Read dhopadhola Tim pa Jomoor 25 Bible Online

Tim pa Jomoor 25 - dhopadhola bible

Tim pa Jomoor 25

¹Munyo ndelo adek okadho wok cuka Festo tundi iy'adec no, go owok Kasareya to kidho Yerusalem.

²Kenyo jotel pa jocway ri Were i wi migam kodi jotel pa Joyuda jokelo rigo wac pajo kwoŋ Paulo. Jokwayo Festo

³ni wotim rijo bero woyeyi wokel Paulo Yerusalem, rupiri oyido joyiko neko go i royo.

⁴Festo odwoko ni, “Paulo nitie i twec Kasareya, aka awon abino gik koro mayot.

⁵Weyi jotel mewin jowokidhi kodan Kasareya to joosa go gi koro, k'inen go otimo raco moro.”

⁶Festo odoko ocowo ndelo aboro kosa apar gi jo, aka nyaka okidho Kasareya. Yawere mere go obedo piny i kapido, to oro jo kelo Paulo.

⁷Munyo Paulo otundo, Joyuda m'oyido jowok Yerusalem jocungo jothoko go to jocako kiosa go wac madongo m'omore ma jok'onyalo wodho adieri mere.

⁸To Paulo piemo gi jo ni, “Fodi akitimo raco moro kwoŋ Cik pa Joyuda, kosa Ot pa Were, kosa kwoŋ Kayisar Kere pa Joroma.”

⁹Festo oyido mito limo foy bongi Joyuda, riameno openjo Paulo ni, “Iyenyo kidho Yerusalem wawinji banja perin me gi koro?”

¹⁰Paulo owaco ni, “Kole am'onyo ee acungo i kapido pa Kayisar won, kama ripo ni wowinj'iye banja paran. Akitimo raco moro ri Joyuda paka iwon iŋeyo.

¹¹K'inen aturo Cik aka atimo gimoro ma miyan aripo gi tho, d'akikway ni abudhere. To k'adieri angoye gi raco i wac ma joosa an iye, ongoye ŋata nyalo kethan i cingi jo. Onyo akodo wac paran bongi Kayisar.”

¹²Gikenyo munyo Festo otieko luwo kodi joma jomiyo go rieko, odwoko ni, “Ikodo banja perin bongi kere, am'omiyo ibino kidho bongi kere.”

¹³Rumacen Kere Agripa kodi Banis jobino Kasareya jolo Festo.

¹⁴Munyo jocowo kenyo ndelo moro, Festo otito ri kere wac pa Paulo ni, “Nitie dhano ka ma Felik oweyo i twec;

¹⁵aka munyo akidho Yerusalem jotel pa jacway ri Were i wi migam kodi jotel pa Joyuda joosa go bongan aka jokwayan ni athum banja woloyi go.

¹⁶To awaco rijo ni, ‘Joroma jokibol dhano woko kafodi go k'onenere awaŋ g'awaŋ gi joma osa go to won kutho osere gi jo.’

¹⁷Munyo joje jobino ka, akigalo, to yawere mere abedo i kapido to aoro jo kelo go.

¹⁸Joma osa go jocungo, to jok'okelo kwoŋe reco moro m'onwaŋo aparo ni di jokelo.

¹⁹Gim'obedo oyido a nyaka piem kwoŋ Cik pajo manyadini kodi kwoŋ nyatoro m'otho m'ilwoŋo ni Yesu ma Paulo ŋoyo nike fodi kwo.

²⁰Akinyalo ridho royo ma nwaŋo adieri kwoŋ gigipiny me, am'omiyo apenjo Paulo ka d'oyeyo kidho Yerusalem wowinji wac pere me gi koro.

²¹To Paulo wodho ywak pere nike wowey go i jiera aka Kayisar ama wowinji banja pere. Am'omiyo awodho or ni wokur go tundo ndir ma d'adhir'iye go bongi Kayisar.”

²²Agripa owaco ri Festo ni, “Awon amito winjo wac pa jal me.” Festo odwoko ni, “Inowinji go dikin.”

²³Yawere mere Agripa gi Banis jobino gi noro gi dwoŋ m'oasere, aka jodonjo i kapido kodi rwodhe ma lweny kodi jomadongo ma tindi. Festo owodho or t'ikelo Paulo i kapido.

²⁴Festo owaco ni, “Kere Agripa, kodi ji je ma win ka gi wan, wineno ŋata Joyuda je, ma ka kodi ma Yerusalem joosa go bongan? Jokoko malo nike wokiri womedere gi kwo!

²⁵To akinyalo nwaŋo reco moro ma go otimo ma ripo gi wac ma tho. To paka go won okodo wac pere bongi Kere madwoŋ, aridho nike abino dhiro go bonge.

²⁶To angoye kodi gima nyatirtir m'anondiki kwoŋe ri kere madwoŋ, Kayisar. Am'omiyo, akelo go ka ruwaŋ win, to tektek mere ruwaŋin, Kere Agripa! Aka k'itieko kikaŋasa wac pere, nyaka anobedi kodi gim'anondiki.

²⁷Ato kinen m'otire dhiro jatwec ma k'onyuthi maber wac m'iosa iye go.”