Read dhopadhola Tim pa Jomoor 21 Bible Online

Tim pa Jomoor 21 - dhopadhola bible

Tim pa Jomoor 21

¹Munyo watieko kisewila jo to wacewere waeye, wabino nyatirtir i loka Kos, to yawere mere watundo Rod, aka wok kenyo wadonjo Patara.

²Munyo wanwaŋo kenyo ye m'oyido kidho Fonisia, waidho to wacewere.

³Munyo watundo kama wanyalo nen'iye Sipuro, wacewere yuracam to wacomo yu Siria. Waloro Tire kama ye oyido kidho wodh'iye gigipiny m'otiŋo.

⁴Wanwaŋo jom'oyeyo moro kenyo to wabedo gi jo sabiti acel. Gi meni pa Cuny Maleŋ jowaco ri Paulo nike wokiri wokidhi Yerusalem.

⁵To munyo hongo mawan orumo, waweyo jo to wakadho i woth mawan. Joje gi mon pajo gi nyithindho, jokwaŋo wan kalo tindi. Wajoje wagoyo congi wan piny dho thengi pi to wakwayo.

⁶Gikenyo kisi dhano osewila nyawote, to waidho ye kareno jo jodok.

⁷Munyo watieko cewirok mawan wok Tire, watundo Pitolemay, kama wamoth'iye jom'oyeyo to wabed'iye gi jo ma ndelo acel.

⁸Yawere mere waeye to wakidho Kasareya. Kenyo wakidho i ot pa Filipo jatiti Wac Manyen Maber, to wabedo bonge.

⁹Go oyido nitie gi nyithindho manyir aŋwen ma fodi jok'onywomere m'oyido jotuco mikwenda ma wok bongi Were.

¹⁰Munyo watieko bedo kenyo ndelo moro, jatuci wac ma nyinge Agabo otundo kenyo wok Yuda.

¹¹Go obino bongi wan to kwanyo del pa Paulo to won tweyo gine tiende gi cinge, to waco ni, “Me a gima Cuny Maleŋ waco, ‘Joyuda jobino tweyo won del me ama i Yerusalem to jobolo go i cingi Jopath.’ ”

¹²Munyo wawinjo ameno wan kodi ji ma kenyo wakwayo Paulo ni wokiri wokidhi Yerusalem.

¹³To go odwoko ni, “Witimo aŋo, wiywak aka wikelo ran rembo i cunyan? Kole ayikere ki nyaka ri twec kende to kiri ri tho je i Yerusalem i nyingi Rwoth Yesu.”

¹⁴Wakinyalo turo go i gime am'omiyo cuny wan bende oeye to wawaco ni, “Weyi mito pa Rwoth wotimere.”

¹⁵Munyo watieko bedo ye kenyo hongo moro, wayikere to waay to wakadho Yerusalem.

¹⁶Jofonjirok megi ma Kasareya bende jowotho gi wan, to jotero wan i ot pa jal m'onwaŋo wakidho bedo pere m'ilwoŋo ni Minason ma wok Sipuro, m'oyido obedo acel kwon jofonjirok ma jopen yeyo.

¹⁷Munyo watundo Yerusalem jom'oyeyo jojolo wan gi kisangala madit swa.

¹⁸Yawere mere Paulo okidho gi wan neno Yakobo; aka jotel je ma kitipa pa jom'oyeyo oyido jonitie kenyo.

¹⁹Paulo omotho jo to miyo jo wac je kwoŋ gimoro je ma Were oyido otieko timo i dier Jopath i tic pere.

²⁰Munyo jotieko winjo go, joje jopako Were. Gikenyo jowaco ri Paulo ni, “Omin wan neni, nitie Joyuda kweth ma jotieko lokere jom'oyeyo, to joje fodi jocwire tektek kwoŋ Cik pa Musa.

²¹Otiek waco rijo nike ifonjo Joyuda je ma jo ni i dier Jopath weyo Cik pa Musa, aka ni iwaco rijo nike kiri jowothumi nyithindho pajo kosa luwo kula pa Joyuda.

²²Onyo aŋo ma ripo atima? Adieri jobino winjo nike itieko tundo ka.

²³Am'omiyo tim gima wawaco rin. Wan gi ji moro aŋwen ma jonitie i kwoŋirok manyadini.

²⁴Kidhi gi jome ibedi gi jo i tim ma lonyirok aka iwodhi rijo cul kwoŋ gima joori je, odoko jowoliel ye wiy gin. I yo me dhano je bino ŋeyo nike adieri ingoye i gimoro je ma joluwo kwoŋin, kucel in bende imako Cik pa Musa.

²⁵To ma mako kwoŋ Jopath ma jotieko yeyo, watieko dhiro rijo balwa, munyo wawaco rijo nike waridho paro ni kiri jowocami cemo m'ocow gine werin m'otimi gi cingi jo; kosa camo remo, kosa le moro je m'odey, aka jowokure kwoŋ kite ma kidakana.”

²⁶Gikenyo Paulo otero jono aka yawere mere otimo gi jo tim ma lonyirok. Gikenyo go odonjo i Ot pa Were nyutho jo ndelo ma lonyirok no kidho rum'iye aka ŋey kisi dhano kwoŋ jo wokel mic pere ma cowirok.

²⁷Munyo ndelo abirio oyido cegin rumo, Joyuda moro ma jowok iy'adec ma Asia joneno Paulo i Ot pa Were. Jono josigila lwak ji gibe to jomako Paulo.

²⁸Jokoko ni, “Ji ma Isiraili! Kony wan win! Me won a ŋata wotho kamoro je aka fonjo ji dakirok gi Joisiraili, kwero Cik pa Musa kodi Ot pa Were me. Aka onyo okelo kiri Jopath moro i Ot pa Were to koco kamaleŋ me!”

²⁹ (Jowaco ama rupiri joneno Trofimo ma Efeso gi Paulo i tindi, aka joparo nike Paulo oyido otero go i Ot pa Were).

³⁰Ruwirok olak i tindi gipi, aka ji je joringo kanyacel jomako Paulo, to jowodho go woko wok i Ot pa Were. Piyo piyo t'icego woko dhoudi je.

³¹Lwak ji onwaŋo temo neko Paulo to itero wac ri jamituka pa jolweny ma Roma nike ruwirok nitie i Yerusalem gipi.

³²Piyo piyo jatel otero jolweny moro madongo kodi jolweny man to jomwomere kwoŋ lwak ji. Tekin ji neno go gi jolweny to joweyo goyo Paulo.

³³Jatel okidho bongi Paulo, omako go, to wodho or nike wotwey Paulo gi lijegere ario. Gikenyo go openjo ni, “Me ŋa; kendo otimo aŋo?”

³⁴Jomogo i lwak ji jokoko gimoro acel, joman giman. Ruwirok obedo mathoth m'omiyo jatel k'onyalo nwaŋo adieri ma gim'otimere; gikenyo ooro ji tero Paulo i cel pa jolweny.

³⁵Jotundo gine i geŋin ma dhiot, to jolweny jotiŋo atiŋa go rupiri lwak ji oyido olokere mager swa.

³⁶Joje oyido joluwo go ka jokoko ni, “Neki wi go!”

³⁷Munyo jocegin tero Paulo i cel, go oluwo gi jatel ni, “Weyi awaci ye rin gimoro?” Jasirikale madwoŋ openjo ni, “Iŋeyo Dhogrik?

³⁸In won me iki Jamisir ma ndir ca oruwo wiy ji to telo jogwenyirok gana aŋwen i thim?”

³⁹Paulo odwoko ni, “A Jayuda to onywolan i Tariso ma Silisia, anywola ma tindi m'oŋeyere maber. Mondo yeyan aluwi gi ji.”

⁴⁰Jasirikale madwoŋ oyeyo go, to Paulo cungo i geŋin ma dhiot to miyo ji ranyuth gi cinge. Munyo jopie, Paulo oluwo gi jo gi Dhoyuda.