Read dhopadhola Tim pa Jomoor 22 Bible Online

Tim pa Jomoor 22 - dhopadhola bible

Tim pa Jomoor 22

¹“Wutmera gi bacere nan, winji win gim'awaco riwin ma nyutho win paka angoye gi raco moro!”

²Munyo jowinjo go luwo Dhoyuda, jomedo kudirok; Paulo omedere luwo ama:

³ “Abedo Jayuda, m'onywol i Tariso ma Silisia, to adongo Yerusalem won ka paka jafonjirok pa Gamaliel. Alimo fonji matek kwoŋ Cik pa kwarere mawan, aka oyido amiyere ri Were paka win bende ma win ka konon me.

⁴Alwenyo gi ji ma joluwo Royo pa Yesu no tundo kiri i nek. Amako cwo gi mon aka abolo jo i od twec.

⁵Jadwoŋ pa jocway ri Were i wi migam kodi kitipa pa jotel pa ji gibe jonyalo ridho riwin ni aluwo gir'adieri. Alimo balwa wok bongi jo m'ondiki ri Joyuda jowoti wan ma Damasiko aka akidho koro mako ji kelo jo Yerusalem gi lijegere i cingi gin wocandi jo.”

⁶“Aka munyo oyido atieko woth ariko Damasiko, dho kapa sawa aucel, lero madwoŋ owok malo abwap to thokan.

⁷Gikenyo agore piny t'awinjo dwondi ŋata waco ran ni, ‘Saulo, Saulo! Raŋo ilwenyo kodan?’

⁸Apenjo ni, ‘In iŋa, Rwoth?’ Owaco ran ni, ‘An Yesu ma Nazareth m'ilwenyo gine.’

⁹Ji m'onwaŋo nikodan kenyo joneno lero no to jok'owinjo dwondi ŋat'onwaŋo luwo kodan no.

¹⁰Apenjo go ni, ‘Atimi aŋo, Rwoth?’ Aka Rwoth owaco ran ni, ‘Ay malo idonji Damasiko, aka kenyo am'ibino waco rin gimoro je ma Were ocano rin timo.’

¹¹Munyo waŋan onwaŋo otho ro lero m'oasere no, jowotan jomako cingan to joteran Damasiko.”

¹²“Kenyo onwaŋo nitie nyatoro m'ilwoŋo ni Anania, jadin m'owinjo Cik mawan aka Joyuda je ma Damasiko jomiyo go dwoŋ swa.

¹³Go obino bongan to cungo kabutan to waco ni, ‘Omera Saulo, caki neno kendo!’ I hongo no won aneno kendo to aŋiyo go.

¹⁴Gikenyo go owaco ran ni, ‘Were pa kwarere mawan oyerin ni iŋey gima go mito, ni inyal neno Ŋat'otire pere gi winjo go munyo iwinjo dwonde won;

¹⁵ameno ibino bedo jakony pere ma waco ri ji gim'itieko neno gi winjo.

¹⁶To onyo aŋo m'idoko ikuro? Ay malo obatisa in, aka reco perin wolwoki woko munyo ilwoŋo nyingi go.’ ”

¹⁷“Agik Yerusalem, aka munyo akwayo i Ot pa Were, aneno cal m'omenyere ran

¹⁸m'aneno iye Rwoth munyo waco ran ni, ‘Redi mayot ieye Yerusalem, rupiri ji ma ka jok'ojol gim'iwaco kwoŋan.’

¹⁹Adwoko ni, ‘Rwoth, kole joŋeyo maber paka yado akidho i kalamo pa Joyuda m'omore, amako jom'oyeyin, agoyo jo aka atero jo i twec.

²⁰Aka munyo ineko jatiti Wac perin Stefano, oyido an kenyo, aka abende afoyo odoko aŋat'akuro kiri ruk pa joma joneko go.’

²¹Rwoth owaco ran ni, ‘Kadhi, rupiri abino dhirin bor swa i dier Jopath.’ ”

²²Ji onwaŋo jowinjo luwo pa Paulo cuka tundo i wac me, to jocako koko gi derino madwoŋ ni, “Kwany wi woko jalo i piny ka! Go kiripi wokwo kendo!”

²³Oyido jokoko aka jokwadho nangin pajo i hongo aka jowito fukefuke malo.

²⁴Gikenyo jasirikale madwoŋ owodho or nike woter Paulo i cel, to oro jo cwado go ma mito ŋeyo gim'omiyo Joyuda jokoko rigo ameno.

²⁵To munyo jocowo kikoda go aka wocwadi, Paulo owaco ri jasirikale moro m'onwaŋo ocungo kenyo ni, “Kere cik yeyo win cwado ŋat'obedo anywola ma Roma kada fodi k'oosa go banja moro je?”

²⁶Munyo jasirikale no owinjo ameno, okidho bongi jadwoŋ pa jolweny to penjo ni, “Wikidho timo aŋo? Kole jame obedo anywola ma Roma!”

²⁷Gikenyo jatel pa jolweny okidho bongi Paulo to penjo go ni, “Waci ran, ibedo Jaroma?” Paulo odwoko ni, “Ey.”

²⁸Jatel pa jolweny no owaco ni, “An alokere Jaroma munyo atieko culo pesa malac swa.” Paulo odwoko ni, “To an onywolan paka Jaroma.”

²⁹Gikenyo piyo piyo, ji m'oyido jokidho kelo penji ri Paulo joeye gicen kwoŋe; aka jatel pa jolweny lworo omako munyo oneno ni Paulo obedo anywola ma Roma, aka ama go oyido otweyo gi lijegere.

³⁰Yawere mere jatel pa jolweny oyenyo ŋeyo adieri ma wac ma Joyuda jomito kelo kwoŋ Paulo; riameno ooro jo gonyo woko lijegere pa Paulo to oro jotel pa jocway ri Were i wi migam kodi jopido je parom romo. Gikenyo go owodho Paulo, to kelo go ruwaŋ jo.