Read dhopadhola Tim pa Jomoor 26 Bible Online

Tim pa Jomoor 26 - dhopadhola bible

Tim pa Jomoor 26

¹Agripa owaco ri Paulo ni, “Oyeyin luwo wac perin.” Paulo orieyo cinge aka owodho wac pere ama:

²“Kere Agripa! Atero paka ajasilwany ni konon abino luwo wac ma kwanyan woko kwoŋ gigipiny je ma Joyuda joluwo kwoŋan.

³Ato me obedo ro ndir, kwoŋbedo iŋeyo maber kula pa Joyuda kodi dhawirok pajo. Am'omiyo akwayin idiy cunyin iwinji wac paran.”

⁴“Joyuda je joŋeyo kwo paran wok i thino. Joŋeyo wok con ni i kwo paran gipi abedo i piny paran won kodi i Yerusalem.

⁵Ndiri je joŋeyo, ka joyeyo ridho riwin, ni yado onwaŋo abedo jakweth pa joma jomako swa dini mawan, Jofarisayo.

⁶Aka onyo acungo ka munyo iosa an ni rupiri ageno i cikirok ma Were otimo gi kwarere mawan;

⁷cikirok ma nonin mawan apar g'ario je jogeno limo, paka jolamo Were wor g'odieceŋ. Aka ro geno me, Jadwoŋ, am'omiyo Joyuda joosa an!

⁸Raŋo tek riwin yeyo ni Were cerino jom'otho?”

⁹ “An won onwaŋo yado aparo ni aripo timo gimoro je ma nyalere ma lwenyo gi nyingi Yesu ma Nazareth.

¹⁰Aka meno a gima yado atimo i Yerusalem. Jotel pa jocway ri Were i wi migam oyido jomiyan meni aka atweyo kiri ji pa Were mathoth i jiera; aka ki meno kende, ka ithumo rijo banja ma tho, abende agoyo kwir mere.

¹¹I ndir m'omore amiyo jo limo gir'acula i kalamo pa Joyuda je, aka atemo miyo jo kwedirok kwoŋ yeyo pajo. Keme omakan swa gi jo m'omiyo akidho kiri i tindi ma wiloka lwenyo gi jo.”

¹²“Gime am'oyido teran i Damasiko cungo kwoŋ meni kodi or pa jotel pa jocway ri Were i wi migam.

¹³Munyo oyido fodi anitie i royo odieceŋ, jadwoŋ, aneno lero maloyo apa waŋceŋ m'owok malo to thoko wan kodi ji m'onwaŋo awotho gi jo.

¹⁴Wajoje wagore piny, aka awinjo dwondi jo m'owaco ran i Dhoyuda ni, ‘Saulo, Saulo! Raŋo ilwenyo kodan? In won itimo gima kelo rin ayino litho, pa merikwa ma temo gweyo kwer ma nyweny gi tiende.’

¹⁵Apenjo ni, ‘In iŋa, Rwoth?’ Aka Rwoth odwoko ni, ‘An Yesu m'ilwenyo gine.

¹⁶Onyo ay icungi gi tiendin. Amenyere rin ma lokin jatic paran iwaci ri joman gim'omiyo konon inenan kodi giman je ma anonyuthin yuwaŋe.

¹⁷Abino bongin i cingi ji ma Isiraili kodi Jopath, m'adhirin bongi jo

¹⁸ni iyaw waŋ jo jowonyal wirok wok i mudho donjo i lero kodi wok i meni pa Sitan bino bongi Were, ŋey jowonyal limo cwaki kwoŋ reco pajo to jolimo kabedo i dier joma Were oyero munyo joyeyan.’ ”

¹⁹“Am'omiyo, Kere Agripa, akicayo menyirok m'owok i polo m'aneno.

²⁰Atero wac me marapena i Damasiko, nyaka t'atero Yerusalem, kodi rumacen i Yuda gipi, kodi i piny pa Jopath, ni joripo ŋuto reco pajo jowowire bongi Were, gi timo gigipiny ma nyutho nike jotieko ŋuto.

²¹Wac no am'omiyo Joyuda jomakan munyo anitie i Ot pa Were to jotemo nekan.

²²To kiri konon Were okonyan, am'omiyo acungo ka munyo aridho wac me ri ji je, ri jomathindho kodi jomadongo parom. Gim'awaco obedo gimoro acel ma jotuci wac Were kodi Musa jowaco ni bino timere,

²³nike Kristo ripo candere, aka ka otieko bedo marapena i cerino kwoŋ jom'otho, wokel lero ma both ri Joyuda kodi Jopath.”

²⁴Munyo Paulo fodi osa ri kwo pere ameno, Festo okoko rigo ni, “Paulo, ijaneko! Fonjirok perin madit no olokin janeko!”

²⁵Paulo odwoko ni, “Akijaneko Jadwoŋ! Wac m'aluwo obedo adieri odoko aluwo wac me m'anitie milengela.

²⁶Kole Kere Agripa oŋeyo gigipiny me, aka anyalo luwo kodi go gi miseni je. Aridho ni go otieko kikaŋasa gigipiny me je, rupiri gime k'otimere nyaliŋliŋ yu tielo.

²⁷Kere Agripa, iyeyo wac pa jotuci wac Were? Aŋeyo ni iyeyo.”

²⁸Gikenyo Agripa owaco ri Paulo ni, “I hongo macek won me iparo ni inyalo lokan Jakristo?”

²⁹Paulo odwoko ni, “Kada me hongo macek kosa mabor, kwayo paran bongi Were obedo ni in kodi wijoje ma wiwinjan konon ka winyal bedo paka an, to kareno ma k'otwey win gi lijegere ayino.”

³⁰Gikenyo kere, gavana, Banis kodi joman je m'oyido jobedo kenyo gi jo joay malo;

³¹aka munyo jotieko eye kenyo, wegi jowaco kendi gin ni, “Ŋatin k'otimo gimoro ma di miy woneki kosa tweyo go.”

³²Aka Agripa owaco ri Festo ni, “Ŋati me d'onyo ogony bedi k'okodo wac pere bongi Kayisar.”