Read dhopadhola Tim pa Jomoor 24 Bible Online

Tim pa Jomoor 24 - dhopadhola bible

Tim pa Jomoor 24

¹Munyo ndelo abic okadho, jadwoŋ pa jocway ri Were i wi migam, Anania, okidho Kasareya gi jodongo moro kodi ŋat'oyido luwo rijo m'ilwoŋo ni Tertulo. Jokidho ruwaŋ gavana Felik to joosa Paulo.

²Olwoŋi Tertulo to jocako kelo wac pajo ama: “Jadwoŋ! Tel perin ma rieko otieko kelo riwan siem cowo hongo malac, aka wirok mathoth m'otieko bedo onyo pama okelo bero ri piny mawan.

³Wajolo gime iye je hongo je, aka wakethin walwa swa.

⁴Akimiti galin tektek, to akwayin itimi ran ŋono iwinji wac mawan manok.

⁵Ŋati me waneno paka jamijokere marac swa; go kelo ruwirok i dier Joyuda i piny gipi, aka go obedo jatel pa Jonazarin.

⁶Go bende otemo koco Ot pa Were to wamako go. [Onwaŋo waparo thumo rigo banja i nger ma Cik mawan,

⁷to jasirikale madwoŋ Lisia donj'iye to kwanyo go bongi wan gi mbaka.

⁸Gikenyo Lisia ooro joma joosa go jowobin bongin]. Ka ikaŋasa wac pa jame maber, iwon ibino ŋeyo bonge gigipiny je ma waos'iye go.”

⁹Joyuda bende jodonjo i wac no to jowaco nike gino je otire.

¹⁰Gavana ooro Paulo luwo, to Paulo waco ni, “Aŋeyo nike itieko bedo jathum banja cowo hongo malac, am'omiyo asangala gi limo silwany ma kwedirok kwoŋ wac pa jome ruwaŋin.

¹¹Paka iwon inyalo neno, fodi k'okalo ndelo apar g'ario cuka akidhi Yerusalem kwayo.

¹²Joyuda jok'onwaŋan apiemo gi nyatoro i Ot pa Were, kosa ni aruwo ji i kalamo pajo kamoro je i tindi.

¹³Aka jokinyal kada nyutho ni wac ma joos'iye an me obedo adieri.

¹⁴Me a gim'ayeyo ruwaŋin: An alamo Were pa kwarere mawan munyo aluwo Royo ma jowaco ni k'otire. Aka ayeyo gigipiny je m'ondiki i Cik pa Musa kodi i kitawin pa jotuci wac Were.

¹⁵Abende anitie gi geno kwoŋ Were paka jome, nike ji je, mabeyo kodi mareco, jobino cerino kwoŋ jom'otho.

¹⁶Am'omiyo atemo paka anyalo ndelo je bedo gi paro m'otire ruwaŋ Were kodi ji.”

¹⁷ “An oyido angoye Yerusalem tieko oro moro, am'omiyo oyido akidho koro tero mic paran ri ji paran gi timo cowirok.

¹⁸Aka i kare m'oyido atim'iye ameno ama jome jonwaŋan'iye i Ot pa Were munyo atimo tim ma lonyirok. Lwak ji oyido ongoye bothan, aka ruwirok moro je oyido ongoye.

¹⁹To Joyuda moro ma jowok iy'adec ma Asia onwaŋo jonitie kenyo; jo ama joripo bino bongin ka kelo wac pajo k'inen jonigi wac moro kwoŋan.

²⁰Kak'ameno weyi jome wegi jowowaci reco ma jonwaŋan gine i ndir ca munyo acungo i waŋ pido,

²¹makiweno gimoro acel kende ama akoko gine munyo acungo i dier jo ni, ‘Wimon kodan nyaka ni rupiri ayeyo ni jom'otho jobino cerino aka am'omiyo wiosa an konon.’ ”

²²Gikenyo Felik, m'onwaŋo otiek tito rigo maber kwoŋ Royo no, ocego winjo banja. Owaco rijo ni, “Abino thumo banja mewin ka jasirikale madwoŋ Lisia otundo.”

²³Ooro jasirikale m'onwaŋo nigi Paulo kuro go, munyo miyo ye go siem moro aka yeyo merin pere kelo rigo gima go yenyo.

²⁴Munyo ndelo moro okadho Felik obino gi cege Durosila, m'obedo Nyajayuda. Felik ooro jomoro lwoŋo Paulo bonge to winjo gima go waco kwoŋ yeyo Kristo Yesu.

²⁵To munyo Paulo ocako gi luwo kwoŋ tiro, kurok, kodi bino pa ndelo ma thumo banja, lworo omako Felik to waco ni, “Ere onyo eye, abino lwoŋin kendo ka alimo hongo.”

²⁶I hongo no go onwaŋo geno ni kono di Paulo omiyo ye go pesa moro; riameno go oyido lwoŋo Paulo adhik luwo gine.

²⁷Munyo oro ario okadho, Ponsio Festo olunjo kapa Felik paka gavana. Felik onwaŋo mito mako mere kodi Joyuda, am'omiyo oweyo Paulo i jiera.