Read dhopadhola Tim pa Jomoor 20 Bible Online

Tim pa Jomoor 20 - dhopadhola bible

Tim pa Jomoor 20

¹Munyo woy no orumo, Paulo olwoŋo jom'oyeyo kanyacel, aka munyo otieko medo jo meni to sewila jo. Gikenyo go oweyo jo to kidho yu Makedonia.

²Munyo go otieko woth iy'adec no gi medo jo meni gi wac kweth, okidho piny pa Jogris

³kama go obed'iye hongo ma dwe adek. Go oyido yikere kidho Siria to limo ŋeyo nike Joyuda oyido jocamo rigo sereko; gikenyo go oridho paro ma gik gi yu Makedonia.

⁴Sopata, wod pa Piro ma wok Bereya, okidho gine; Aristariko jokodi Sekundo ma Thesalonika, kodi Gayo ma Dabe, kodi Timothe, kodi Tikiko gi Trofimo ma jowok Asia bende jowotho gine.

⁵Jono jotelo aka jokuro wan i Tirowa.

⁶Wacewere wok Filipi rumacen munyo kalima ma Mugat ma Buthow orumo, aka i ndelo mar'abic aka wariwere gi jo i Tirowa, kama wabed'iye sabiti acel.

⁷I ndelo marapena (i sabiti) odikin, munyo wabedo kanyacel cemo gi merin, Paulo oluwo gi ji luwo mabor kiri i dier wor, rupiri go oyido yenyo kadho yawere mere.

⁸Talin oyido omore i ot ma malo kam'oyido warom'iye.

⁹Jayac moro ma nyinge Yutiko onwaŋo obedo wi dirisa; to paka Paulo omedere luwo, Yutiko nindo onuro cuka nindo okadho gine to podho piny wok wi gorofa ma malo mar'adek. Jotiŋo go malo to jonwaŋo ni otieko tho.

¹⁰To Paulo oloro piny to luŋere kwoŋe to ketho kore kwoŋe to waco ni, “Wikiri wilwor, go fodi kwo!”

¹¹Gikenyo go ogik i ot ma malo, oturo mugat, to camo. Munyo Paulo otieko luwo gi jo hongo malac cuka ceŋ ogulo, to okadho.

¹²Jono jokadho gi jayac no makwo, to cuny jo dwoko maber.

¹³Wamedere gi woth tundo i ye to wacewere wacomo yu Aso, kam'onwaŋo wakidho rwak'iye Paulo i ye. Go owaco riwan timo ameno, rupiri oyido kidho kenyo atiendi.

¹⁴Munyo go oromo gi wan i Aso, warwako go i ye to wakidho yu Mitilene.

¹⁵Wacewere wok kenyo to watundo yu Kiyo yawere mere. Rumacen ma ndelo acel, watundo Samo, aka yawere mere aka watundo Mileto.

¹⁶Paulo oyido oyenyo cewirok kalo Efeso, ŋey nyaka wokiri wonyeki hongo iy'adec ma Asia. Go onwaŋo kwakere ka mito tundo Yerusalem i ndelo ma Pentekost ka nyalere.

¹⁷Paulo odhiro wac Efeso wok Mileto munyo kwayo jotel ma kitipa pa jom'oyeyo bino romo gine.

¹⁸Munyo jobino, go owaco rijo ni, “Wiwegi Wiŋeyo kite ma abed'iye gi win i hongo je, wok i ndelo marapena m'atund'iye iy'adec ma Asia.

¹⁹Gi bwonirok kodi pigi waŋan, atimo tic paran paka jatic pa Rwoth, i ndir ma teko obed'iye ran ro sereko pa Joyuda.

²⁰Wiŋeyo nike akimuŋo win gimoro ma d'okonyo win munyo afonjo win i dier ji kamaler kodi i pecin mewin.

²¹Afonjo Joyuda kodi Jopath parom nike jowoŋuti reco pajo jowogiki bongi Were, to joyeyo Rwoth Yesu Kristo.

²²Aka gunyo ni, gi wac pa Cuny Maleŋ akidho Yerusalem, ma akuya gima bino timan koro.

²³Kwanyo woko gim'aŋeyo a me: I tindi je Cuny Maleŋ otieko nyuthan kicutho nike twec kodi teko ama kuran.

²⁴To akiter kwo paran pa gimadwoŋ, kosa pa gima diwelo tekin acowo tic ma Rwoth Yesu ooran ma tito ri ji Wac Manyen Maber kwoŋ nema pa Were.”

²⁵“Atieko woth i dier win joje, munyo afonjo Ker pa Were, to pama aŋeyo ni kwoŋ win ongoye ŋat'odoko bino nenan kendo.

²⁶Am'omiyo konon atuco riwin kamaler ni ka moro kwoŋ win orweny meno kiwaci paran,

²⁷rupiri akimuŋo win atoŋa pa Were gipi.

²⁸Kure win wiwegi kodi sidwol rombo je, ma Cuny Maleŋ oketho i cingi win, ni wibedi jotel mere, ma konyo kitipa pa jom'oyeyo pa Were, ma go oloko apere gi remo pa Wode won.

²⁹Kole aŋeyo ni k'atieko eye, arara mager bino donjo bongi win, aka jok'owor sidwol rombo.

³⁰Aka ndir bino tundo ma jomoro i dier win won jobino ay gi twodo ma ywayo jom'oyeyo bongi jo.

³¹Am'omiyo kure win, aka poyi win ni, odieceŋ gi wor akikeŋ fonjo dhano je kwoŋ win gi geregere cowo hongo ma romo oro adek.”

³²“To pama onyo aketho win i cingi Were kodi i wac ma nema pere manyalo dongo win to miyo win silwany ma go okano ri ji pere je.

³³Fodi akiwanya feza kosa zahabu pa nyatoro kosa ruk.

³⁴Wiwegi wiŋeyo ni atiyo gi cingan me aka alimo gimoro je ma an kodi jowotan onwaŋo wayenyo aora.

³⁵Atieko nyutho win i gigipiny je nike timo tic gi meni miyo wanyalo konyo joma nyap munyo wapoyo wac pa Rwoth Yesu m'owaco ni, ‘Silwany nitie madwoŋ ri ŋata poko gimoro loyo ŋata limo.’ ”

³⁶Munyo Paulo ocowo luwo, ogoyo conge piny to kwayo gi joje

³⁷Gikenyo joje joywak gi geregere munyo jopodho i kore aka jocwiyo lembe.

³⁸Jorem swa ro wac pere ni odoko jok'oneni go kendo. Rumacen to jokwaŋo go i ye.