Read dhopadhola Tim pa Jomoor 2 Bible Online

Tim pa Jomoor 2 - dhopadhola bible

Tim pa Jomoor 2

¹Munyo ndelo ma Pentekost otundo, jom'oyeyo jocokere kanyacel i ot.

²Gikenyo derino owok i polo m'ocalo koyo ma kudho, to poŋo ot gipi m'onwaŋo jontie iye.

³Aka joneno gima cale lew mac m'otiakere; dhano je lew mac no ogeyo.

⁴Cuny Maleŋ opoŋ kwoŋ jo to jocako luwo dhodhok m'opokere, paka Cuny Maleŋ omiyo jo luwo.

⁵I Yerusalem onwaŋo nitie Joyuda ma jomaro Were ma jowok i thenge je ma piny.

⁶Munyo jowinjo derino no, lwak ji jocokere kanyacel; joje jouro, rupiri kisi dhano owinjo joluwo dhodhok pere won.

⁷I dhier kodi i uro jopenjo ni, “Ji ma joluwo ni je ki Jogalili?

⁸To nedi ma kisi dhano je kwoŋ wan winjo joluwo dhodhok mawan won?

⁹Jomegi kwoŋ wan jowok Pathia, Mediya kodi Elam; Mesopotamia, Yuda kodi Kapadosia; Ponto kodi Asia,

¹⁰Firigiya gi Pamfilia, Misir kodi adec ma Libia cegin gi Sireno; jomegi kwoŋ wan jowok Roma;

¹¹Joyuda kodi joma bu Were ma jowire i dini pa Joyuda, jomegi kwoŋ wan jowok Kirete kodi piny pa Jowarabu ma wajoje wawinjo joluwo dhodhok mawan kwoŋ gigipiny madongo ma Were otimo.”

¹²I dhier madwoŋ gi uro, jomena penjirok wegi kendi gin ni, “Gime dwoŋ mere aŋo?”

¹³To joman jonyero jom'oyeyo, munyo jowaco ni, “Ji me jomer ayin!”

¹⁴Petero ocungo gi jomoor apar g'acel to luwo ri lwak ji gi derino madwoŋ ama: Ji ma Yuda jowotan gi wijoje ma wibedo Yerusalem, cik win ithi win awaci riwin thenethene ma gime.

¹⁵Jome jok'omer gi vini paka wiparo; pama nyaka sawa adek won m'odikin.

¹⁶Kucel, me a gima jatuci wac Were Yowel cango oluwo kwoŋe.

¹⁷ Were waco ni, me a gima bino timere i ndelo macowe: Abino konjo Cuny paran kwoŋ ji je; wot win gi nyigi win jobino tuco wac Were, nyithindho mewin mayac ma soye jobino limo menyirok, aka jom'oti i dier win jobino leko lek.

¹⁸Ey, kwoŋ ŋecin paran, cwo gi mon, kodi ŋecin abino konjo Cuny paran i ndelo no, aka jobino tuco wac paran.

¹⁹Abino timo gir'aura i hongo malo kodi ranyuth m'omore i piny, remo kodi mac kodi yiro m'otwere bino bedo;

²⁰Waŋceŋ bino lokere macol aka dwe bino bokere pa remo, mafodi ndelo pa Rwoth madwoŋ m'oasere k'otundo.

²¹Aka bino bedo ni nyatoro je m'olwoŋ nyingi Rwoth bino both.

²²Win Joisiraili, ciki win ithi win wiwinji gime: Yesu Janazareth onwaŋo obedo dhano ma Were oyero ni wotim gir'aura, kodi gidhier kodi ranyuth m'omore i dier win; aka wiwegi wiŋeyo gime, rupiri otimere bongi win won ka.

²³Were, i mito pere gi rieko pere, onwaŋo otieko yiko con nike bino ketho Yesu me i cingi win; am'omiyo wineko go munyo wiketho ji mareco to joguro go kwoŋ musalaba.

²⁴To Were ocerino go kwoŋ jom'otho; okwanyo go woko i litho ma tho, rupiri onwaŋo kinyalere nike tho wotwey go.

²⁵Kole Daudi cango oluwo kwoŋe ama: Aneno Rwoth i waŋan hongo je, rupiri go nitie yuracuc paran ŋey akir'ayengere.

²⁶Am'omiyo cunyan osangala, aka kisangala opoŋ i wac paran. Aka delkwoŋan bende bino bedo gi geno madwoŋ.

²⁷Rupiri ikibino weyo cunyan i piny pa jom'otho. Odoko ikibino weyo Maleŋ perin wotopi woko.

²⁸Itieko nyuthan royo ma kwo, aka bedo perin kabutan bino poŋo kisangala i cunyan.

²⁹Wutmera, weyi awaci riwin kamaler kwoŋ kwari wan Daudi, m'otho t'iyiko, aka kaliel pere fodi nigi wan kiri konon me.

³⁰Go oyido obedo jatuci wac Were, aka oŋeyo cikirok ma Were otimo gine: Were okwoŋere nike bino ketho nyakwar Daudi acel wolunji kom ma dhum pere.

³¹Daudi oneno gima Were oyido kidho timo, am'omiyo oluwo kwoŋ cerino pa Kristo munyo waco ni, K'owey go i piny pa jom'otho, aka delkwoŋe k'otopi.

³²Were ocerino Yesu me kwoŋ jom'otho; aka wajoje wabedo jokony i wac me.

³³Otiek tiŋo go malo yuracuc pa Were aka onyo walimo bonge Cuny Maleŋ paka Bamere ociko; aka gim'onyo pama wineno aka odoko wiwinjo me, obedo mic pere ma go okonjo kwoŋ wan.

³⁴Kole Daudi won k'okidho malo i polo, to owaco ni, Rwoth owaco ri Rwoth paran ni, Bedi yuracuc paran

³⁵cuka anoloki jokwor perin paka kasik m'ijeng'iye tiendin.

³⁶Am'omiyo ji ma Isiraili, joripo ŋeyo adieri ni manago Yesu, ma wiguro kwoŋ musalaba, ama Were oloko Rwoth kodi Kristo!

³⁷Munyo jowinjo gime, cuny jo oramo jo swa, to jopenjo Petero kodi jomoor man ni, “Wutmin wan wanotim aŋo?”

³⁸Petero odwoko jo ni, “Ŋuti win reco mewin, obatisa win i nyingi Yesu Kristo, wocwaki reco mewin, aka wibino limo mic ma Cuny Maleŋ.

³⁹Kole cikirok me obedo riwin kodi nyithindho mewin kodi ji je ma jonitie bor, ji je ma Were lwoŋo bonge.”

⁴⁰Petero oluwo rijo aka oruma jo gi wac man madit munyo medo jo miseni ni, “Bothi win kwoŋ ndir ma pama m'opoŋ gi reco me!”

⁴¹Ameno ji mathoth ma joyeyo mikwenda pere obatisa jo; ji ma romo gana adek jomedere i kweth pajo i ndelo no.

⁴²Aka jocwire kwoŋ fonji pa jomoor munyo jobedo i kweth acel, i cemo kodi i kwayo.

⁴³Lworo opoŋ i cuny kisi dhano, aka jomoor jotimo gir'aura kodi ranyuth madit.

⁴⁴Jom'oyeyo je jobedo kanyacel aka jotimo gimoro je kanyacel.

⁴⁵Aka jotana gigipiny kodi lim pajo, to jopoko gim'owok'iye i dier gin paka kisi dhano oyenyo.

⁴⁶Bin kisi ndelo jokidho romo kanyacel i Ot pa Were, odoko jocemo kanyacel i udi pajo gi kisangala kodi cuny jo maber,

⁴⁷munyo jopako Were aka ji je oyido jofoyo jo. Ameno Rwoth omedo welo pajo gi jom'oyido ibotho jo kisi ndelo.