Read dhopadhola Tim pa Jomoor 23 Bible Online

Tim pa Jomoor 23 - dhopadhola bible

Tim pa Jomoor 23

¹Paulo oŋiyo jopido nyatirtir to waco ni, “Wutmera cunyan oŋeyo maber swa kwoŋ kwo paran gipi ni angoye gi raco ruwaŋ Were i hongo je kiri pama.”

²Jadwoŋ pa jocway ri Were i wi migam ma nyinge Anania ooro jom'onwaŋo jocungo kabuti Paulo goyo lembe.

³Paulo owaco rigo ni, “Were bino goyin adieri, in m'ical kor ot m'ofuy matar gi woko! Wibedo kenyo ma thumo ran banja cungo kwoŋ Cik, aka win won ama odoko wituro Cik ago munyo wioro jo goyan!”

⁴Ji m'onwaŋo jo nicegin gi Paulo jowaco rigo ni, “Inyalo nedi luwo marac kwoŋ jadwoŋ pa jocway ri Were i wi migam?”

⁵Paulo odwoko ni, “Wutmera oyido akiŋeyo nike go jadwoŋ pa jocway ri Were i wi migam rupiri ndiko waco ni, ‘Wikiri wiluw marac kwoŋ jadhum pa ji mewin!’ ”

⁶Munyo Paulo oneno nike jomegi kwoŋ jono oyido jobedo Josadukayo aka joman Jofarisayo, okoko ri jopido ni, “Wutmera, a Jafarisayo aka Jofarisayo ama jonywolan. Anitie i kapido ka rupiri ageno ni jom'otho jobino cerino!”

⁷Tekin go otieko waco ameno, Jofarisayo kodi Josadukayo jocako dhawirok, to ji tiakere i bwora.

⁸ (Ato Josadukayo jowaco ni ji jokibino cerino kendo kwoŋ jom'otho; aka nike ongoye jomalaika kosa gim'obedo cuny, to Jofarisayo joyeyo gigipiny adek no je).

⁹Gikenyo woy omedo kidho malo; aka Jondiko megi m'oyido jo ni kweth pa Jofarisayo jocungo to jokwero matek ni, “Wakinyali nwaŋo raco moro kwoŋ jame! Miti kono malaika kosa cuny moro oluwo gine!”

¹⁰Piem olokere mager swa m'omiyo jasirikale madwoŋ lworo omako nike jobino yeco woko Paulo acel acele. Riameno go ooro jolweny pere kidho i dier lwak ji piny jowokwany woko Paulo bongi jo gi mbaka jowoteri go i cel.

¹¹Wor m'oluwo to Rwoth cungo kabuti Paulo to waco ni, “Bedi miseni! Itieko bedo jakony paran Yerusalem ka, aka iripo timo ameno Roma bende.”

¹²Odikin yawere mere, Joyuda joromo kanyacel to joyiko paro. Jokwoŋere nike jok'ocem kosa madho gimoro cuka jonek Paulo.

¹³Onwaŋo jokalo ji piero aŋwen ma joyiko paro me kanyacel.

¹⁴Gikenyo jokidho pa jotel pa jocway ri Were i wi migam kodi jotel pa ji to jowaco ni, “Watieko timo kwoŋirok madwoŋ kanyacel ni wak'obil gir'acama moro je kafodi wakineko Paulo.

¹⁵Onyo win kodi jopido dhiri win wac ri jasirikale madwoŋ ma Roma wokel riwin Paulo munyo wirendere nike wimito medo niaŋ kwoŋ tiendi wac pere. Gikenyo walaneko go mafodi k'otundo kiri ka.”

¹⁶To okewo pa Paulo owinjo sereko me to donjo i cel to waco ri Paulo gino.

¹⁷Gikenyo Paulo olwoŋo jasirikale madwoŋ acel to waco rigo ni, “Ter jayac me bongi jatel pa jolweny; nitie gima go mito waco ri jatel no.”

¹⁸Jasirikale madwoŋ no okwanyo go otero go bongi jatel pa jolweny to waco ni, “Jatwec m'ilwoŋo ni Paulo olwoŋan aka okwayan ni akel jayac me bongin, nike nitie gima go lawaco rin.”

¹⁹Jasirikale ma jatel omako cinge to won tero go gicen to penjo go ni, “Aŋo ma imito waco ran?”

²⁰Ana go, “Joyuda joriwo paro nike dikin jowokwayin iter Paulo ruwaŋ jopido, to jorendere ni jopido jomito medo niaŋ kwoŋ wac pere.

²¹To ikir'iyey winjo wac pajo, rupiri nitie ji ma kalo piero aŋwen ma jolapondo jowokuri go i royo. Jono jotieko kwoŋere nike jok'ocem kosa madho gimoro cuka jonek go. Pama won me jotieko yikere ma timo ameno, aka jokuro ŋeyo paro perin won kende.”

²²Jasirikale ma jatel no owaco ni, “Ikir'iwaci ri nyatoro nike itieko kelo wac me bongan.” To oro jayac no kadho.

²³Gikenyo jasirikale ma jatel no olwoŋo jolweny pere ario madongo to waco rijo ni, “Kwany win jolweny miya ario jowoyikere ma kidho Kasareya, kanyacel gi jokayina piero abirio kodi jotonge miya ario, aka wiyikere ay keti sawa adek ma wor.

²⁴Neni kayina moro ri Paulo ma go owothi gine, aka witer go maber bongi gavana Felik.”

²⁵Gikenyo jasirikale ma jatel no ondiko balwa ama:

²⁶“An Kilaudio Lisia andiko ri jadwoŋ, gavana Felik, aka adhiro rin moth.

²⁷Joyuda jomako ŋati me aka oyido jokidho neko go. Alimo ŋeyo nike go obedo Jaroma, am'omiyo akidho kodi jolweny paran botho go.

²⁸Paka onwaŋo amito ŋeyo wac ma jokelo kwoŋe, atero go i kapido pajo.

²⁹Anwaŋo nike go k'otimo raco moro ma di miy neki go kosa tweyi go; wac m'okel kwoŋe onwaŋo mako kwoŋ cik pajo wegi.

³⁰Aka munyo onyuthan nike Joyuda jocamo rigo sereko, aridho paro ma dhiro go bongin. Awaco ri joma osa go jowokeli wac no gi bongin kenyo.”

³¹Josirikale jotimo paka oor jo. Jokwanyo Paulo to jotero go wor no kiri yu Antipaturi.

³²Yawere mere jolweny ma jotiendi gin jodwoko i cel to joweyo jokayina jokadho gine.

³³Jotero go Kasareya to jocwayo balwa ri gavana to jomiyo go Paulo.

³⁴Gavana osoma balwa no to penjo Paulo adec ma go wok'iye. Munyo onwaŋo ni go wok Silisia, owaco ni,

³⁵“Abino winjo wac perin ka joma osa in jotundo.” Gikenyo ooro jo kuro Paulo i cel pa Herode.