aka wanen paka jonitie.”

³⁷Barinaba onwaŋo yenyo ni jowokadhi gi Yohana Mariko bende,

³⁸to Paulo oparo ni jokiripi kadho gine, rupiri ndir ca go k'obedo gi jo kiri i gik tic pajo, to owire to weyo jo i Pamfilia.

³⁹Jobedo gi piem matek wegi kendi gin, to jopokere. Gikenyo Barinaba okwanyo Mariko to jocewere jocomo yu Sipuro,

⁴⁰to Paulo oyero Sila to jokadho kareno jom'oyeyo joketho go i kur ma nema pa Were.

⁴¹Go oluwo yu Siria kodi Silisia, munyo jomedo kitipa pa jom'oyeyo meni.